NI Nuuk eqqartuussissuserisunit misissuiffigineqarnera

2019-imi upernaakkut NI Nuuk bachelor-itut ilinniarnernik marlunnik neqerooruteqarpoq, 2019-imi aggustimi aallartittussatut eqqarsaatigineqartunik. Aappaa nunani tamalaani niuernermut aamma niuernermi tuniniaanermut tunngasoq, aappaalu aningaasaqarnermut pigisanillu nalilinnik aqutsinermut tunngasoq. Ilinniartitaanernut ilinniartussat katillugu 12-it tiguneqarput.

Ilinniartussat 12-it taakkua tiguneqareersullu saqqummerpoq NI Nuuk ilinniartitaanerit neqeroorutiginissaannut aningaasaliissutitigut imaluunniit najoqqutassatigut inatsisini tunngavissaqanngitsoq. Ilinniartitaanerit taamaalillutik tamatumunnga maleruagassat malillugit akuerineqarsimanngillat, aammalu 2019-mut aningaasanut inatsimmi ilinniartitaanernut aningaasaliissutinik immikkoortitsisoqarsimanani. 

---

Tamanna tunngavigalugu NI-Nuuk-mi BA-mi ilinniartitaanerit inatsisini tunngavissaqanngitsumik neqeroorutigineqarnerat pillugu suliap ingerlasimaneranik misissuineq aallartinneqassasoq, Naalakkersuisut ulloq 25. september 2019 aalajangerput. 

Aalajangersimasumi tassani eqqartuussissuserisoq Ole Spiermann apeqqutinik marlunnik misissueqqullugu Naalakkersuisut Siulittaasuata Naalakkersuisoqarfiata qinnuigaa:

1)      Ilinniartitaanerit pisariaqartunik inatsisini tunngaveqarani tamatumunngalu akuersissuteqartoqarsimanngitsoq neqeroorutigineqarnerannut kina inatsisitigut akisussaasuussanersoq?

2)      Taamatut akisussaasuusunut qisuariarnissamut periarfissat suunersut? 

---

Eqqartuussissuserisut misissuinerat naammassivoq aammalu inerniliussat pingaarnerit makkua saqqummiunneqarlutik:

NI Nuuk siulersuisui pillugit

”Naliliinera malillugu najoqqutassaqarani aammalu aningaasaliissutinut inatsimmi tunngavissaqarani neqerooruteqarneq, inatsisitigut ersarilluinnartumik kukkuneruvoq, kisianni taamatuttaaq naliliivunga Naalakkersuisut inuussutissarsiutinut ilinniartitaanermut inatsimmi killissaliussat iluanni, aamma siulersuisut siulittaasuanut, inatsisitigut akisussaatitsisinnaanerannut aammalu qisuariarnissamut periarfissanik aallartitsisinnaanissaannut piumasaqaataasumik, qularnaatsumik annertuumik soqarsimanngitsoq. 

NI Nuuk pisortat sullissivigimmassuk namminersortoq, inuussutissarsiutinut ilinniartitaanermut inatsimmut tunngatillugu pingaaruteqarpoq, aammalu atuarfiup namminersortuunerata kingunerisaanik, qisuariarnissamut periarfissat allat Naalakkersuisut periarfissarisaannit allaanerusut atorneqassanersut, siulersuisut aammalu siulersuisunut ilaasortat ataasiakkaat nammineerlutik aalajangertussaavaat, taamatullu siulersuisunut ilaasortat toqqaqqinneqassanersut isumaliutersuuteqarnermi suleqataasunit attuumassuteqartunit pisup ingerlasimanera ilanngullugu isumaliutersuutigineqarsinnaalluni.”

Naalakkersuisoq aamma Ilinniartitaanermut, Kultureqarnermut Ilageeqarnermullu Naalakkersuisoqarfik pillugit

”Naliliinera malillugu tamatuma kingorna, IKIN-imi sulisut najoqqutassatigut inatsimmi tunngavissaqarani aammalu aningaasalersuinermut inatsimmi tunngavissaqarani bachelor-itut ilinniartitaanerit neqeroorutigineqarsimanerannut akisussaatinnissaannut, najoqqutassani pissarsiarineqartuni naammattumik tunngavissaqanngilaq. 

Najoqqutassatigut inatsimmi tunngavissaqarani aammalu aningaasalersuinermut inatsimmi tunngavissaqarani bachelor-itut ilinniartitaanerit neqeroorutigineqarsimasut IKIN-imit paasineqarneraniit aammalu IKIN-ip Naalakkersuisumut Ane Lone Bagger-imut ilisimatitsissuteqarneranut, qaammatit marlungajaat ingerlasimapput (takuuk immikkoortoq 3.4.13).

Naliliinera malillugu ilisimatitsissuteqarneq siusinnerujussuakkut pisimasussaagaluarpoq. Tassani suliassanik suliarinninnermi kukkusoqarsimavoq. Naliliinera malillugu suliassanik suliarinninnermi kukkuneq IKIN-imi sulisunut akisussaatitsisoqarnissaanut pineqaatissiisoqarnissaanullu tunngavilersuutaasinnaasumik, annertuutut isigineqanngilaq. 

Taamaalillunga eqikkaallunga naliliivunga IKIN-imi sulisunut inatsisitigut akisussaatitsisoqarsinnaanngitsoq.

Peqatigisaanik oqaatigisinnaavara pisup ingerlasimanera Naalakkersuisumut Ane Lone Bagger-imut (imaluunniit taassuma siuliinut) nalilersuinissamik isumaliutersuuteqarnissamut pissutissaqalersitsisimanngitsoq.

---

Eqqartuussissuserisut misissuineranni inerniliisoqarpoq NI Nuuk siulersuisuini aamma Ilinniartitaanermut, Kultureqarnermut Ilageeqarnermullu Naalakkersuisoqarfimmi (IKIN) kukkusoqarsimasoq. Eqqartuussissuserisut misissuineranni peqatigisaanik inerniliisoqarpoq NI Nuuk siulersuisuinut imaluunniit IKIN-imi sulisunut inatsisitigut akisussaatitsisinnaanissamut kukkunerit taakkua annertuujunngitsut. 

Eqqartuussissuserisut misissuineranni naggataatigut oqaatigineqarpoq pisup ingerlasimanera Naalakkersuisumut Ane Lone Bagger-imut (imaluunniit taassuma siuliinut) nalilersuinissamik isumaliutersuuteqarnissamut pissutissaqalersitsisimanngitsoq.

Naalakkersuisut ulloq 13. august 2020 ataatsimiinnerminni aalajangerput eqqartuussissuserisut misissuineranni inerniliinerit tusaatissatut tiguneqassasut. 

Naalakkersuisut eqqartuussissuserisut misissuinerat tunngavigalugu, pisortat sullissivii namminersortut pillugit inuussutissarsiutinut ilinniartitaanermut suliassaqarfimmi ilusiliineq atuuttoq naliliiviginiarpaat.

Naalakkersuisut tamatuma saniatigut kukkunerit tassunga assingusut pisassanngitsut, IKIN-imi atorfilittanut erseqqissarpaat. 

Misissuinerup immikkoortui sorliit inunnik paasissutissanik suliarinnittarneq naapertorlugu tamanut saqqummersinneqarsinnaanersut, Naalakkersuisut Siulittaasuata Naalakkersuisoqarfiata maannakkorpiaq nalilersorpaa.

Eqqartuussissuserisut misissuinerat 1.576.208,16 koruuninik akeqarpoq.