Aatsitassalerinermi Avatangiisinut Aqutsisoqarfik Tunup avannaarsuani imartaani periusissiorfiusumik avatangiisinik naliliinermik nutaamik tusarniaassuteqarpoq

Periusissiorfiusumik avatangiisinik naliliineq nutaaq Tunup avannaarsuani 2016-2019-imi avatangiisinik misissuisarnerit inerneraat. Misissuineq inaarlugu Tunup avannaarsuata imartaani uuliasiornerit pillugit avatangiisinik periusissiorfiusumik naliliinermi nutaami matumani ilisimatuut suliap immikkoortuini assigiinngitsuni paasisanik eqikkaapput.

Ilisimatusarneq Aarhus Universititip ataani Danmarkimi Nukissiutinik Avatangiisinillu Misissuisoqarfimmi nunatsinnilu Pinngortitaleriffimmi ilisimatuunit siulerneqarpoq, kiisalu danskit nunallu allat ilisimatusarfiinit qassiinit ilisimatuunit peqataaffigineqarluni. Aningaasat katillugit 60 mio. koruunit missaanniittut ilisimatusarnermut immikkoortinneqarsimapput, taakkulu uuliasiortitseqatigiiffinnit 2012-2013-imi neqerooruteqartitsinermi Tunup avannaarsuani uuliaqarneranik misissueqqissaarnissamut akuerineqarsimasunit aningaasalersorneqarput.

Aatsitassalerinermi Avatangiisinik Aqutsisoqarfik, Danmarkimi Nukissiutinik Avatangiisinillu Misissuisoqarfik kiisalu Pinngortitaleriffik Tunup avannaarsuani avatangiisinik misissuinermut innuttaasunik attuumassuteqartunillu peqataatitsinissamik kissaateqarput taamaammallu tamanut qarasaasiakkut tusarniaanermik matuminnga nassiussaqarlutik.

Periusissiorfiusumik avatangiisinik misissuinermi siunertaasoq tassaavoq Tunup avannaarsuata imartaani uuliaqarneranik misissueqqissaarnerup pilersaarusiorneqarnerani malittarisassiorfigineqarneranilu ilisimasanik katersissalluni.

Ilisimatusarneq ilaatigut makkuninnga immikkoortoqarpoq:
  • uumassusileqarfinnik uumassusilinnillu pingaarutilinnik nalunaarsuineq
  • aalisakkanik aalisakkallu piaraannik misissuineq
  • sananeqaatit avatangiisini naammattuugassaanngitsut nungujartorsinnaassusiannik misissuineq
  • miluumasunik imarmiunik, timmissanik imarmiunik timmisartumit kisitsineq kiisalu sumiiffinnik timmissanut miluumasunullu imarmiunut immikkut pingaarutilinnik nalunaarsuineq
  • aataanik, natsernik, qilalukkanik qernertanik, arfivinnit naajavaarsunnillu qaammataasamiit malinnaaviginninneq
  • qilalukkat qernertat akornusersugaanerinik akornusersuinerillu kingunerinik misissuineq
  • uuliamik sikumiittumik ikuallaanikkut uuliaarluernermik akiuinerup avatangiisinut sunniutaanik kiisalu uuliamik sikumiittumik ikuallaanermi sinnikuisa sunniutaannik misissuinerit
  • uuliap immap ikerani immallu naqqani isumaminik nungujartorsinnaassusia
  • piniartunik suleqateqarluni piniakkanik piniarfinnillu nalunaarsuineq
Ilisimatusarnermit paasisat allaaserisallu 2019-imi ingerlaavartumik saqqummiussorneqartarput. Suliap immikkoortui qassiit ilisimatusarnikkut pernarniutaapput taamaammallu paasisat nutaajulluinnarlutik.

Paasissutissat nutaat ilisimatusarnermit pissarsiarineqartut ilaatigut sinerissap uuliarluernermut misikkarissusianik nalunaarsuinermut nunap assinngorlugu saqqummiunneqartussamut atorneqassapput. Tamatuma saniatigut paasissutissat paasissutissaasivimmit pissarsiarineqarsinnaassapput avatangiisinillu misissugassanik tigusat Namminersorlutik Oqartussat misissugassanik toqqortaasivianiitsinneqassallutik.

Uuliasiortitseqatigiiffiit oqartussaqarfiillu taamaalillutik Tunup Avannaarsuani uuliaqarneranik misissueqqissaarnernik pilersaarusiornerit malittarisassiorfiginninnerillu pitsaanerpaatinnissaannut nutaanik amerlaqisunik ilisimasaqalerput. Taamaattorli Danmarkimi Nukissiutinik Avatangiisinillu Misissuisoqarfik kiisalu Pinngortitaleriffik kaammattuuteqarput piffissami periusissiorfiusumi atuuttumi (2020-2024) uuliaqarneranik misissueqqissaarnissamut qalluinissamullu ammaassisoqassanngitsoq.

Tunup avannaarsuani periusissiorfiusumik avatangiisinik naliliineq Naalakkersuisut nittartakkakkut tusarniaasarfianni saqqummiunneqassaaq, taannalu aqqutigalugu innuttaasut attuumassuteqartullu allakkatigut tusarniaanermut oqaaseqaateqarsinnaapput 1. oktobari 2020-ip tungaanut.

Tusarniaanerup kingorna tusarniaanermi oqaaseqaatit allaaserinnittunit katersorneqassapput inaaganngorlugillu saqqummiunneqassallutik.

Nalunaarusiaq tuluttuujuvoq annertuumik kalaallisut danskisullu eqikkagaalluni. Tunup avannaarsuani periusissiorfiusumik avatangiisinik naliliineq Naalakkersuisut tusarniaasarfianni nanisinnaavarsi

Sukumiinerusumik paasisaqarusunnermi attavigineqarsinnaapput:

Ilisimatusarnermi aqutsisoq Aarhus Universitip ataani Danmarkimi Avatangiisinik Nukissiutinillu Misissuisoqarfik, Anders Mosbech, mobil +4529440203 eller email: amo@bios.au.dk
imaluunniit
Immikkoortortami aqutsisoq Josephine Nymand, Pinngortitaleriffik, Tlf.: +299361234, email: jony@natur.gl
Imaluunniit
Aatsitassalerinermi Avatangiisinut Aqutsisoqarfimmi immikkut siunnersorti Kristine Lynge-Pedersen, tlf.: 345138, mail: krlp@nanoq.gl