Allaffissornikkut sulisunik Nukissiorfiit soraarsitsinissaat unitsikkallarneqarpoq

Nukissiorfiit digitaliusunik aaqqissuussutinik amerlanerusunik sullitaminut atugassaqartitsilernissamik kissaateqarnerisa kingunerisaanik Nukissiorfiit siumoortumik nalunaarsimapput allaffissornikkut sulisut akornanni soraarsitsisoqassasoq.

Naalakkersuisut pilersaarutaasutut sullitanut digitaliusumik aaqqissuussiniarnerup kingunerisaanik Nukissiorfinnut piumasarisimavaat allaffissornikkut sulisunik soraarsitsinissap qanoq ingerlanneqarsimanera pillugu nassuiaasiortoqassasoq, Nukissiorfiillu tamatumunnga atatillugu ilisimatissimallugit soraarsitsinissanik suliat unitsinneqarallassasut.  

Nunanut Allanut Nukissiuuteqarnermullu Naalakkersuisoq Steen Lynge tamatumunnga atatillugu imatut oqaaseqarpoq:  

Naalakkersuisut atuisartunut erngup kiassarnerullu sapinngisamik akikitsuunissai qularnaarneqarnissaat assut pingaartippaat. Taamaattumik Nukissiorfiit eqeersimaartumik suliniutigimmassuk anguniagaq taanna iluarisimaarnarpoq. Ajuusaarnarporli tamanna soraarsitsinernik kinguneqartussatut isikkoqarmat. Taamaattumik Naalakkersuisut sinnerlugit Nukissiorfiit qinnuigisimavakka nassuiaateqarfigissagaat suliap tamatuma qanoq ingerlanneqarsimanera, atorfeqartitsinermut atatillugu atugassarititaasut tamarmik eqqortumik ingerlanissaat qularnaarumallugu.”. 

Nukissiorfiit annertusisamik digitaliseeriisoqarnissaanik kissaateqarnerisigut sullitat pitsaanerusumik sullinneqalernissaat qularnaarneqassaaq, ilutigisaanillu nukiit pigisat pitsaanerusumik piujuaannartitsisumik iluaqutigineqarlutik  ingerlatsinermut ikaarsaariartortumi, tassaasoq Naalakkersuisut Nukissiuuteqarnermut Imermillu Pilersuinermut Immikkoortumi Anguniagaanni qitiusumi, atorluarneqassallutik.  

Annerusumik paasisaqarniartut attavigissavaat ministersekretær Jens-Christian Jacobsen oqarasuaammi 56 52 54 imaluunniit mail jech@nanoq.gl