Namminersorlutik Oqartussat kommunillu nutaamik suleqatigiinnissamik isumaqatigiissusiorput

Aallussisumik sulereernerup kingorna nunatta borgmesterii Namminersorlutillu Oqartussat, Aningaasaqarnermut Naalakkersuisoq Vittus Qujaukitsumit sinnerneqarlutik suleqatigiinnissamut nutaamik isumaqatigiissutiliorput. Isumaqatigiissutip missingersuutit pillugit suleqatigiinnissamik isumaqatigiissut 2014-imeersoq taarserpaa. Isumaqatigiissut iluatsilluakkatut oqaatigineqarsinnaasoq, peqatigisaanillu pimoorussilluni piareersaasiornerup inernerisaa illuatungeriinnit tamanit atsiorneqarpoq, taannalu siunissami Namminersorlutik Oqartussat kommunillu oqaloqatigiittarnerannut toqqammaviussavoq. 

Aningaasaqarnermut Naalakkersuisoq Vittus Qujaukitsoq isumaqatigiissut nutaaq pillugu ima oqaaseqarpoq:

”Piareersaasiorneq naammassilluarpoq. Isumaqatigiissut nutartigaq namminersorlutik oqartussat kommunillu anguniagaqartumik oqaloqatigiittarnerisa inerneraat.

Kalaallit Nunaanni pisortat ingerlataat inuiaqatigiit aningaasarsiornerisa annertoorujussuarmik ilagaat, taamaammallu Namminersorlutik Oqartussat kommunillu suleqatigiilluarnerisa pitsaanerpaamik aporfissarsiorfiunngitsumillu pinissaa aningaasaqarnermut annertuumik sunniuteqarpoq. Isumaqatigiissullu nutaaq tassunga sinaakkusiivoq.”

Siunissami missingersuutit pillugit suleqatigiinneq allaffissornikkut Aningaasaqarnermut Naalakkersuisoqarfiup kommunillu sinniisuisa ingerlaavartumik oqaloqatigiittarnerisigut ingerlanneqassavoq. Suliaq tamanna ukiumut ataatsimoortumik tapiissutit pillugit isumaqatigiissusiornikkut piviusunngortinneqartassavoq. Ataatsimoortumik tapiissutit Missingersuutit Naatsorsuutillu pillugit inatsimmik, aningaasanut inatsimmik kiisalu pisortat ingerlatsinerat pillugu kommunit aqunneqarnerat pillugu inatsimmik toqqammaveqarput.

”Suleqatigiinnissamik isumaqatigiissutip nutaap ungasissumut isigisumik pilersaarusiornerup nuna tamakkerlugu pilersaarutinut kommunillu immikkoortunut pilersaarutaannut naleqqussakkamut ataqatigiissuunera isumannaarpaa. Suliassat suliaq naapertuunnerpaamik isumaginnissinnaasumit suliarineqartarnissaat isumaqatigiissutip sorlaraa”,  Vittus Qujaukitsoq oqarpoq.      

Namminersorlutik Oqartussat kommunillu suleqatigiinnissamik isumaqatigiissutaasa nutaap atsiorneratigut Namminersorlutik, kommunit immikkoorlutik ataatsimoorlutillu siunissami unammilligassariumaagaat erseqqissumik sinaakkuserneqarput.

Isumaqatigiissut nutaaq 2020-p ataani linkini tulliuttuni nanineqarsinnaavoq:

Kalaallisut:

https://naalakkersuisut.gl/kl-GL/Naalakkersuisut/Naalakkersuisoqarfiit/Finans/Bloktilskud

Qallunaatut:

https://naalakkersuisut.gl/da/Naalakkersuisut/Departementer/Finans/Bloktilskud

Sukumiinerusumik paasisaqarusuttunut attavissaq: Naalakkersuisup allattaa Samo Jacob Nielsen oqarasuaatikkut: 34 56 77 imaluunniit e-mailikkut: Samn@nanoq.gl