Kapisilinniarneq septembarip aallaqqaataani aallartissaaq

Sunngiffimmi inuussutissarsiutigalugulu aalisartut kapisilinniarnissamut akuersissuteqassapput. Tamarmik pisaminnik nalunaartussaatitaapput. Aalisartut 2019-imi akuersissuteqarsimasut, nalunaartussaatitaanertik naapertorlugu iliorsimanngitsut, 2020-mi kapisilinniarnissamut akuersissummik tunineqassanngillat.

 

Pinngitsoornat kapisilittatit tamaasa Kalaallit Nunaanni Aalisarsinnaanermut Akuersissutinik Nakkutilliivimmut, KANUAANA-mut 2020-mi nalunaarutigissavatit, taamaalillutit 2021-mi akuersissummik atorneqarsinnaasumik pisinnaalissaatit. Kapisilinnik pisaqanngikkaluaruilluunniit nalunaarsuivimmut 0-imik aamma allassallutit.

 

Pisassiissutit aamma 2020-mi kapisilinniarneq
Naalakkersuisut aalajangerput ukioq manna kapisilittassat 20,7 tonsiussasut, taakku inuussutissarsiutigalugu sunngiffimmilu aalisartunit aalisarneqarsinnaapput. Pisassiissutigineqartut siornatut paggatassiissutaallutik.

 

Kapisilittassiissutigineqartut 20,7 tonsit 2020-mi kapisilinniarsinnaanermut akuersissutilinnut inuussutissarsiutigalugu sunngiffimmilu aalisartunut ataatsimut pisassiissutaapput.

 

Ukioq manna kapisilinniarnissaq septembarip aallaqqaataanit oktobarip 31-annut pissaaq, kapisilittassiissutigineqartulluunniit nunguppata aalisarneq unitsinneqassalluni.

 

Tamarmik nalunaartussaatitaapput
Kalaallit Nunaanni kapisilinniarneq maannakkutut ingerlaannassappat, pisariaqarpoq aalisartut tamarmik pisaminnik nalunaartussaanertik naapertorlugu nalunaarutiginnittassammata. 

 

  • Kapisilinniareernerit tamaasa pisaqarsimatilluni pisarineqartut KANUAANA-mut nalunaarutigineqartassapput.
  • Kapisilinniarnerup nalaani kapisilimmik pisaqartoqarsimanngippat, kapisilinniarneq qaangiukkaangat nalunaarsuiffimmut 0-imik allallugu nalunaarutigineqartassaaq.
  • Kapisilinniarneq aamma qaangiukkaangat kapisilinniarnerni kapisilimmik ataatsimilluunniit pisaqartoqarsimannginnera aamma nalunaarutigineqassaaq.

 

Inuussutissarsiutigalugu sunngiffimmilu aalisartut 2020-mi kapisilittaminnik nalunaarsuisussaanertik naapertorlugu nalunaarsuisimanngippata, 2021-mi kapisilinniarnissamut akuersissummik tunineqarsinnaanngillat.

Pingaaruteqarluinnarpoq nalunaarsorneqarsimasut tamaasa KANUAANA-mut piaartumik nassiunneqartassammata, pisarineqartut KANUAANA-mit malinnaavigineqarluarniassammata.

 

Taamaalilluni kapisilittassiissutigineqartut sinnerlugit pisarisoornissaat pinaveersaarneqarsinnaavoq. Pisassiissutigineqartut sinnerlugit pisaqartoqarpat aappaaguanut pisassiissutigineqartut ilanngaavigineqarsinnaammata. Taamaattumik pingaaruteqarluinnarpoq eqqaamassallugu kapisilittarineqartut piaartumik nalunaarutigineqartarnissaat.

 

Pisarineqartut, akuersissummik atuisimannginneq, pisaqarsimanani 0-imik nalunaaruteqarneq kapisilinnut pisanut immersuiffimmut nalunaarsorneqassapput.

