Kujataani tunitsiviit pitsaapput - aaqqitassaqarporli

Kujataani aalisartut piniartullu atugaat nunatta ilaanut sanilliullugit allaanerulluinnarput, taama Aalisarnermut, Piniarnermut Nunalerinermullu Naalakkersuisoq Jens Immanuelsen, kujataani aggustip 24-annit 31-annut paasisassarsiorluni angalareerluni oqarpoq.

Narsami, Qaqortumi Nanortalimmilu umiatsiaararsortut tunitsivigissaarput, aalisakkanillu assigiinngitsunik tunisinissaminnut aamma periarfissaqarlutik.
Aappilattumi Narsarmiinilu aalisartut pisaminnik tunisinissaminnut periarfissaqarput.

Taamaakkaluartoq Narsarmiini aalisartut, nunaqarfimmi 75-inik inulimmi, tunitsiveqarniarnerat pitsaanersaanngilaq, tunitsivigitinneqartut sukkut tamaana ukiup kaajallannerani ammatinneqartarmat.

Isumaqarpunga tunitsivimmik piginnittoq aalisarnermik ingerlatsitsisut allat suleqatigalugit aalisartunut tunitsiveqartitsiniarnera pitsanngorsaavigisariaqaraa, Jens Immanuelsen oqarpoq.

Takusinnaavara nunaqarfimmi aalisartut aalisakkanik amerlanerujussuarnik tunisinissaminnut periarfissaqareersimagaluartut. Neriuutigaara tunitsiveqartitsiniarneq piaartumik aaqqiivigineqarumaartoq.

Aappilattumi aalisartut nunaqarfiup tunitsivianut aalisakkanik assigiinngitsunik tunisinissaminnut periarfissaqarput. Aalisartut nunaqarfiup eqqaani qaleralinniarnerupput. Nunaqarfik 101-inik inoqarpoq

Aappilattumi aalisartut aalisaatitik arlaleriaqalutik aalisarfimminni naatitsillutik annaasarpaat, aalisarfigisartagaanni aalisariutip angisuup qassusersortilluni annaasarai.

Aalisartut isumaqarput aalisariutip qassutiminik aalisarfigisartagaannut qimatsiinnarsimanera akueriuminaalluinnartoq, qassutillu piaarnerpaamik qaqinneqartariaqartut.

Neriuutigaara kattuffissinnut KNAPK-mut aalisaatinik annaasaqartarnersi pillugu saaffiginnissuteqarumaartusi.

Ammassivimmi inuussutissarsiutigalugu aalisartoqanngilaq, nunaqarfik tunitsiveqanngimmat. Tunitsivimmili aalisakkat Qaqortumit ukiuunerani assartorneqartut panertinneqartarput.
Ammassivik annerusumik ivikkanik naatsianillu naatitsivigineqartarpoq.

Takusinnaavara nunaqarfik naatitsivittut atorneqartorujussuusoq. Isumaqarpunga nunaqarfimmiut kommunelu suleqatigalugit aaqqissuussaasumik nunaqarfimmi nunalerineq naatitsisarnerlu inerisarneqarsinnaasoq.

Oqaloqateqarninnilu paasivara nersutinik allaat nunaqarfimmut nuussinissamik pilersaaruteqartoqartoq, Aalisarnermut, Piniarnermullu Nunalerinermullu Naalakkersuisoq oqarpoq. Nunaqarfik 45-nik inoqarpoq.

Tasiusami tunitsiveqanngilaq. Nunaqarfik savaateqarfittut oqaatigisariaqarpoq, nunaqarfiup innuttai 59-it uumasuutilerinermik nunalerinermillu annermik suliaqartuummata. Paasivara ukiuni kingullerni takornariartartut amerliartuinnartut. Takornariartartut aamma nunaqarfimmiunut suliassaqartitsisarlutik.

Nanortalimmi aalisartut Nanortallip kangerluisa qinngortuut ilaanni ukiuni kingullerni bundgarnersortaraluarput, pisaqarnerli ajorput. Aalisartut isumaqarput sila pissusiata allanngornerata kingunerisaanik saarullik tammakartoq, imaq aalisarfigineqartartoq imiunerulersimammat.

Aalisartut tunitsivimmut aalisakkanik assigiinngitsunik tunisinissaminnut periarfissaqarput. Aalisartut, umiatsiaararsortuunerusut, saarullinniarsinnaapput. Saarulliilli illoqarfiup qanittuani pisassaaneq ajorput, aalaakkaasumillu aalisarneqarsinnaaneq ajorlutik, piffissap ilaani takkusimaartaramik.

Aalisartut piniartullu ukiuni kingullerni suliap pissusiata allanngorneranik tamaviaaqalutik aalisarlutillu piniartarput, ukiuutillugu anorersuit sakkortusigaluttuinnarlutik.

Kujataani sumiiffiit amerlanersaasa aalisartuisa piniartuisalu kissaatigaat kujataanut ukiumut nannutassiissutigineqartartut sisamaasut amerlineqassasut.

Isumaqarpunga aalisarnermi piniarnermilu inuussutissarsiuteqarnermut atatillugu qaammarsarneqarnissamik pisariaqartitsisoqartoq. Tamanna pillugu KNAPK aamma aalisartunut piniartunullu siunnersorteqarfimmut saaffiginnissutigissavakka.

Inassutiginialikkersaarutigissavara sullissinissamut isumaqatigiissummut atatillugu sammisamut atatillugu angalanerit amerlineqarnissaannik isumaqatigiissusiortoqassasoq.

Attavigineqarsinnaasoq Aalisarnermut, Piniarnermut Nunalerinermullu Naalakkersuisoqarfimmi pisortaaneq, Jørgen Isak Olsen. E-mail: jio@nanoq.gl