Filmit sisamat soraarnerussutisiassannut paasititseqataassapput

Inatsisartut pinngitsoorani soraarnerussutisiaqartussaatitaaneq pillugu inatsit 2016-imili akuersissutigimmassuk innuttaasut ilarparujussuisa soraarnerussutisiassat pillugit malittarisassat nutaat arlalitsigut unammilligassaqartippaat. Taamaattumik soraarnerussutisiat pillugit filmik sisamanik Akileraartarnermut Aqutsisoqarfik suliaqarpoq, taamaalilluni innuttaasut paasilluarnerussammassuk qanorpiaq iliussanerlutik.

”Nuannaarutigaara Akileraartarnermut Aqutsisoqarfik innuttaasunut nutaamik pissanganartumillu periuseqarluni paasititsiniaanissamut aallarniimmat, taamaalilluni innuttaasut amerlanerusut soraarnerussutisiassaminnik akilersuilerunik neriunnarluni amerlanerit paasissagaat qanorpiaq iliuuseqassanerlutik”, Taama naammagisimaarluni oqarpoq Aningaasaqarnermut Naalakkersuisoq Vittus Qujaukitsoq, aammalu soraarnerussutisiassanut aaqqissuussaqarnissap pingaaruteqarnera erseqqissaatigalugu:

”Soraarnerussutisiassanut aaqqissuussinerup ataasiakkaat aaqqissuussinermik peqannginnermit toqqissisimanarnerujussuarmik utoqqalinissamut qulakkiissassavai. Taamaattumik sapinngisamik innuttaasut amerlasuut soraarnerussutisiassanut aaqqissuussinermut akilersuisilerniarneqarput. Pinngitsoorani soraarnerussutisiaqarnissamut inatsit tamatuminnga qulakkeereqataassaaq”.

Akileraartarnermut Aqutsisoqarfiup pinngitsoorani soraarnerussutisiaqarnissaq pillugu filmiliai sisamat sammisanik makkuninnga imaqarput:

  • Naatsumik oqaatigalugu inatsimmik ilisarititsipput qanorlu aqunneqarnissaa takutillugu, tamatumani pisut assigiinngitsut pingasut takutillugu qanoq kikkut tamarmik inatsimmut ilaatinneqartut namminneq soraarnerussutisiassaminnik ileqqaaruteqassanersut.
  • Kikkut ilaatinneqarpat? Filmimi oqaluttuarineqarpoq suliffeqarnermi kikkut ilaatinneqarnersut aammalu innuttaasut ataasiakkaat qanoq annertutigisumik ileqqaaruteqassanersut naatsorsornissaanut isertitat suut ilaatinneqarnersut.
  • Ukiumoortumik nalunaarsukkat takutippagu annertunerusumik ileqqaaruteqassasutit tassani sooq illit innuttaasutut soraarnerussutisiassannut annertunerusumik akiliisassanersutit ukiumoortumik nalunaarsukkat takutissavaat.
  • Akiliisarneq uppernarsaasiisarnerlu innuttaasut soraarnerussutisiassanik ukiuni kingullerni akiligassat akilernissaannut sapaatip akunnerisa sisamat kingulliit akiliisinnissaannik siunnerfeqarput.

Filmit taakku sisamat imarisaanni apeqqutit Akileraartarnermut Aqutsisoqarfiup innuttaasunut sullissiviata akulikitsumik tusartagai tunngavigineqarput. Pinngitsoorani soraarnerussutisiassat pillugit kalaallisut danskisullu Akileraartarnermut Aqutsisoqarfik saaffigineqartarmat filmit danskisuunngorlugit aamma suliarineqarput. Taakku danskisuunik assiliartaqarlutillu danskisuunik allannilersorneqarsimapput.

Filmit aka.gl-imi takuneqarsinnaapput – aammalu sap. ak. 34-mit sullissivik.gl-imi takuneqarsinnaallutik.

Sukumiinerusumik paasisaqarusuttut Aningaasaqarnermut Naalakkersuisoqarfimmi attaveqatigiinnermik suliaqartoq Martin Christiansen sianerfigalugu attavigisinnaavaat normu: 34 52 13, imaluunniit e-mailikkut: MCHR@nanoq.gl