Suliniutiminik ilungersuussilluartartumut qujanaq

Naalakkersuisut siulittaasuata Kim Kielsen-ip Suka K. Frederiksen-imut eqqaaniutaa

Suka K. Frederiksen sivisuumik napparsimareerluni toqukkut qimagunneranik nalunaarut aliasungaarluta tusarparput.

 

Naalakkersuisut sinnerlugit Sukap uianut, qitornaannut, erngutaannut, ilaqutaannut, ikinngutaannullu misiginneqataavunga.

 

Suka ilumoortumik sorsuutiginnilluartartuuvoq. Sulilluartoq. Ukiorpassuunngitsuni naalakkersuinermik suliaqarpoq kisianni Suka kajumissuseqarluartuugami suliniuterpassuarnik naammassisaqarsimavoq ineriartornermullu sunniuteqarluni aamma innuttaasut nunallu ineriartortinneqarnissaat tamatigut siunertarisarpai.  Suliaq naammassineqaraangat taava ikinnerpaamik nutaanik marlunnik aallartitsereertarnera Sukamut ilisarnaataavoq.

 

Sukap Naalakkersuisuunermini suleqataalluartarnini aamma ilisarnaatigaa, nunatta tunngavissaminik nukittorsaajuarnissaata aammalu Naalagaaffeqatigiit taamatuttaarlu nunani tamalaani nunatta attaveqaqatigisartakkaminik ataavartumik suleqateqarnissaata pingaaruteqassusaannik pingaassusaannillu paasisimasaqarnermigut kajumissuseqarnera innuttaasut, suleqataasut sulisullu malugisarpaat.

 

Naak Suka napparsimagaluarluni suliniutiminik ilungersuuteqartuarsinnarpoq. Suka inuit sivisuumik aamma ataavartumik nappaatillit atugaasa pitsanngorsarneqarnissaannik sulilluarsimavoq. Naak Suka napparsimagaluarluni sivisuumik napparsimasut atugaasa pitsanngorsarneqarnissaannut nukissaqartuarnini ataqqinaatigisorujussuuaa.

 

Suka sulilluartuuvoq aamma siusinaartumik toqukkut qimagukkaluarluni nunatta nukittunerulernissaanut ineriartornissatsinnullu ataavartussanik malunniuteqarsimavoq, tamannalu pillugu ataqqinninnera takutikkusuppara,

 

Sukap eqqaaneqarnera ataqqinartuuli.