Angalanissamut ikiorsiissutit takornariartitsinernut atatillugu ikiorsiissutinut aaqqissuunneqareersunut ilalersuutaassapput

Angalanissamut ikiorsiissutinik aaqqissuussineq Naalakkersuisunit pilersinneqarpoq, taakkualu COVID-19-ertoqarneranut atatillugu takornariaqarnerup iluani kingunerluutinut ikiorsiissutissatut pilersinneqarnikuupput.

Naalakkersuisut marsi 2020-miilli ikiorsiissutit pilersimmatigit arlaqartut qinnuteqareersimapput ikiorsiissutinillu pisimallutik. Maannakkumullu inuussutissarsiuteqarfiit assigiinngitsut 42 mio. Kr.-it missaannik pissarsisimallutik.

Ikiorsiissutinik pissarsisimasut takornariartitsinernik suliaqartuunerupput.. Tamatumunngalu pissutaavoq suliffeqarfiit tamakkua COVID-19-ip kingunerisaanik annertuumik aningaasarsiornermikkut eqqorneqartarnerat. Taamaattumik Naalakkersuisut upernalernerani ikiorsiissutinik aaqqissuussinerit takornariartitsinernik inuussutissarsiortunut immikkut siunnerfilersugaasut pilersippaat, COVID-19-imut akikillisaataasunik aaqqissuussinernik akunnittarfinni unnuinernut aammalu misigisassarsiorluni angalaartitsinernut imaqartut.

Takornariartitsinernik ingerlatsisartunut ikiorsiissutit pilersinneqareersut suli ilalersornerujumallugit Naalakkersuisut Sulisitsisunik, SIK-mik, NUSUKA-mik aamma KNAPK-mik allanillu oqaloqateqartareerlutik maanna nunatsinni angallassinernik ingerlatsisuusunut siunnerfeqartunik angalasunut akikillisaatinik aaqqissuussinerit pilersippaat.

Angalasunut ikiorsiissutit nutaat
Angalasunut ikiorsiissutinik aaqqissuussinerup nutaap nunatta iluani angalasunut billetit akiinik akikinnerulersitsinissamik siunertaqarput, ikiorsiissutillu iliuuserineqartut allat assigalugit piffissalerneqarsimallutik.
Taamannak aaqqissuussinerup kingunerisaanik naatsorsuutigineqarpoq takornariartitsinermik suliaqartut suliassaarnerulissasut, tassunga ilanngullugu akunnittarfiit neriniartarfiillu inuussutissarsiorfiillu pineqartut aamma ilungersunartorsiorfimmi tapersersorneqassapput.

Taamaasilluni ikiorsiissuteqarnerup kingunerissavaa Kalaallit Nunaanni illoqarfinni nunaqarfinnilu angallanenrup iluani Namminersorlutik Oqartussat tapiissuteqarneratigut COVID-19-imut akikillisaasoqarsinnaanissaa.

Nunatsinni angalasut maanna periarfissartilissavaat angalatitsisut ataasiakkaat aqqutigalugit COVID-19-imut akikillisaqarnersoq.

Malittarisassat pillugit annertunerusunik paasisaqarusukkuit tulliuttoq misissorsinnaavat: www.big.gl

Inuussutissarsiornermut Aatsitassanullu Naalakkersuisoq Jens-Frederik Nielsen imatut oqaaseqarpoq:
” Uanga inuussutissarsiortut namminneq pisuussutiginngisaminnik coronamik peqquteqarlutik ajornartorsiuteqalersut assut iliuuseqarfigerusuppakka. Tamatta nalunngilarput takornarialerisut eqqugaarujussuarnerat. Ilami assut eqqugaasimapput. Naalakkersuisut ikiorsiiniarnikkut aaqqissuussinerit arlaqartut maannamut pilersereersimavaat, kisianni suli annerusumik iliuuseqartariaqarluta nalilersimavarput. Taamaattumik nuannaarutigaara ullumikkumiit aallartittumik illoqarfiit nunaqarfiillu akornanni angalanernut tapiissuteqarsinnaalernerput. Neriuppunga periarfissiinerput atorluarlugu innuttaasut nunatsinni piffiit kusanaqisut tikissimanngisatik alakkartissagaat.
Ikiorsiissuteqarnerput innuttaasunut periarfissiilluarpoq illoqarfinnilu takornarialerisunut tapersiilluni.”


Brian Buus Pedersen, GE-mi pisortaaneq, Jess G. Bertelsen, SIK-p siulittaasua Gerth Lynge NUSUKA-mi siulittaasoq aaqqissuussineq pillugu ima oqaaseqarput:
”Coronap ajornartoortitsinera naatsorsuutigineqartuniit annertunerusunik arlaqarnerusunik kingunerlutsitsivoq. Inuussutissarsiortuniit nalunaarutaasartut takutippaat takornariartitsinermik ingerlataqartut aasaq manna annertuumik eqqugaasut. Taamaattumik takornariaqarnerup iluani iluaqutaasinnaasumik Naalakkersuisut suleqatigalutigit aaqqissuussineq nutaaq pilersissinnaagatsigu nuannaarutigaarput.”

Angalasunut ikiorsiissutinik aaqqissuussinerit ullumikkumiit angalatitsisunut atuutilerput. Angalatitsisartullu ullumikkumiit Namminersorlutik Oqartussanut isumaqatigiissuteqarsinnaalerlutik tapiissuteqarfigineqartarnissamik piffissami killilimmi, ikiorsiissutinik aaqqissuussinerit allat aamma atuuffigisaanni.

Ikiorsiissutinut atatillugu malittarisassat, isumaqatigiissutissatut missingersuusiat il.il. nassaarineqarsinnaapput inuussutissarsiortut quppersagaanni uani www.big.gl.

Annerusunik paasisaqarusuttut ukununnga innersuunneqarput:

  • Inuussutissarsiornermut Aatsitassanullu Naalakkersuisoq Jens-Frederik Nielsen oqarasuaatikkut 345000
  • Jess G. Berthelsen, SIK-p siulittaasua oqarasuaatikkut 322133
  • Brian Buus Pedersen, Sulisitsisuni pisortaaneq oqarasuaatikkut 363710
  • Henrik Sandgreen, KNAPK-p siulittaasua oqarasuaatikkut 588192
  • Gerth Lynge, NUSUKA-mi siulittaasoq oqarasuaatikkut 485357