Uummannami umiarsuaaqqanut talittarfiup allineqarnissaanut ASN akuerineqarpoq

Naalakkersuisut 17. juuli 2020-imi Uummannami umiarsuaaqqanut talittarfiup allineqarnissaanut ASN-imut akuersissut tunniuppaat. Akuersissut Ineqarnermut Attaveqaqatigiinnermullu Naalakkersuisoqarfimmut tunniunneqarpoq. ASN-imut akuersissut avatangiisinut piumasaqaatinik, Uummannami umiarsuaaqqanut talittarfiup allineqarnissaanut atatillugu malinneqartussanik imaqarpoq. ASN-imut akuersissut ASN-imut nalunaarut, kiisalu tamanut ammasumik tusarniaaneq, 15. apriili 2020-miit 10. juuni 2020-mut ingerlanneqartoq tunngavigalugit nalunaarutigineqarpoq.

ASN sunaana?
ASN Avatangiisinut Sunniutissanik Naliliinernik isumaqarpoq. ASN-imut nassuiaammi sanaartugassami suliassap avatangiisinut kingunerisassai tulleriiaarlugit allaaserineqarnerinik imaqarpoq. Nassuiaat aamma suliniutissanut, avatangiisinut kingunerluutaasussanut akiuiniarnermi atorneqartussanut siunnersuutinik imaqartussaavoq.

ASN-imut akuersissut sunaana?
ASN-imut nassuiaat tunngavigalugu sanaartugassami avatangiisinut sunniutissat akuersaarneqarsinnaanersut, kiisalu ASN-imut akuersissummi avatangiisinut kingunerisassaasinnaasut akiorniarlugit suliassami avatangiisinut piumasaqaatit suut saqqummiunneqassanersut pillugu Naalakkersuisut isummertussaapput.

Inatsisit
ASN-imut suliassaqarfik ukunani maleruagassiuunneqarpoq:
  • Atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat nr. 5, 27. marts 2013-meersoq
  • Avatangiisit innarlitsaaliorneqarnissaanik Inatsisartut inatsisaat nr. 9, 22. november 2011-meersoq (kapitali 8).
Maalaaruteqarsinnaatitaaneq
Aalajangiineq pillugu maalaarutaasinnaasut kingusinnerpaamik 28. aggusti 2020-imi tiguneqareersimassapput, uani: Ilisimatusarnermut Avatangiisinullu Naalakkersuisoqarfik, Postboks 1614, 3900 Nuuk, imaluunniit pan@nanoq.gl.

ASN-imut akuersissut atuarneqarsinnaavoq, uani.

Annertunerusumik paasisaqarusunnermi attaveqarfissaq: Naalakkersuisoqarfimmi pisortaaneq Mette Skarregaard Pedersen, tlf.: 346476 aamma e-mail: mesp@nanoq.gl