Naalakkersuisoq Steen Lyngep nunanut allanut ministeri Mike Pompeo ataatsimeeqatigaa

Juulip 22-anni 2020 Nunanut Allanut Nukissiuuteqarnermullu Naalakkersuisup Steen Lyngep amerikamiut nunanut allanut ministeriat Mike Pompeo ataatsimeeqatigaa.

Ataatsimiinneq Nunanut Allanut Ministerimit Jeppe Kofodimit Kultureqarnermut, Nunanullu Allanut Naalakkersuisumit Jenis av Ranamit peqataaffigineqartoq Københavnimi ingerlanneqarpoq.

Juulip 21-anni Steen Lyngep Jeppe Kofod Jenis av Ranalu ataatsimiinnissaq sioqqullugu piareersarnerminni naapippai. Tassani illuatungeriit siullermeerlutik ataatsimeeqatigiipput.

Ataatsimiinnissaq sioqqullugu piareersarluni naapinnermi Nunanut Allanut Nukissiuuteqarnermullu Naalakkersuisoq Steen Lynge erseqqissaavoq:
”Amerikamiut Kalaallit Nunaanni sakkutooqarnerat nunatsinnut inuiaqatitsinnullu pitsaanerpaamik iluaqutaanissaata qulakkeerneqarnissaa pillugu kinguneqarluartussamik oqaloqatigiinnerput nangissagipput neriuutigaarput.”

Mike Pompeop ataatsimeeqatiginerani Steen Lynge oqarpoq:
”Pituffimmi kiffartuussinissamut isumaqatigiissutip aaqqiivigineqarnissaa USA-mut attaveqarluarnissamut aqqutissaavoq. Aaqqiissutip akuerineqarsinnaasuunissaanut tunngavissat pingasut piviusunngortinneqassapput:
  • Pituffimmut pingaartumik attuumassuteqassaaq,
  • piviusorsiortuussaaq, tigussaasuussaaq malunnaataassallunilu,
  • aammattaaq siunissamut qulakkeerinnissaaq.”
Naalakkersuisoq Steen Lyngep Kalaallit Nunaata USA-llu akornamminni suleqatigiinnerat nutaajusoq nuannaarutigigini aamma ersersippaa, tamassumunngalu atatillugu oqarpoq:

”Suliniutinut aningaasaliissutigineqarniartut pillugit nunamik sanilerisamik ikinngummillu, nutaajusumik suleqateqarnerup nunatta aningaasaqarneranut ilinniartitaanermullu tunngasutigut ineriartorneranut pitsaasumik tapertaassaaq”.

Annertunerusumik paasisaqarusunnermi attavissaq:

Naalakkersuisoqarfiup pisortaa Kenneth Høegh, e-mail: kenh@nanoq.gl mobilnr.: +299 56 56 04