Tikaagullittassiissutit 2019-imiit 2020-mut umiatsiaararsortunut qamutilissortunullu nuunnikuusat ingerlaannartumik Kitaani matuneqarput

Kitaani
Tikaagulliit 2019-imi pisarinngitsuukkat 52-sit 2020-mut nuunneqartut ingerlaannartumik piniaqqusaajunnaarput. 2019-imi pisassiissutini pisarineqanngitsoortut Kitaani maanna nungupput.

Tunngaviusumik 2020-mi tikaagullittassat 164-it qamutilissortunut umiatsiaararsortunullu agguaassat allannguuteqanngillat 19. December 2019-imi tusagassiorfitsigut nalunaarutikkut nalunaarutigineqartut.

19. August 2020-mi APNN-ip tikaagullissimanermut nalunaarutit 2020-mi pisassiissutiniit pisarineqarsimasutut nalunaarutit 37 tigusimavai. 2020-mut pisassiissutiniit kommunet ataasiakkaat aqutsiveqarfimminni agguaassisimaneratuut ingerlaannassaaq. Tikaagulliit suli 124-nik sinneqarput, taakkunannga 89-it angallatinit qamutilissortunit pisassaallutik aammalu 35-t piniaqatigiinnissamut (agguaanneqareersut).

Angallatit kiisalu ataatsimoorluni tikaagullinniarnissamut teknikikkut piumasaqaatinik nalunaarutini ataani taaneqartunik naammassinnissimasutut akuerineqarsimasut nalunaarut atuuttoq malillugu 1. januarimiit 31. decembarimut tikaagullinniarsinnaapput.

Kangia
2019-imi Kangiani tikaagullittassiissutit 9-nik sinneqarsimapput tikaagulliillu pingasut sinnerussimasuniit ulloq 7. Juli 2020-miit nuunneqartut suli pisarineqarsinnaapput. Tunumi umiatsiaararsortunut ammaanneqarnikuupput. Piniarnermi malittarisassat atuuttut malillugit aammalu akuersissuteqaqqaarnissamut piumasaqaat ilanngullugu atuuppoq.

Tusagassiorfitsigut 19. December 2019-imi nalunaarutigineqartut tunngaviusumik pisassiissutit agguaanneqartut aqutsiveqarfinni allannguuteqanngillat. Ulloq 19. August 2020 Tunumi tikaagulliit 12-t pisarineqarsimasutut nalunaarutigineqarput, sinneruppullu 8-t kiisalu 2019-imi pisarineqanngitsoortut ilaat pingasut, katillugit 11-t.

Ataatsimoorussamik tikaagullinniarnissamut teknikikkut piumasaqaatinik nalunaarutini ataani taaneqartunik naammassinnissimasutut akuerineqarsimasut 1. januaarimiit 31. decembarimut tikaagullinniarsinnaapput.

Piniarnissani piumasaqaatit (www.inatsisit.gl)
Arfernik angisuunik piniarneq ingerlanneqassaaq takuuk:
• Arfernik angisuunik illersuineq piniarnerlu pillugit Namminersorlutik Oqartussat nalunaarutaat nr. 9, 6. december 2018-imeersoq
• Arfattat angisuut pissatallu nalunaarutigineqartarnerat pillugu Namminersorlutik Oqartussat nalunaarutaat nr. 12, 16. juli 2010-meersoq.



Pisarinngitsuukkat pillugu nassuiaat
Pisarinngitsuukkanik nuussinermi (carry-over) periaaseq IWC-mi ataatsimiinnermi kingullermi (IWC 67, septembari 2018) akuerineqartoq malinneqassaaq.

Malugeqquneqarpoq Kalaallit Nunaata Kitaani pisarinngitsuukkanik nuussisinnaanermi killissarititaasoq tikaagullinniit 15-niit ukiumut pisassiissutaasunit 164-sunit 50%-mut qaffanneqartoq, tassalu annerpaamik tikaagulliit 82-it nuunneqarsinnaallutik. Ilisimatuussutsikkut ataatsimiititaliap nalunaarutigereerpaa nuussisinnaanermi killissarititaasumik qaffaaneq pineqartoq piujuaannartitsinermut kinguneqassanngitsoq. Kalaallit Nunaata Kitaani pisassiissutinik pisarinngitsuukkanik nuussinermi amerliliisinnaanermut ukioq aallartiffiusoq 2018-iuvoq.

Malugeqquneqarpoq Tunumi pisarinngitsuukkanik 2019-imi aamma 2020-mi nuussisinnaaneq tikaagullinnut 3-nut killeqarmat. Taassuma kingorna pingasuniit ukiumut pisassiissutaasunit 20-sunit 50 %-mut qaffanneqassammat, tassa amerlanerpaamik 10-t (2021-miit atuutilissaaq). Ilisimatuussutsikkut Ataatsimiititaliaq nalunaaruteqarpoq taanna nuussisinnaanermut qaffaaneq uumasoqatigiit amerlassusaannik innarliinavianngimmat. Tunumi pisassiissutinik pisarinngitsuukkanik nuussinermi amerliliisinnaanermut ukioq aallartiffiusoq 2020-uvoq.

Kalaallit Nunaanni arferit anginerit pisassat Arfanniarnermut Ataatsimiititaliarsuup (IWC), pisassiissutinik aalajangiisartuusup, inassuteqarnera tunngavigalugu aalajangersorneqartarput. Ataatsimoortumik ukiunut 7-nut atuuttumik tikaagulliusaanik, arfivinnik, qipoqqanik Kitaanilu tikaagullinnik aammalu Tunumi tikaagullinnik pisassiissutit 2019-2025-imut atuupput. Ukioq pisassiiffiusoq naagaangat nalilersuineqartartussaavoq, ukiumut tullermut pisassiinissamut nutaamik inassuteqaateqartoqarsimassagaluarpat pisassanillu qaangiisoortoqarsimanersoq nalilersorlugu.



Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl