Nunatta Karsiata 2019-mut naatsorsuutai 142 mio. kr.-nik sinneqartooruteqarput

Nunatta Karsiata 2019-imut naatsorsuutai maanna tamanut saqqummiunneqarput, ukiumullu 2019-imut IS-imik taaneqartartumi 142 mio. kr.-nik sinneqartooruteqarput.

Taamaalilluni Nunatta Karsiata 2019-imut naatsorsuutai aningaasanut inatsimmik suliaqarnermi naatsorsuutigineqartumit annertuumik sinneqartooruteqarput. 2019-ip ingerlanerani ilassutitut aningaasaliissutit ilanngullugit 48 mio. kr.-nik amigartooruteqarnissaq missingersuutigineqarpoq. Taamaalilluni naatsorsuutit 190 mio. kr.-nik pitsanngoriaateqarput.

Nunatta Karsiata isertitai 104 mio. kr.-nik qaffariarnerat naatsorsuutit inernerata ilaatigut takutippaa. Ingammik eqqussuinermi akitsuutit, naqitsinermut akitsuutit, qamutit motoorillit akitsuutaat, suliffeqarnermi akitsuut kiisalu qaleralinnut akitsuut katillutik ilimagineqartunit 53 mio. kr.-t sinnerlugit isertitsissutaapput.

Nunatta aningaasaqarnerani ingerlatsineq 2019-imi suli qaffasippoq, aalisarnermillu inuussutissarsiortut akitsuutitigut nunamullu tamarmut akileraarutikkut pisortat aningaasaqarneranni isertitsiffiungaatsiarput.

Kiisalu ingerlatsinermut aningaasartuutit akit akissarsiallu ineriartornerata nassatarisaanik 2019-imi nakkutigineqarluartumik ineriartorput.

Aningaasaqarnermut Naalakkersuisoq Vittus Qujaukitsoq ima oqarpoq:
Nunatta Karsiata 2019-imi sinneqartoornera iluarisimaarpara. Tamatuma Naalakkersuisut ajunngitsumik akisussaassuseqartumillu aningaasaqarnikkut politikeqarnerata iluatsilluarnera uppernarsarpaa. 2019-imi pitsaasumik angusaqarnerup Kalaallit Nunaata aningaasaqarnerata Coronamik tunillaassuunnermik eqqorneqarnerput sioqqullugu nukittunera takutippaa.

Vittus Qujaukitsoq nangippoq:
Angusaqarluarnerup 2019-imi sinneqartooruteqarnikkut pisortat aningaasartuutaasa annertusinissaanut periarfissiineranik eqqarsalersissanngilaatigut. Coronap tunillaassuunnera Nunatta Karsiata aningaasanik uninngasuutaanik annertuumik atuinermik nassataqarpoq, 2019-imilu sinneqartoorutit taakku matussusernissaannut naammanngillat. Coronap ajornartorsiortitsinerata qaqugu qaangiunnissaa kialuunniit oqaatigisinnaanngilaa, taamaammallu Nunatta Karsianik annertunerusumik nammakkiinissamut nutaanilluunniit aningaasartuuteqartitsinissamut suli annertuumik tunuarsimaartoqartariaqarpoq.

Nunatta Karsiata Naatsorsuutai Inatsisartut ukiaanerani ataatsimiinneranni Inatsisartunit suliarineqassapput.

Naatsorsuutit ilanngussallu linkit uku atorlugit nanineqarsinnaapput:

Kalaallisut:

https://naalakkersuisut.gl/kl-GL/Naalakkersuisut/Naalakkersuisoqarfiit/Finans/Landskassens-regnskab

 

Qallunaatut: https://naalakkersuisut.gl/da/Naalakkersuisut/Departementer/Finans/Landskassens-regnskab

 

 

Inussiarnersumik inuulluaqqusillunga

Vittus Qujaukitsoq

 

Attaveqarfissaq:

Naalakkersuisup allattaa Samo Jacob Nielsen

Oqarasuaat 34 56 77 maili samn@nanoq.gl