KNAPK-p tamanut ammasunik allagaanut akissut

KNAPK ulloq 12. august 2020 aammaarlunilu ulloq 13. august tamanut ammasunik allagaqarnermigut, sinerissap qanittuani aalisartunut immikkut ittumik COVID-19-p malitsigisaanik tapiissutinik tunineqarnissaannik suli aalajangertoqannginnera pillugu naammaginninnginnerminik oqariartuuteqarpoq.

 

Juni 2020-mi KNAPK-mik, Sulisitsisunit, Aalisarnermut, Piniarnermut Nunalerinermullu Naalakkersuisoqarfimmit Aningaasaqarnermullu Naalakkersuisoqarfimmit peqataaffigineqartumik suleqatigiissitamik pilersitsisoqarpoq. Suleqatigiissitap suliakkiut illuatungeriinnit tamanit akuerineqartoq naapertorlugu, maanna nalinginnaasumik ikiorsiissutaareersut avataasigut, aalisarnermut immikkut sammitinneqartunik ikiorsiissutinik pisariaqartitsisoqarsinnaaneranik qulaajaanissaq suliassaraa. Aammattaaq COVID-19-p nassatarisaanik aalisakkat tunineqarnerminni akiisa appariarsinnaanerata aningaasatigut kinguneqaatai suleqatigiissitap nassuiassavai, taamattaarlu aalisagaqatigiiaanut agguarlugu akinik sanillersuussineq piffissami sivisunerusumut, soorlu ukiunut qulinut, takussutissiussaaq.

 

Suliniutaasinnaasunulli kaammattuutit atuukkallartuutinneqassapput taamatullu COVID-19-p tunillaassuunneranut toqqaannartumik attuumassuteqartussaallutik. Aalajangerneq paasissutissanik uppernarsarneqartunillu toqqammaveqarluni pissasoq anguniagaavoq.

 

Suleqatigiissitaq allakkiaq inerniliussanik kaammattuutinillu uppernarsaasiisoq atorlugu Naalakkersuisunut nalunaarusiortussaavoq. Suleqatigiissitalli suliani suli naammassinngilai. KNAPK aallaqqaataaniilli suliamut akuuvoq, taamaammallu KNAPK-p siulittaasuata ulloq 15. august 2020 sioqqullugu qunusaaralunilusooq Naalakkersuisut inaarutaasumik isummernissaannik piumasaqarnera naleqquttuunngilaq.  

 

Naalakkersuisut siunnerfeqartumik isumaqatiginninniarnissaq kissaatigalugulu uppernarsaatinik toqqammaveqartumik iliuuseqarumapput, Naalakkersuisulli pinngitsaalineqartutullusooq ilillutik isumaqatiginninniarnernut peqataarusunngillat, taamatullu Naalakkersuisut tusagassiuutit aqqutigalugit isumaqatiginninniarnernut peqataarusunngillat. Tamanna tunuliaqutaralugu KNAPK suliassamik isumaqatigiissutigineqartumik suliaqarnissaanik, qulaajaanerullu aallartinneqareersup naammassinissaanut suleqataanissamik kaammattorumavarput. 

 

Naggasiullugu ikiorsiissutaasinnaasunik isumaliutit inuiaqatigiit aningaasaqarnerlu aallaavigalugit pisussaanerat Naalakkersuisut erseqqissaatigiumavaat.

 

 

Inussiarnersumik inuulluaqqusilluta

 

 

 

Vittus Qujaukitsoq                                      Jens Immanuelsen

Aningaasaqarnermut Naalakkersuisoq          Aalisarnermut, Piniarnermut Nunalerinermullu Naalakkersuisoq 

 

 

 

Attaveqarfissaq:

 

Naalakkersuisup allattaa Samo Jakob Nielsen

Toqq/direkte 345677