Nunatsinnut angalaneq pillugu nalunaarut nutaaq

Nunatsinnut angalaneq pillugu nalunaarut nutaaq ullormi 21. julimi atuutilissaaq maannakkuugallartumillu 31. december 2020-p tungaanut atuutissalluni - taamatuttaaq katerisimaartarnernut killilersuigallarnerit pillugit nalunaarutip atuuffia 31. decemberimut atuuttussanngorlugu sivitsorneqassaaq.

Nunatsinnut angalanermi nalunaarummi nutaami pingaarnertut allannguutit tassaapput:
  • Umiarsuarnut timmisartunullu atuuppoq, umiarsuit takornarianik angallassissut ilanngullugit
  • Nunatsinnut tikissinnaasut amerlassutsikkut killilersorneqanngillat
  • Tikinnermiit angerlarsimaannaqqaarnissaq ullullu tallimaanni misissorteqqittarneq illoqarfinni qulini nunaqarfinnilu marlunni atuukkunnaassaaq - ilanngussaq takuuk.
  • Illoqarfinnut nunaqarfinnullu allanut angalassagaanni tikinnermiit ullut tallimaanni misissorteqqittarneq atuutiinnassaaq. Angalasut taakkua illoqarfinni ilanngussami taaneqartut arlaanni akunnikkallassapput misissorteqqinnikkut tunillatsissimannginnerisa uppernarsinissaata tungaanut, imaluunnit ulluni 14-ini Kalaallit Nunaanniissimalernissaasa tungaanut.
Matumani taaneqartut attatiinnarneqassapput:
  • Nittartakkami nun.gl-imi innersuussutit allaqqasut malillugit nunatsinnut angalaneq sioqqullugu COVID-19-imik nappaateqannginneq uppernarsarneqassaaq
  • Angalaneq sioqqullugu Sumut-immersuiffissaq suli immersorneqartassaaq
  • Illup iluani amerlanerpaamik inuit 100-t silamilu amerlanerpaamik 250-it katersuussinnaanerannut killilersuinerit suli atuupput.
  • Inuit inimi amerlanerpaanissaat pillugu qatserisartoqarfiup akuerisai malillugit amerlanerpaamik affaannaanissaat sutortarfinnut suli atuupput.
Nunatsinnut angalasut illoqarfimmut nunaqarfimmulluunniit angalanersut apeqqutaatillugit angalanermut nalunaarummi nutaammi malittarisassat assigiinngillat. Illoqarfiit minnerit nunaqarfiillu aqunneqarsinnaanngitsumik tuniluunnermut immikkuullarissumik aarlerinartumik inissisimanerat pissutigalugu tamanna aalajangerneqarnikuuvoq. Taamaammat peqqinnissaq aallaavigalugu immikkuullarissumik iliuuserisat attatiinnarnissaat aammalu peqqinnissakkut innersuussutit malinneqarnissaat pingaaruteqarput.

Umiarsuarmik angalaarneq aamma nunanit allanit tikittut
Nunanit allaniit timmisartumut ilaallutik tikittut tamarmik qanermut qingamullu assiaquteqartassapput apuuffisaminut apuunnisami tungaanut, ullut 14-it sinnerlugit nunani ukunaniissimanngikkunik; Kalaallit Nunaat, Savalimmiut Islandilu. Umiarsuarmik angalasut Kalaallit Nunaata imartaanut iseqqusaanngillat, ullut 14-it kingulliit ingerlaneranni nunani allani tulassimappata.

Illoqarfiit qulit nunaqarfiillu marluk pineqartut tassaapput:

Kommuneqarfik Sermersooq
- Nuuk
- Paamiut

Qeqqata Kommunia
- Sisimiut
- Maniitsoq
- Kangerlussuaq

Kommune Kujalleq
- Qaqortoq
- Narsaq
- Narsarsuaq

Kommune Qeqertalik

- Aasiaat
- Qasigiannguit
- Qeqertarsuaq

Avannaata Kommunia
-Ilulissat