Tuttunniarnissamut umimmanniarnissamullu piniarfissat, piffissaliussat aamma pisassiissutit – Aasaanerani aamma Ukiaanerani 2020

Matumuuna aasaanerani ukiaaneranilu 2020-mi tuttunniarnissamut umimmanniarnissamullu piniarfissat, piffissaliussat kiisalu pisassiissutit aalajangerneqartut nalunaarutigineqarput. Tuttut aamma umimmaat ukiup qanoq ilinera najoqqutaralugu pitsaanerpaamik piniarneqartarnissaat APNN-imiit pingaartinneqarpoq. Taamaammat tuttut sapinngisamik aasaanerani ukiaaneranilu piniarneqartarnissaat aamma umimmaat aasaanerani, ukiaanerani kiisalu ukiuunerani piniarneqartarnissaat anguniarneqartarpoq.

Piniarfik 2-mi – Sisimiut-Kangerlussuaq – ukiuni arfineq-pingasuni kisitsisoqarnikuunani martsimi 2018-mi Pinngortitaleriffimmiit tuttunik umimmannillu pisortatigoortumik kisitsisoqarpoq. Piniarfik 3-mi – Akia-Maniitsoq – ukiuni qulingiluani kisitsisoqarnikuunani martsimi 2019-mi aamma taamatut kisitsisoqarpoq taamatullu Piniarfik 4-mi – Ameralik – ukiuni arfineq-marlunni kisitsisoqarnikuunani. Kisitsinerit tunngavigalugit Pinngortitaleriffimmiit nutaamik siunnersuisoqarpoq, taamaattorli aasaanerani aamma ukiaanerani 2019-mut sanilliullugu allannguutit annikitsuinnaapput.

Ivittuuni maajimi 2020-mi minnerpaaffiliinikkut umimmannik kisitsisoqarpoq tamannalu pillugu Ivittuuni pisassiissutit piniarnissamullu piffissaliussat nutaat aalajangerneqarlutik.

Tuttut
1. Piniarfik 2, 3, 4 aamma 5: Inuussutissarsiutigalugu tuttunniarneq 1. augusti-mi aallartissaaq 31. decembari ilanngullugu ingerlassalluni. Sunngiffimmi tuttunniarneq 1. august-imi aallartissaaq 31. oktobari ilanngullugu ingerlassalluni. Kulavaat norrallit norraat ilanngullugit piniaqqusaanngillat.
2. Piniarfik 1, 6, 7, 8 aamma 11: Inuussutissarsiutigalugu tuttunniarneq 1. august-imi aallartissaaq 15 oktobari ilanngullugu ingerlassalluni. Sunngiffimmi tuttunniarneq 1. august-imi aallartissaaq 30. septembari ilanngullugu ingerlassalluni. Kulavaat norrallit norraat ilanngullugit piniaqqusaanngillat.
3. Piniarfik 9 aamma 10 (Kangerluarsorujuk, Nuna Prudhoe aamma Nuna Inglefield): Inuussutissarsiutigalugu aamma sunngiffimmi tuttunniarneq 1. augustimi aallartissaaq 31. decembari ilanngullugu ingerlassalluni. Kulavaat norrallit norraat ilanngullugit piniaqqusaanngillat.
Tunngavilersuutit: Nuup aqutsiveqarfiani 2019-mi tuttunniarnissamut akuersissutit 3.152-it tunniunneqarput kisianni taamaallaat 442-it pisanik nalunaarutitalimmik utertinneqarlutik. Tamanna naammaginanngilluinnaqqissaarpoq tuttullu piniarfinni qanoq sakkortutigisumik piniarneqartarnerat qanorlu innerat APNN-imut Pinngortitaleriffimmullu nalileruminaappoq. Pisanik nalunaaruteqarneq inatsisit malillugit pisussaassutaammat inatsisit sukaternissaat APNN-imi sulissutigineqarpoq.

Erseqqissaatigineqarpoq kommunimiit tuttunniarnissamut akuersissutit marlukkaarlugit (piniarfinnut assigiinngitsunut marlunnut) tunniunneqarsinnaasut tamannalu inuussutissarsiutigalugu (akuersissummut ataatsimut tuttut qulit) aamma sunngiffimmi piniartunut (akuersissummut ataatsimut tuttut tallimat) atuuppoq. Akuersissummik pisanik naammaginartumik immersorneqartumik utertitsinikkut aatsaat akuersissummik nutaamik qinnuteqartoqarsinnaavoq. APNN-ip kommunit qanimut suleqatigalugit akuersissutinik utertitsisarneq malinnaaffigivaa. Pisanut nalunaarutit utertinneqartannginnerat akuersissummik qinnuteqaqqissinnaannginnermik kinguneqarsinnaavoq, takujuk §§ 19-20 aamma § 25 tuttunniarneq pillugu nalunaarummi aamma §§ 20-21 aamma § 26 umimmanniarneq pillugu nalunaarummi. Ajornerpaamik pisoqarneratigut piniarsinnaanermut allagartamik piffissami aalajangersimasumi arsaagaasoqarsinnaavoq.

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat tuttunik malersuinermi piniarnermilu atornissaat inerteqqutaammata.

