Siunnerfiusut pillugit ataatsimoorussamik oqaaseqaat, qarasaasiatsigut paasissutissiisarnikkullu sillimaniarneq pillugu atsiorneqarpoq

Danskit illersornissamut ministeriata Trine Bramsen-ip Nuummut tikeraarneranut atatillugu Illersornissamut ministerip naapippai Ineqarnermut Attaveqaqatigiinnermullu Naalakkersuisoq Karl Frederik Danielsen, aamma piffissami matumani Ilinniartitaanermut, Kultureqarnermut Ilageeqarnermullu Naalakkersuisuugallartoq, kiisalu Nunanut Allanut Nukissiuuteqarnermullu Naalakkersuisoq  Steen Lynge.

Ataatsimiinnissaq aallarnerlugu Nuummi sissaq sinerlugu aqqutikkut pisuttuaqatigiittoqarpoq, tassanilu Karl Frederik Danielsen aamma Trini Bramsen eqqartugassat assigiinngitsut pillugit oqaloqatigiipput, soorlu ilinniartitaaneq, timmisartut mittarfissaat kiisalu sillimaniarneq.  

Sissaq sinerlugu pisuttuaqatigiinneq, Hans Egede-p Illuanut ingerlaviusoq, -  naggaserlugu atsioqatigiittoqarpoq siunnerfiusut pillugit isumaqatigiissut  qarasaasiatigut ingerlatsineq aamma paasissutissiisarnikkut isumannaallisaaneq pillugit suleqatigiinnerup nukittorsarneqarnissaa pillugu imaqarpoq.

Siunnerfiusut pillugu ataatsimoorluni oqaaseqaat imaqarpoq digitaliseriinerup Kalaallit Nunaanni annertusiartornera ilutigalugu sillimaniarnikkut isumannaallisaarnernik aarlerinartut pillugit aaqqissuussisoqartariaqarneranik, digitaliseeriinermi atortulersuutit nutaanerpaat iluaqutigalugit aaqqissuussinikkut. Taamaattumik nunatsinni Naalakkersuisut aamma Danskit naalakkersuisuisa qarasaasiat iluaqutigalugit ingerlatsinermut sillimaniarnikkut aaqqissuussinertigut aamma paasissutissiisarnermullu tunngasutigut suleqatigiinnermik nukittorsaaniarput.

Siunnersuisut pillugit oqaaseqaat ilaqarpoq siunnersuisarnermik ilitsersuisarnermillu pisortanik, suliffeqarfinnik aammalu innuttaasunik, qarasaasiatigut saassunneqarsinnaanermik - taaneqartartumik cyberangreb – aalajaatsumik isumannaatsumillu pinaveersaartitsinissaq sakkortusisamik eqqarsaatigalugit, kiisa qarasaasiatigut saassussisoqarsinnaanerinik malinnaaveqarnissamik – isumannaallisaarnermik.

Siunnerfiusut pillugit oqaaseqaat aammattaaq allaaserinnippoq ataatsimut kissaataasumik  qitiusumik qarasaasiaqarnikkut sillimaniarnermik ingerlatsivik - Center for Cybersikkerhed - pillugu inatsisip Kalaallit Nunaanni atortuulersinneqarnissaanik. Tamanna pillugu inatsisissamut siunnersuut Inatsisartut ukiakkut ataatsimiinneranni sammineqassaaq.

Assut nuannaarutigaara ataatsimoorluta aallusseqatigiinnerput piumassusilimmillu aaqqissuulluakkamillu suleqatigiinnerput danskit naalakkersuisuilu qarasaasiaqarnikkut sillimaniarneq – cybersikkerhed - eqqarsaatigalugu. Naalakkersuisut kissaateqarput suliniutaasut annertusarneqarnissaannik qarasaasiaqarnikkut aamma paasissutissiisarnikkut sillimaniarneq eqqarsaatigalugit. Pisortat ingerlatsiviini, suliffeqarfinni aamma inuttaasut akornanni. Anguniagaq tamanna ilalersorneqarpoq ataatsimoortumik oqaaseqaammi aammalu Qarasaasiaqarnikkut sillimaniarneq pillugu qitiusumik ingerlatsivimmut atatillugu inatsisissatut siunnersuutikkut”, taama oqarpoq Naalakkersuisoq Karl Frederik Danielsen.

Naammagisimaarpara maanna periarfissaqaleratta qanimut suleqatigiissinnaanermut, qularnaarumallugu paasissutissat akunnitsinni tunniunneqartartut danskit naalakkersuisui peqatigalugit akunnitsinniiginnartussaaneri. Ilisimavarpummi nunarput aamma Issittoq annertusiartortumik alaatsinaanneqarmata. Tamatumani piumasaqaataavoq ataqatigiissaarinerup danskit naalakkersuisuisa aamma nunatsinni Naalakkersuisut akornanni annertusarneqarnissaa. Tamanna ataatsimoorussamik oqaaseqaatip aqqutissiuusseqataaffigissavaa. ”, taama oqaaseqarpoq Naalakkersuisoq Steen Lynge.

“Hackerit killigititaasunik ataqqinnittuunngillat. Taamaammat Kalaallit Nunaata Danmarkilu peqatigiillutik qarasaasiaqarnikkut sillimaniarnerup annertuusaaviginera pitsaasuullunilu pingaaruteqarpoq, taamaallillunimi inuiaqatigiit kalaallit qaffasissumik illersugaassapput. Nuannaarutigaara inatsit qitiusumik qarasaasiaqarnikkut sillimaniarnermik ingerlatsivimmut, Center for Cybersikkerhed-mut tunngasoq atuutsilersinnissaa sulissutigineqarmat. Tamanna qitiusumik qarasaasiaqarnikkut sillimaniarnermik qitiusoqarfiup Kalaallit Nunaanni ikiuunnerulernissaanik isumaqarpoq – pinaveersaartitsissaaq qarasaasiakkullu saassussisoqarpat ikiuisinnaalissalluni” Trine Bramsen oqarpoq.

Annerusumik paasisaqarniartut attavigisinnaavaat: ministersekretær, Rosa Thorsen, +299553303  rosath@nanoq.gl aamma ministersekretær, Jens Christian Jacobsen, +299565452 jech@nanoq.gl, kiisalu tusagassiinermut allatsi Kristian Hedegaard, +4561871552 khe@fmn.dk