Naalakkersuisoq paasiniaalluni ataatsimiitsitsimmat peqataasoqarluarpoq

Aalisarnermut, Piniarnermut, Nunalerinermullu Naalakkersuisoq, Jens Immanuelsen, Qaqortumi aalisartunik aggustip 26-anni 2020-mi ataatsimeeqateqarpoq, aalisartut 20-t missaanniittut peqataallutik. 

Naalakkersuisoq Aalisarneq pillugu Ataatsimiititaliarsuup maannakkut suliaqarnera pillugu ilaatigut nassuiaassuteqarpoq, suliarineqartoq naammassineqarpat isumaliutissiissutitut tunniunneqassallluni. Aalisarnermut 1996-mit inatsisaasoq 13-ineriarluni allanngortinneqarsimavoq.

Aalisarnermut inatsisissaq isumalluarfigivara. Aalisarneq pillugu Ataatsimiitsitaliarsuup sulineranut atatillugu Naalakkersuisup ataatsimeeqataasut ataasiarani kajumissaarpai aalisartutut atukkatik pillugit pitsaanngortaasinnaasunik kissaateqarunik peqatigiiffimminnut imaluunniit kattuffimminnut saaffiginnissuteqaqqullugit.

Ataatsimeeqataasut umiarsuarmik tunitsiviusinnaasumik aappaagu tikisitsissallutik kissaateqarput, isumaqarlutik aasap ilaani tunisanik killilersuisoqarpallaartoq.

Aalisarnermut, Piniarnermut Nunalerinermullu Naalakkersuisup Jens Immanuelsenip umiarsuarmik tunitsiviliisarnermut periusissiaq nassuiaassutigivaa.  

Siunnersorusuppassili ukiup tullissaanut tunitsiviliisinnaanissamut tunngasumik  KNAPK-mut saaffiginnissuteqaqqullusi, Naalakkersuisoq oqarpoq. 

Naalakkersuisup aalisartullu tunisinermut tunngasumik qanga aaqqissuussineq atuutsinneqaqqilerpat pitsaaqquteqassasoq. Qanga ataatsimiitsitaliaqarpoq aalisartut tunitsivillu sinniisoqarlutik. 

Taamani maluginiartarparput sumiiffinni tunisinermut tunisassiornermullu tamarmik akisussaaqatigiittartut, soorlu aamma killilersuisoqassagaangat. Neriutigaara aaqqissuusssineq tassungaluunniit assigusumik aaqqissuuseqqittoqarumaartoq. 

Aalisarnermut, Piniarnermut Nunalerinermullu Naalakkersuisup Qaqortumiinermini kommunip inuussutisarsiutit pillugit ataatsimiitsitaliaani siulittaasoq Simon Simonsen aamma ataatsimeeqatigivaa. Aamma illoqarfiup aalisartunut tunitsivia pulaarpaa; Arctic Prime Fisheries. 

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaaneq. E-mail: jio@nanoq.gl