Terianniat Ilulissat eqqannguanniittut

Terianniat qaninnguussanngilasi, Ilulissani uumasut nakorsaat kajumissaarivoq

Terianniat perlileramik Ilulissat eqqannguanniilersimapput. Terianniat perlerortillutik inunnut nujuillisarput.  

- Inuttaasut kaammattorusuppagut teriannianut qanillattoqqunagit. Terianniamik perlerortumik kiitikkuit peqqinnissaqarfimmut erngerlutit saaffiginnissaatit, kiitinnerit salinneqarlunilu suliarineqassammat, uumasut nakorsaat Sanne Eline Wennerberg, Ilulissat, erseqqissaavoq.

Terianniat perlerortut saassusimatuujupput, paatsiveerussimaartuusarlutik aamma nuffiortarlutik. Terianniaq perlerunngitsoq inunnut qaninngoorneq ajorput, nujuartuusarpoq, qimaaniartarlunilu – terianniaq perlerortoq inunnut qunugisaaruttarluni.

Avannaata kommuniata iliuusia pitsaasuuvoq terianniat aallaallugit toquttarmagit, tamannalu ingerlattuartussaallugu. Terianniamik naammattuuiguit kommunimut politiinulluunniit attaviginnissaatit.

Apeqqutissaqaruit uunga e-mailersinnaavutit Uumasut nakorsaqarfia inuussutissalerinermullu oqartussaqarfik: uumasut@nanoq.gl