Meeqqanut inuusuttunullu suliniutit Naalakkersuisut salliutippaat

Meeqqanut inuusuttunullu toraagaqartunik suliniutinut decembarimiilli 31 mio. kr.-inik Naalakkersuisut immikkoortitsisimapput. Meeqqanut inuusuttunullu aarlerinartorsiortunut suliniutit patajaallisarneqarnissaannut, angajoqqaat meeqqaminnik sumiginnaasarnerat akiorniarlugu iliuusissanut pilersaarutip aamma isumaginninnermi suliassaqarfimmi sulianik suliarinnittarnermut nunami tamarmi atortoqalernissap suleqatigiissutigineqarnerannut aningaasaliissutit taakku ilaapput.

Ulluni kingullerni Naalakkersuisut tulleriiaarinerat apeqquserlugu aviisini ilanngussisoqartarpoq, soorlu aamma meeqqanut inuusuttunullu aarlerinartorsiortunut sumiginnagaasunullu suliniuteqarnernut sipaarniuteqarnerarlugit Naalakkersuisut isornartorsiorneqarsimasut.

Meeqqanut toqqaannartumik suliniuteqarnerup patajaallisarneqarnissaanut Naalakkersuisut 20 mio. kr.-inik immikkoortitsisimapput. 11 mio. kr.-it sinneruttut nunami kommunit tallimaasut peqatigalugit ataatsimoorussamik IT-mik ataqatigiimmik aaqqissuussinissamut ilaatigut atorneqarput. Meeqqanut aamma ilaqutariinnut suliassaqarfimmi IT-mik ataqatigiimmik aaqqissuussinerup assigiiaamik sulianik suliarinnittoqarnissaa peqataaffigissavaa.

Aalisarneq pillugu Ataatsimiititaliarsuarmut ingerlatsinermut sillimmatinit aningaasaliissutinik qinnuteqartoqarnera Sermitsiaq AG-mi aviisimut ilanngutassiami isornartorsiuinermi tunuliaqutaavoq, taakku ilaatigut meeqqanut inuusuttunullu aarlerinartorsiortunut atorneqarnissaat eqqarsaatigineqarsimanerarneqarlutik. Kisianni meeqqanut aarlerinartorsiortunut aningaasaliissutit pillugit ingerlatsinermut sillimatit attuumassuteqarunnaarnikuupput, tassami aamma ingerlatsinermut sillimmatini immikkoortinneqarsimasunit 7,5 mio. kr.-iusunit amerlanerusunik aningaasaliisoqarneratigut aningaasaliissutit taakku atugassanngortinneqareernikuupput. Meeqqannut inuusuttunullu aarlerinartorsiortunut suliniuteqarnernut tassa 2019-imi decembarimi 20 mio. kr.-it aningaasaliissutigineqarnissaat Naalakkersuisut akuersissutigitippaat. Suliassaqarfimmut Folketingip 80 mio. kr.-inik aningaasaliinerannut ilassutitut 20 mio. kr.-it taakku immikkoortinneqarput. Taakku 2020-mut aningaasanut inatsisip akuersissutigineqarnerata kingorna taamaalillutik aningaasaliissutigineqarput.

20 mio. kr.-it taakku saniatigut kingusinnerpaamik 5. juni isumaginninnermut suliassaqarfimmi nuna tamakkerlugu sulianik suliarinnittarnermut ataqatigiimmik aaqqissuussinissamut 11 mio. kr.-inik aningaasaliissuteqarnissaq Naalakkersuisut akuersissutigitippaat.

Paasisaqarnerorusukkuit ministerip allattaa Inger Heilmann Larsen ugguuna ihla@nanoq.gl-ikkut imaluunniit tlf. + 299 554160 atorlugu attavigiuk