Kalaallit Nunaanni akiliilluni aalisarneq 2020

Aalisarnermut, Piniarnermut Nunalerinermullu Naalakkersuisoqarfiup matumuuna takornarianut akiliilluni aalisarneq pillugu maleruagassat atuuttut aamma periarfissat erseqqissaatigissavai.

Kalaallit Nunaanni takornariatut imaluunniit tikeraartutut aalisarusukkuit aalisarsinnaanermut akuersissummik pisiaqarsimassaatit. Aalisarsinnaanermut akuersissummik Kalaallit Nunaaniitillutit Kalaallit Nunaannukartinnalluunniit pisisinnaavutit. Aalisarsinnaanermut akuersissutinik arlalinnik pisissaguit, taakku ataasiakkaarlugit pisiarisariaqassavatit. Aalisarsinnaanermut akuersissut giromut akiliiffissatut Allakkerisarfinniittarput allatullu aamma Aalisarnermut, Piniarnermut Nunalerinermullu Naalakkersuisoqarfiup kontoanut aningaaseriviit aqqutigalugit aningaasanik ikisinikkut akiliisoqarsinnaalluni.
  • Grønlandsbanken (Bank of Greenland).
  • Reg. normua: 6471 - Konto normua: 1002160
Aningaasanik ima amerlatigisunik ikisinikkut akiliissaatit:
A: Aalisarnissamut akuersissut nalunaaquttap akunnerinut 24-nut: DKR 75 koruunit.
B: Aalisarnissamut akuersissut sapaatip akunneranut: DKR 200 koruunit.
C: Aalisarnissamut akuersissut qaammammut: DKR 500 koruunit.

Aningaaserivikkut akiliinerpit uppernarsaatitaa pappiaraq aalisarsinnaanermut akuersissutitut nammineq atussavat. Taannalu aalisartillutit tamatigut nassartassavat.
Akiliuteqarneq ataani pineqartunik oqaasertalerneqarsimassaaq, aamma taakku illit uppernarsaatinni allassimassapput:
  1. Kinguliavit naqinnertai siulliit 9-t – soorlu Kristiansenitut “Kristians”.
  2. Ativit naqinnertai siulliit 3-t – soorlu Michaelitut “Mic”.
  3. Qaammatip aalisarsinnaanermut akuersissutip atuutilerfissaatut kissaatigisavit naqinnertai siulliit 3-t – soorlu juujitut “jul”.
  4. Ulloq siulleq aalisarsinnaanermut akuersissutip atuutilerfissatut kissaatigisat – soorlu ”21”.
  5. Assersuummi tassani oqaasertaliunneqartoq imaalerpoq: “Kristians mic jul 21”.
Akiliilluni aalisarnermut atatillugu eqqumaffigineqassaaq kooqarfiit ukua aalisarnermut koncessionikkut immikkut akuersissuteqarfiummata, taamaammallu takornariat imaluunniit tikeraartut piffinni pineqartuni aalisarusussappata taava koncession-qartunut saaffiginnittariaqassapput.

  • Kuussuaq Nuup Kangerluani Qussummiittoq – Nuuk Adventure.
  • Robinson River Angujaartorfimmiittoq – Albatros Arctic Circle.
  • Qooqqut Kangia-niittoq – Major Hunting.
  • Eqalussussuit Isortumiittoq – Sirius Greenland.
  • Erfalik Kangerlussuup aamma Itilliup akornanniittoq – Sirius Greenland.
  • Napiarissat Kangerlussuup aamma Itilliup akornanniittoq – Sirius Greenland.
  • Sassannguit Kangerlussuup aamma Itilliup akornanniittoq – Leif Fontaine.
  • Ipiutaq Guest Farm Narsap eqqaaniittoq.
Paasissutissanik suli allanik, uani taaneqanngitsunik pissarserusukkaanni Aalisarnermut, Piniarnermut Nunalerinermullu Naalakkersuisoqarfimmut saaffiginnittoqarsinnaavoq, e-mail: apnn@nanoq.gl

Sukumiinerusumik paasisaqarusukkaanni immikkoortortaqarfimmi pisortaagallartoq Nuka Møller Lund attavigiuk, oqarasuaat 34 53 45, e-mail: numl@nanoq.gl.