Kapisilittatit internetikkut nalunaarutigilersinnaavatit

Inuussutissarsiutigalugu sunngiffimmilu aalisartut periarfissaqalerput kapisilittatik sullissik.gl-ikkut nalunaarutigisinnaalissallugit. Naalakkersuisut aggustip 27-anni 2020-mi akuersissutigaat kapisilinniarneq pillugu nalunarut tamatuminnga allanngortinneqassasoq.

2019-imi kapisilittarineqartut kommuninut nalunaarutineqareeraangata agguatigiisillugu ullut 12-t aatsaat qaangiukkaangata Kalaallit Nunaanni Aalisarsinnaanermut Akuerissutinik Nakkutilliisoqarfimmit, KANUAANA, tiguneqartarput. Tamannalu pissutaalluni kapisilinniarnerup matuneqarnissaanut piffissaq eqqoruminaatsinneqartartorujussuusarpoq.

Piffissaq eqqorlugu nalunaaruteqartarnerup aalisartunut ajornannginnerulernissa anguniarlugu KANUAANA nalunaaruteqartarnissamut qarasaasiakkut aaqqiissutissamik suliaqarpoq. Suliaalu tunngavigalugu Sullissivik.gl aqqutigalugu kapisilittarisimasanik nalunaartoqarsinnaalissaaq.

Kapisilinniarneq pillugu nalunaarut naapertorlugu kikkut tamarmik qassutiminnik napitaajaareersimatillutik kapisilittatik nalunaarutigisussaavaat, pisaqarsimanngikkaluarlutillu aamma nalunaruteqartussaallutik. Nalunaarutip allannguutaata aamma ilagaa pisaqartoqarsimatinnagu kapisilittarisimasanik nalunaaruteqarneq KANUAANA-mut kapisilinniarnerup unitsinneqarneranit kingusinnerpaamik ullut 30-t qaangiutsinnagit pisassammat.

Aamma allannguutit ilagaat inuussutissarsiutigalugu aalisarnermi qassutit tissukartittakkat atorneqarunnaarneqarnissaat.

Kapisilinniarneq septembarip aallaqqaataani aallartissaaq.

Ukioq manna kapisilittassiissutigineqartut 20,7 tonsiupput.

Nalunaarut septembarip aallaqqaataani atuutilertussatut pineqartoq tassaavoq kapisilinniarneq pillugu Namminersorlutik Oqartussat nalunaarutaat nr. 32, 28. august 2020-meersoq, uvani takuneqarsinnaasoq: https://naalakkersuisut.gl/kl-GL/Kundgoerelser/2020.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi siunnersortaaneq, Katrine Kærgaard. E-mail: kath@nanoq.gl