Suliamut attuumassuteqarpallaarnermut tunngatillugu maleruagassanik unioqqutitsinerunngitsoq

Advokatfirmaet Poul Schmith-imiit naliliineq: Naalakkersuisut siulittaausata ukioq manna nipisat suaannik pisassiissutit allanngortinneqarnissaannik aalajangeeqataanera suliamut attuumassuteqarpallaarnermut tunngatillugu maleruagassanik unioqqutitsinerunngitsoq

Advokatfirmaet Poul Schmith-ip naliliinera naapertorlugu, ukiumi matumani nipisat suaannik pisasssiissutit allanngortinneqarnissaannik aalajangiisoqarmat ataatsimut isigalugu aalajangiisoqarsimasoq, taamaaliortoqarneranilu Kalaallit Nunaanni innuttaasut ilaannut ikigisassaanngitsunut sunniuteqartumik aalajangiisoqarsimavoq:

Eqikkaallunga naliliivunga, Siulittaasup Naalakkersuisut ulloq 12. maj 2020 aalajangiineranni peqataanera, suliamut attuumassuteqannginnissamut maleruagassanik unioqqutitsinerusimanngitsoq. Paasissutissat pigineqartut tunngavigalugit taamaalillunga naliliivunga, Siulittaasoq aningaasaqarnikkut iluanaaruteqarsinnaanerup malitsigisaanik imaluunniit umiatsiamik attartortup ikinngutiginerata malitsigisaanik pisassiissutit sinneruttut 2019-imiit nuunnerisigut 2020-mut nipisaat suaannut TAC-inik allanngortitsinissaq pillugu aalajangiinermi  suliamut attuumassuteqarpallaarnermik malitseqartumik soqutigisaminik aallussisimanngitsoq,” taama allappoq Advokatfirmaet Poul Schmith, nangillunilu:

Tassunga atatillugu annertuumik pingaartippara ataatsimut isigalugu aalajangiisoqarsimanera, Kalaallit Nunaanni innuttaasut ilaannut ikigisassaanngitsunut sunniuteqartumik.”

Kim Kielsenip angalallamminik nalunngisaminut atukkiisimaneranut tunngatillugu, Advokatfirmaet Poul Schmith naliliivoq, aningaasat pissarsiarineqartut annerpaamik kr. 5.000,-nik annertussuseqarsimanissaat ilimagineqartariaqartoq, aammalu aningaasaqarnikkut iluanaaruteqarneq toqqaannartumik pisimanngitsoq:

Aningaasaqarnikkut Siulittaasup iluanaaruteqarsimaneranut tunngatillugu, pissarsiarineqartut annerpaamik kr. 5.000,-nik annertussuseqartut ilimagineqartariaqartoq, aammalu aningaasaqarnikkut iluanaaruteqarneq toqqaannartumik pisimanngitsoq, annertuumik pingaartippara. Tassunga atatillugu Siulittaasup umiatsiamik attartortitsinermini toqqaannartumik aningaasartuutigisimasai ilanngutinngilakka, tassami tamatumunnga paasissutissanik tigummiaqannginnama.”

Allakkiap eqikkarneqarnera una toorlugu atuarsinnaavat

Naalakkersuisut nipisattassanik qaffaanermik suliarinninnerannut atatillugu Naalakkersuisuni siulittaasup suliamut attuumassuteqarsimannginnera pillugu advokatfirmap allakkiaa tamakkiisoq(danskisut) una toorlugu atuarsinnaavat.

Sukumiinerusumik paasisaqarusuttut Naalakkersuisut Siulittaasuata Naalakkersuisoqarfimmi pisortaq Simigaq Broberg attavigisinnaavaat 34 50 00-imut sianerlutik,, imaluunniit e-mailikkut allaffigalugu: sbro@nanoq.gl