Tuttuniarnermi umimmanniarnermilu maleruagassat atuuttut – Ukiaanerani 2020

Tuttuniarneq aamma umimmanniarneq ingerlanneqartumut atatillugu maleruagassat atuuttut APNN-miit matumuuna eqqaasitsissutigineqassapput erseqqissaatigineqassallutillu, ilaatigut akuersissutinik qinnuteqarnermut tunngasut piniarnertaanullu tunngasut.

Inuussutissarsiutigalugu aamma sunngiffimmi tuttunniarneq umimmanniarnerlu piniarfinni tamani aggustip aallaqqaataani 2020-mi aallartippoq. Tuttunniarnermut piniarfinni annerpaanni - Sisimiut-Kangerlussuaq, Akia-Maniitsoq, Ameralik aamma Qeqertarsuatsiaat – sunngiffimmi tuttunniarneq oktobarip 31-ia ilanngullugu ingerlassaaq inuussutissarsiutigalugulu tuttunniarneq decembarip 31-ia ilanngullugu ingerlassalluni. Tuttunniarnermut piniarfinni ikinnerusunik tuttoqarfiusuni – Nuussuaq, Naternaq, Qassit aamma Neria – piniarnissamut piffissaliussaq sivikinneruvoq taamaalilluni sunngiffimmi piniartunut septembarip 30-ia ilanngullugu ingerlassaaq inuussutissarsiutigalugulu piniartunut oktobarip 15-ia ilanngullugu ingerlassalluni.

Piniarfinni Siggummi, Naternami, Sisimiuni, Kangerlussuarmi aamma Ittoqqortoormiini inuussutissarsiutigalugulu sunngiffimmilu umimmanniarneq oktobarip 15-ia ilanngullugu ingerlassaaq.

PIN-mik imaluunniit FRI-mik atuuttumik allagartallit kikkulluunniit kommunip Sullissivia aqqutigalugu tuttunniarnissamut umimmanniarnissamullu akuersissutinik qinnuteqarsinnaanngillat. Naalakkersuisummi aalajangereerpaat piniarnermut allagartap maajip aallaqqaataa sioqqullugu akilereersimanissaa pillugu piumasaqaat 2020-mi atuutiinnassasoq, tamannalu APNN-miit immikkut akuersissuteqarnikkut atuutinneqannginnissaa inatsisitigut tunngavissaqanngilaq.

Tuttunniarnissamut umimmanniarnissamullu akuersissutinik qinnuteqarsinnaanermut piumasaqaatit atuuttut makkuupput:
  • Inuussutissarsiutigalugu aamma sunngiffimmi piniartut qinnuteqarnermi 16-leereersimasut kisimik akuersissutinik qinnuteqarsinnaapput pisinnaallutillu.
  • Piniarnermut allagartaq 2020-moortoq maajip aallaqqaataa sioqqullugu 2020-mi akilereersimassaaq.
  • Piniarnermut allagartamut maajip aallaqqaataani kingusinnerusukkulluunniit akiliisimagaanni taava akiliutigineqartut utertinneqarsinnanngillat, kisianni allagartaq piniarnernut allanut atorsinnaassaaq.
  • Sunngiffimmi piniartut Kalaallit Nunaanni inuit nalunaarsorsimaffianni nalunaarsimasut aamma ukiuni kingullerni qulini piffissaq qinnuteqarfik sioqqullugu ukiuni marlunni ataannartumik Kalaallit Nunaanni najugalittut inuit nalunaarsorsimaffianni nalunaarsorneqarsimasut kisimik akuersissutinik pisinnaapput.
Piniarnermi, nalunaaruteqarnermi il. il. maleruagassat malinneqartussat makkupput:
  • Akuersissutit inummut atiatigut taasamut taamaallaat atuupput allanullu tunniunneqaqqusaanngillat, atukkiunneqaqqusaanatik tunineqaqqusaanatillu.
  • Tuttunut sulloqqortussuseq akuerisaq minnerpaaq .222-iuvoq qoorortuullu eqiinnartakkat eqittaannartakkallu atoqqusaanngillat.
  • Umimmannut sulloqqortussuseq akuerisaq minnerpaaq 6,5 x 55-iuvoq qoorortuullu eqiinnartakkat eqittaannartakkallu atoqqusaanngillat.
  • Aallaasit suulluunniit tuttunut aamma umimmannut atoqqusaasut nakersarneqarsimassaaq paarilluagaallunilu.
  • Tuttutat aamma umimmattat neqaat tamarmikpisaqarfimmiit nassarneqassaaq. Taamaammat pisaqarfinni allaniluunniit neqinik qimatsisarneq inerteqqutaavoq.
  • Akuersissutit pisanik nalunaaruteqarnertalimmik utertinneqarnissaat inatsisitigut piumasaqaataavoq, aamma pisaqarsimanngikkaluaraanniluunniit.
  • Pisaqarfiit, tupeqarfiit assigisaallu torersumik qimanneqartassapput eqqagassallu tamarmik nassarneqartassapput.
Taassuma saniatigut nunaminertani piniarfissatut akuerineqarsimanngitsuni taamaatumillu pisassiiffiunngitsuni, soorlu Nunatarsuaq, Nanortalik, Tuttulissuaq nunaminertanilu allani tuttunik umimmannillu takunniffiusuni tuttunniarneq aamma umimmanniarneq inerteqqutaalluinnartoq sakkortunerpaamik erseqqissaatigineqassaaq.

Nuup Kangerluani Piniarfik Ameralimmi Kapisilinni savaateqarfik Neriunap eqqaani tuttunniarneq immikkut eqqarsaatigisariaqarpoq. Taamaammat savaateqarfik kaajallallugu ungalusaliamiit 500 meterinit qaninnerusumi seqqortoqaqqusaanngilaq.

Paasissutissat sukumiinerusut pillugit immikkoortortaqarfimmi pisortaq Amalie Jessen, Aalisarnermut, Piniarnermut Nunalerinermullu Naalakkersuisoqarfik, oqarasuaat: 34 53 04, e-mail: amalie@nanoq.gl, attaveqarfigiguk.