Jørgen Isak Olsen Naalakkersuisoqarfimmi pisortaanertut ingerlaannassaaq


Naalakkersuisut atorfik pillugu Jørgen Isak Olsenip qinnuteqaataa Naalakkersuisunit sisamanngornermi aggustip 20-anni akuerineqarpoq. Olsenip taanna 2013-imili atorfigivaa.

Jørgen Isak Olsenip nunatta ingerlatsiviisa pingaarnersaasa ilaanni aqutsisuulluarnissaanut tatigilluinnarpara. Maannakkut atorfimini suliassaminut tunniussimallunilu pimoorussisuuvoq, naalakkersuisoqarfimmilu suleqatiminut pitsaalluinnartumik maligassiuilluni isumassarsisitsisartuuvoq.

Atorfia sivitsorneqarmat isumalluarfigeqaara, aqutsillaqqittuuninimi ingerlateqqiinnartussanngormagu. Nunatsinni inuit ikittunnguit ilagaat aalisarneq pillugu politikkip iternga tikillugu ilisimasalik.

Inerititalimmillu suleqatiginissaa qilanaarivara. Inatsisartut angisuunik inuiaqatigiinnut pingaarutilinnik suliakkiissuteqarput, taakkuuppullu naalakkersuisoqarfimmit timitalerneqartussat. Naalakkersuisoqarfik aalisartunut, piniartunut savaatilinnut aalisarnermillu inuussutissarsiuteqartunut sullissisuuvoq, tassunga ilanngullugit uumasunut nakorsaaneqarfik inuussutissalerinermullu oqartussaaffik.

Neriuutigalugulu upperivara Jørgen Isak Olsen siuttuutillugu aalisarnermut inatsit nutaaq naammassineqarumaartoq. Tamannalu qilanaareqaara, Aalisarnermut, Piniarnermut Nunalerinermullu Naalakkersuisoq, Jens Immanuelsen oqarpoq.

Tulluussimaarutigeqaara Naalakkersuisut tatigalunnga Aalisarnermut, Piniarnermut Nunalerinermullu Naalakkersuisoqarfimmi pisortaanertut atorfinitseqqimmannga.

Nunatsinni inuussutissarsiutini pingaarnerpaaq pillugu ilungersorlunga sullisissavara, soorlu taamaaliortareerlunga, minnerunngitsumillu susassaqarfinnut naalakkersuisut naalakkersuisorlu aamma taama pissagikka, Jørgen Isak Olsen, sulisuminullu tunngasumik ilaatigut ima oqarluni:
Neriuutigaara immitsinnut tapersersuerpalaartumik pissuseqarluta suleqatigiinnerput nangissagipput, taakkuullutalu Naalakkersuisoqarfipput, tassungalu attuumassutillit ilanngullugit siuarsassagipput, oqarsinnaalerluta Namminersorlutik Oqartussani suliffeqarfittut pitsaanerpaajusoq.

Jørgen Isak Olsen Naalakkersuisoqarfimmi 2009-mili sulilerpoq.