Nanortallip eqqaani umiarsuarmi tunillatsissimasoq ataaseq

Ilisimasassarsiortut umiarsuaanni inuk ataaseq tikinnerminiit ullut tallimassaanni misissortinnermut atatillugu COVID-19-imik tunillatsissimasoq paasineqarpoq. Inuk taanna ippassaq Nanortalimmi peqqissaavimmi misissortippoq, tassanilu ersiuteqanngilaq. Umiarsuaq maanna Kalaallit Nunaata kujataani immamiippoq.

Inuk ilisimasassarsiortut umiarsuaannut ilaavoq, aammalu Europamiit Island aqqusaarlugu nunatsinnut tikissimalluni. Pineqartoq nunatsinnut tikinnermini marloriarluni misissortikkami tunillatsissimanngilaq, kingullermillu tamanna Islandimi pisimavoq.

Ilaasut marluk inuttallu 15-it umiarsuarmiipput. Taakku tamarmik Nanortalimmi nalunaaquttap akunnerini marlussunni nunamut ikaarsimasimapput aammalu pingasunngorlutik agguarlutik tikinnerminniit ullut tallimassaanni Nanortallip peqqissaaviani misissortissimallutik. Umiarsuaq manna imaaniippoq, umiarsuarmiittullu qinnuigineqarput angalanerminnik unitsitseqqullugit aammalu innuttaasunut attaveqarnaveersaaqqullugit.

Nakorsaaneqarfik politiit suleqatigalugit umiarsuarmut issimasunullu tunngasunik, kiisalu tunillatsissimasumut qanillisimasinnaasut pillugit paasiniaaleruttorput.

Oqarasuaatikkut saaffiginnittoqassaaq

Corona pillugu Allattoqarfik suli SMS-inik, innuttaasunut oqartussaasut innersuussutaannik malinnittoqarnissaanik – qanillinaveersaarnissamik timikkullu attuinaveersaarnissamik – eqqaasitsissutinik nassiussuisarpoq.

Malunniuteqalernermi angerlarsimaffimmi mattuttoqassaaq peqqissaavimmullu ornigunnissaq pinaveersaarneqassalluni, tamatumunngalu taarsiullugu sianernissaq inassutigineqarpoq.

Sukumiinerusumik paasisaqarusuttut attavigisinnaavaat Coronamik suliaqartut allatseqarfiani attaveqaqatigiinnermut akisussaasoq Emil Stach attavigisinnaavaat oqarasuaatikkut +299 34 67 23-mut sianerlutik, imaluunniit allaffigalugu: stach@nanoq.gl