Katersuunnissamut il.il. killilersuutaagallartut sivitsorneqarput

Naalakkersuisut katersuunnissamut il.il. killersuugallartut pillugit nalunaarummi iluarsiissuteqarput aammalu 31. januar 2021-p tungaanut sivitsuillutik.

Nalunaarummi iluarsisami peqqissutsimut tunngavissat tunngaviusut nalunaarummut atuuttumut sanilliullutik allannguuteqanngillat.

Kisiannili ataasiakkaanik erseqqissaateqartoqarpoq, aajukulu eqqumaffigisassatit.

  • Namminersortut pisortallu ulluunerani neqeroorutaannut, atuarfinnut, ilinniarfinnut il.il. atuutinngillat.
  • Aaqqissuussinernut kommuninit allanit peqataaffigineqartunut inerteqquteqarnermut manna aaqqissuussinerit nunanit allanit peqataaffigineqartut ilaalerput.
  • Aaqqissuussinernut nunanit allanit peqataaffigineqartunut inerteqquteqarneq aamma pikkorissartitsinerit, isumasioqatigiissitsinerit assigisaallu ilaapput. Namminerisamik kommunip killeqarfiisa iluini tamanut ammasumik killilersuiffiusumik aaqqissuussisoqarsinnaavoq. Inunnik kommuninit allaneersunik peqataasoqannginnissaata, tamatumunngaluunniit kajumissaarisoqannginnissaata qulakkeerneqarnissaa aaqqissuussisup akisussaaffigaa.
  • Suli avataaniit ilinniartitsisoqarluni pikkorissartitsisoqarsinnaavoq, aatsaat peqataasut kommunimit ataatsimeerpata.
  • Tamatuma saniatigut inini, ikuallattoornissamut oqartussaasunit akuerisaanngitsuni annerpaamik inuk ataaseq naqqup annertussusianut 4 m2-mut ataatsimut akuerisaavoq.
  • Amerlassusissanut killiliinerit suli atuupput. Illup iluani aaqqissuussinermi isersimasinnaasut annerpaamik 50%-iisa inimi isersimasinnaanerinut maleruagassat malinneqarpata, inuit amerlanerpaamik 100-t isersimasinnaapput. Silami aaqqissuussinerni inuit amerlanerpaamik 250-iusinnaapput.
  • Nalunaarut 31. januar 2021 ilanngullugu atuutissaaq

Sukumiinerusumik paasisaqarusuttut attavigisinnaavaat Coronamut tunngassutilinnik attaveqatigiinnermut akisussaasoq Emil Stach attavigsinnaavaat: 34 67 23-mut sianerlutik imaluunniit e-mailikkut: stach@nanoq.gl