Peqqinnissaqarfik pillugu oqaloqatigiinnissaq naatsorsuutigisanillu naligiissaarinissaq ataatsimut kissaataapput

Anna Wangenheimip Peqqissutsimut Naalakkersuisutut angalanermini siullermi tikeraarpai Ilulissat Uummannarlu kiisalu nunaqarfiit, Ilimanaq, Qeqertaq, Saqqaq, Qaarsut, Niaqornat, Ukkusissat, Saattut,Ikerasak-lu. Angalanerup ilaatigut siunertaraa nunap immikkoortuani peqqissaaveqarfiit assigiinngitsut takuniarnissaat aammalu peqqinnissaqarfimmik suleqateqarneq eqqarsaatigalugu unammilligassat pitsanngorsaanissamullu siunnersuutissat pillugit soqutigisaqaqatigiinnik assigiinngitsunik oqaloqateqarnissaq.

Sulisussarsiorniarnermi unammilligassat sulisullu akulikitsumik taarseraattarnerat illoqarfinni nunaqarfinnilu ataatsimeeqateqarnerni sammineqarput.
Nunaqarfinni peqqissaanermik sulisunut taartissanik pissarsiniarneq ajornakusoorpoq, pikkorissarnerit akulikinnerunissaat aammalu nunaqarfimmi sulisut ataasiakkaat kiserliunnginnerunissaannut iliuusissatut kissaatigineqarput.

Anna Wangenheim oqarpoq: ”Interneti ungasianillu nakorsiartitsissut atorlugit misilittakkanik avitseqateqarnissamut aammali internetikkut pikkorissarnerni peqataasinnaanermut periarfissat pitsaasut pilersinneqarput. Tamanna pillugu kissaatip ingerlateqqinnissaa neriorsuutigaara aammalu peqqissaanermik suliaqartut ilinniartinneqarnerannut innuttaasullu peqqinnissaqarfimmut isersinnaanerannut iluaqutaasumik internetikkut periarfissanik atorluaanerunissarput anguniarlugu suliniuteqassallunga”.

Innuttaasut peqqinnissaqarfiullu akornanni naatsorsuutigisat qanoq naligiissaarnerulersinneqarsinnaanerat ataatsimiinnerni aamma sammineqarpoq. Innuttaasut peqqinnissaqarfiullu oqaloqatigiinnerunissaat pisariaqartinneqartoq innuttaasut nunatsinni peqqinnissaqarfimmi misigisaat pillugit nalunaarusiap takutippaa.

”Peqqinnissaqarfimmi sulisut innuttaasullu tamarmik attaveqatigiinnerup pitsaanerulersinnissaa soqutigilluarmassuk assut nuannaarutigaara. Taamaaliornikkut peqqinnissaqarfik pillugu iluarinninnatik isummersuutit amerlasuut pinaveersaartinneqarsinnaapput”.

Peqqinnissaqarfik Avannaani nunap immikkoortuani aqutsisut atuisunut siunnersuisoqatigiinnik maanna pilersitsiniarput, tamatumani innuttaasut peqqissaanermillu suliaqartut oqaloqatigiiffeqalernissaat anguniarneqarluni, tamatumani unammilligassat pillugit paaseqatigiinnerulertoqarsinnaallunilu napparsimasunut iluaqutaasumik aaqqiissutissatut siunnersuutinik atorluarneqarsinnaasunik nassaartoqarsinnaalluni.

Siuliani taaneqartut saniatigut ataatsimiinnerni amerlasuuni taakkunani ikiueqqaarnermik pikkorissarnissamik pisariaqartitsineq, uummammik aallartisaatit amerlanerit, illoqarfinni nunaqarfinnilu erngup ipiitsuunissaata pingaaruteqarnera, sulisunik atorfinitsitsinermi atugassarititaasut il.il. eqqartorneqarput.

Annertunerusumik paasissutissat: Frederik Siegstad, tlf. 233993, frsg@nanoq.gl