Covid-19: Tunillaassortoqannginnissaanut periuserineqartumi anguniagaq pingaarutilik anguneqarpoq

Namminersorlutik Oqartussat misiligutinut atortorissaarutissatut maskiinanik tallimanik nutaanik pisipput, taakkulu Covid-19-imik tunillatsittoqarsimaneranik misissuinermi sukkanerusumik akissutissarsissanganissamut iluaqutaassapput. Taakku maskiinat periusissiaq naapertorlugu Qaqortumi, Sisimiuni, Aasianni, Ilulissani Tasiilamilu inissinneqassapput, taakkunanngalu sisamat atulereerput. Nuummi april 2020-mili Covid-19-imut laboratoriami misissueqqissaartoqarsinnaalereerpoq.

Peqqissaavinni sulisut maskiinanik ikkussuinerup nalaani maskiinat piginnaasaat pillugit pikkorissarneqareerput. Taakku maskiinat nutaat teknikki aalajangersimasoq atorlugu misiligutit amerlasuut sivikitsuinnarmik misissoqqissaarsinnaavai. Siunissami taakku misiligutinut maskiinat assersuutigalugu nualluutinut misissuutigineqarsinnaassapput.

Taakku maskiinat nutaat tunillaassortoqalissagaluarpat misiligutissat misissugassat amerlassusaannit pisariaqartinneqalersinnaasunit amerlanernik misissuisinnaapput.

Nanortalimmi tunillanneqarsimasutut paasineqartoq kingulleq maskiinamit nutaamit Qaqortumiittumit paasineqarpoq. Misiligutissaq sukkasuumik misissoqqissaarneqarpoq taamaaliornikkullu tunillaassuinaveersaartitsinerit aallartinneqapallanneqarsinnaasimallutik.

Namminersorlutik Oqartussat atortorissaarutit Amerikami suliffeqarfimmit Cepheid-imit pisiaraat. Amerikamiut Nunanut allanut ministeriaqarfiat aamma Københavnimi Amerikamiut Aallartitaqarfiat ikiortigalugit pisiarineqarput, ilanngullugu Kalaallit Nunaata Washington, D.C.-mi Sinniisoqarfiat.