Kalaallit qallunaallu oqartussaasoqarfiisa ataatsimoorussamik suliniuteqarnerat Kalaallit Nunaanni meeqqat inuusuttullu atugarliortut pitsaasumik meeraanissaanut qulakkeerinnissaaq

Kalaallit Nunaanni Isumaginninnermut Naalakkersuisoq Danmarkimilu Socialministeri meeqqanut inuusuttunullu atugarliortunut pitsaanerusumik suliniuteqarnissamut innersuussutinik 16-inik tigusaqarput, taakkulu suliniutiginissaat 1. septemari 2020-miit aallartissavaat

Ukiuni kingullerni Kalaallit Nunaat meeqqanut inuusuttunullu atugarliortunut ikiorsiiniarluni annertuumik suliniuteqarnissamik aallartitsisimavoq.  Ajoraluartumilli kisitsisit ersarissumik alianartumillu takutippaat:  Kalaallit Nunaanni meeqqat pingajoraarterutaasa missaat suli meeraanerminni sumiginnarneqarnertik amigartumillu angajoqqaaniit akisussaaffimmik takutitsivigineqartarnertik misigisarraat.  Meeqqat tallimartapajaasa 1995-imi kingornaluunniit inunngornikut kinguaassiuutitigut atornerlunneqarsimapput. Inuusuttullu imminut toquttartut ernumatsannartumik amerlasoorujussuupput.

Taamaammat qanoq ililluni siusissukkut suliniuteqartarnerit, pinaveersaartitsinerit, amerlanerusunillu meeqqanut inuusuttunullu atugarliortunut neqerooruteqartarnissat aammalu meeqqat inuusuttullu kinguaassiuutitigut atornerlunneqarsimasut pitsaanerusumik inatsisitigut illersugaanerat qulakkeerneqassanersut pillugit suleqatigiissitat 16-inik innersuusiornikuupput.

Folketingimi amerlanerussuteqarluartut isumaginninnermut tunngassuteqartunik innersuussutit piviusunngortinneqarnissaannut 80 mio. Koruuninik aningaasaliissuteqarnikuupput, Kalaallit Nunaanniillu aningaasaleeqataasoqarluni. Tamatumunnga ilanngullugu, ukiuni aggersuni aningaasaliissutissanut inatsinnut atatillugu inatsisinut tunngasuni suliniutissanut aningaasanik nassaarniarnissaq Danskit naalakkersuisuisa siunniuppaat.

Naalakkersuisoq Martha Abelsen ima oqarpoq:

”Danskit tapersiuteqarnerat qujamasuutigilluinnarparput, nuannaarutigalugulu maluginiarsimavara qanoq suleqatigiinneq ajunngitsigalunilu naligiitsigisoq. Kalaallit Nunaanni meeqqat tamarmik toqqissisimasumik meeraanissaat anguniarlugu sulissutigivarput, suleqatigiissitallu innersuussutaat pitsaasut aallarteriikkatsinnik aallaaveqartut ingerlakkutsigit, taava isumaqarpunga angusinnaassagipput. Maannakkut innersuussutit piviusunngortinnissaat tullernguuppoq, taamaalilluni meeqqat inuusuttullu allannguuteqartoqarneranik malugisaqalerniassammata.”

Social- aamma indenrigsministeri Astrid Krag ima oqarpoq:

”Meeraanermi sumiginnagaanernik oqaluttuat aliatsannartorujussuit isiginngitsuusaarsinnaanngilluinnakkagut tusarnikuuakka. Kalaallit Nunaata meerartai atugarliortut allannguiffigivittariaqarpavut. Taamaammat maannakkorpiaq piffissamilu ungasinnerusumi ikiuutaasussamik suliniuteqarniarnerput nuannaarutigaara.  Aammalu naak ajornartorsiutit tamarmik maannakkorpiaq aaqqissinnaanngikkaluarlutigit, amerlanerusut toqqissisimanerusumik meeraanissaannut ikiuutaassaaq.”

Naalakkersuisut (nunatsinneersut), danskillu naalakkersuisui ukioq kingulleq suleqatigiissitanik pilersitsipput. Tamatumunnga tunuliaqutaasoq tassaavoq, ukioq kingulleq aasaanerani Naalakkersuisut danskit naalakkersuisuinut Kalaallit Nunaanni meeqqat inuusuttullu atugarliortut pitsaanerusumik suliniuteqarfiginissaannut peqatiserinninnerat. 

Innersuussutit

Suliakkiissut



Sukumiinerusumik paasissutissat:

Social- aamma Indenrigsministeriap tugasassiortunut oqarasuaataa, oqaras.: +45 4185 1360 (SMS-inik tigusaqarneq ajorpoq)

Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfik, Naalakkersuisumut allatsi Inger Heilmann Larsen, e-maili:
ihla@nanoq.gl, oqaras.: +299 554160