 

Kapisilinnut pisanut immersuiffik Sullissivik.gl-imiittoq toqqaannartumik immersorneqarsinnaavoq  imaluunniit pappiaranngoriarlugu immersorneqarsinnaalluni, uunga nassiunneqassalluni: GFLK, Postboks 501, 3900 Nuuk, telefax 34 63 60 imaluunniit uunga e-mailertoqarsinnaalluni: gflk@nanoq.gl

 

Kapisilittarisimasanik nalunaarsukkat kapisilinniarnerup unitsinneqarneranit ullut 30-t qaangiutsinnagit GFLK-mut nassiunneqassapput.

 

Kapisilinnut pisanut immersuiffik aamma immersornissaanut ilitsersuut uaniippoq  (Kapisilinnut pisanut immersugassamut ilitsersuut - uaniippoq

 

Kapisilimmik pisaqaruit misiligutissamik tigusillutit ilisimatusartut ilisimasaqarnerulernissaannut tapersersuigit
Biologit kapisilinnik nunatsinni pisarineqarsimasunik ukiut tamaasa misissuisarput. Biologit kapisillit ilisimasalertarpaat, soorlu alliartorneri aamma ukiui pillugit, aammali suminngaanneersuuneri, nunallu pineqartup kuuanit soorlermeersuunersut ilisimasaqalertarlutik. 

 

Paasissutissanik katersuineq Atlantikup Avannaani kapisillit pillugit nakkutiginninnerup ilagaa, katersuinikkut paasineqarsinnaassalluni Atlantikup Avannaani taama ajortigisumik maannakkut kapisileqartoq.

Misissugassanik tigusisarneq nunat allat nunatsinni killilimmik kapisilinniarsinnaanermut akuersaarnerattut tunngaviisa ilagaat.

 

COVID-19 pissutaalluni biologit nunanit allaneersut, nalinginnaasumik misissugassanik tigusisartut, nunatsinnut ukioq manna tikissinnaanngillat kapisilinniillu misissugassanik tigusisinnaanatik. 

 

Taamaattumik APNN kapisilinniarnissamut akuersissutilinnut kajumissaarivoq ilisimatusartunut misissugassanik tigusinernik ikiueqqulluni, akuersissuteqartoq kapisilinnit 5-init 10-inut misissugassanik tigusaqartassalluni.  

 

Pingaaruteqarpoq kapisilinnit nunatsinneersunit misissugassanik tigusisoqarsinnaanera Atlantikup Avannaani kapisillit nakkutigineqarnerinut atatillugu, nunat allat piumasaqaataannut naapertuuttumik iliuuseqaatigaluta, nunat tamat suliniaqatigiiffiat NASCO suleqatigalugu.

 

Kissaatigigukku ilisimatusartut ikiorusullugit, taava kapisilinnut misissugassanik tigusissutissanik kommunimut akuersissummik piniarninnut atatillugu pisinnaavutit, illoqarfinni ukunani: Tasiilaq, Qaqortoq, Sisimiut, Maniitsoq aamma Nuuk.

 

Misissugassanik tigusinermi kapisillip takissusaa uuttorneqassaaq oqimaalutarneqarluni, aamma tattaanik anginngitsumillu sulussuguanik DNA-mik misissuinermi atugassamik. Tamatumunnga ilitsersuut ilaavoq.

 

Misissugassanik peqqissaarussillutit tigusiguit nunatsinni siunissami kapisilinniartarnissamut angisuumik qularnaareqataallutillu ikiuissaatit.

 

Misissugassanik tigusinnissamut tunngasumik apeqqutissaqaruit, oqaasissaqaruit imaluunniit kapisilimmik qatigalimmik naammattoorsiguit imaluunniit allanik soqutiginaateqartunik kapisilinniarninnut attuumassuteqartunik apeqqutissaqaruit, Pinngortitaleriffimmut assistentit attaviginnissinnaavutit 361 20 00-imut sianerlutit.

 

Attavigineqarsinnaavoq Katrine Kærgaard, Aalisarnermut, Piniarnermut Nunalerinermullu Naalakkersuisoqarfimmi siunnersortit pisortaat. Email: katk@nanoq.gl