Umimmaat
4. Aqutsiveqarfik Maniitsoq: Piniarfik 1-mi, 2-mi, 3-mi aamma 4-mi inuussutissarsiutigalugu aamma sunngiffimmi umimmanniarneq 1. augustimi aallartissaaq 15. oktobari ilanngullugu ingerlassalluni. Tiggaat tammajuitsussanik piniartitsinermut pisassiissutaasut aamma kulavaat norrallit norraat ilanngullugit piniaqqusaanngillat.
5. Aqutsiveqarfik Sisimiut: Inuussutissarsiutigalugu aamma sunngiffimmi killilimmik umimmanniarneq 1. augustimi aallartissaaq 15. oktobari ilanngullugu ingerlassalluni umimmattassiissutillu 400-put. Tiggaat tammajuitsussanik piniartitsinermut pisassiissutaasut aamma kulavaat norrallit norraat ilanngullugit piniaqqusaanngillat.
6. Umimmaqarfik Naternaq: Inuussutissarsiutigalugu aamma sunngiffimmi umimmanniarneq 1. august-imi aallartissaaq 15. oktobari ilanngullugu ingerlassalluni umimmattassiissutillu 120-ullutik. Ussuit Nunaat, Ipiutaarsuup Nunaa aamma Eqalummiut Nunaat umimmaqarfimmut Naternamut ilanngunneqarnikuupput. Tiggaat tammajuitsussanik piniartitsinermut pisassiissutaasut aamma kulavaat norrallit norraat ilanngullugit piniaqqusaanngillat.
7. Aqutsiveqarfik Qaanaaq: Piniarfimmi Kap Atholl-imi inuussutissarsiutigalugu sunngiffimmilu umimmanniarnissamut umimmattassiissutit 40-put. Piniarfimmi Nuna Inglefield aamma Nuna Prudhoe-mi inuussutissarsiutigalugu sunngiffimmilu umimmanniarnissamut umimmattassiissutit allannguuteqaratik 60-iupput. Tiggaat tammajuitsussanik piniartitsinermut pisassiissutaasut aamma kulavaat norrallit norraat ilanngullugit piniaqqusaanngillat.
8. Aqutsiveqarfik Ivittuut: Inuussutissarsiutigalugu aamma sunngiffimmi umimmanniarneq 1. augustimi aallartissaaq 15. augusti ilanngullugu ingerlassalluni. Minnerpaaffiliinikkut kisitsineq maajimi 2020-mi ingerlanneqartoq tunngavigalugu umimmattassiissutit 22-upput taakkulu tamarmik 1-2-ukiullit. Angutivissat arfineq-pingasut aamma arnavissat 14-it. Tiggaat tammajuitsussanik piniartitsinermut pisassiissutaasut aamma kulavaat norrallit norraat ilanngullugit piniaqqusaanngillat.
9. Aqutsiveqarfik Sigguk: Inuussutissarsiutigalugu aamma sunngiffimmi umimmanniarneq 1. augustimi aallartissaaq 15. oktobari ilanngullugu ingerlassalluni. Umimmattassiissutit allannguuteqaratik 150-iupput. Tiggaat tammajuitsussanik piniartitsinermut pisassiissutaasut aamma kulavaat norrallit norraat ilanngullugit piniaqqusaanngillat.
10. Aqutsiveqarfik Ittoqqortoormiit: Inuussutissarsiutigalugu aamma sunngiffimmi umimmanniarneq 1. augustimi aallartissaaq 15. oktobari ilanngullugu ingerlassalluni aammalu 10. novembarimiit 10. decembari ilanngullugu. Umimmattassiissutit allannguuteqaratik 115-iupput. Tiggaat tammajuitsussanik piniartitsinermut pisassiissutaasut aamma kulavaat norrallit norraat ilanngullugit piniaqqusaanngillat.
11. Umimmaat Ippatinut nunniussat (Nanortalik) Tasermiut qinnguani piniaqqusaanngillat.

Tunngavilersuutit: Aqutsiveqarfimmi Maniitsumi umimmanniarnerup Biologit inassuteqaataat malillugu aatsaat 15. august-imi aallartinnissaa tusarniutigineqartoq APNN-imit allanngortinneqarpoq 1. august-imi aallartittussanngorlugu, imm. 4 takuuk.
Qaanaap aqutsiveqarfiani Kangaarsummi (Kap Atholl) 2015-mi timmisartumik minnerpaaffiliinikkut kisitsereernerup kingorna inuussutissarsiutigalugu aamma sunngiffimmi umimmanniarnissamut pisassiissutit allannguuteqaratik 40-put, imm. 7 takuuk. Siggummi inuussutissarsiutigalugu sunngiffimmilu umimmanniarnissamut umimmattassiissutit allannguuteqaratik 150-iupput, 2016-mi tusarniaareernerup kingorna aalajangerneqartutut, kisianni piniarfimmi minnerpaaffiliinikkut kisitsisoqaqqinn-ginnerani qaffanneqaqqissanngillat, imm. 9 takuuk.

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat umimmannik malersuinermi piniarnermilu atornissaat inerteqqutaammata. Qamuteralaat, ATV-t kiisalu qulimiguullit atorlugit umimmannik ungoorinissaq immikkut APNN-imut qinnutigineqarsinnaavoq.

Piniarnermut allagartap 2020-mi 1. maaji sioqqullugu akilereersimanissaa pillugu piumasaqaat inuussutissarsiutigalugu aamma sunngiffimmi piniartunut atuutinneqarpoq.
Sunngiffimmi piniarnermut akuersissutit inunnut ukiut kingulliit qulit iluanni ataavartumik ukiuni marlunni Kalaallit Nunaanni najugalittut inuit nalunaarsorsimaffiannut nalunaar-neqarsimasunut taamaallaat tunniunneqarsinnaanerat pillugu piumasaqaat atuuppoq.

Paasissutissanik suli allanik, uani taaneqanngitsunik pissarserusukkaanni Aalisarnermut, Piniarnermut Nunalerinermullu Naalakkersuisoqarfimmut saafiginnittoqarsinnaavoq, e-mail: apnn@nanoq.gl

Sukumiinerusumik paasisaqarusukkaanni immikkoortortaqarfimmi pisortaagallartoq Nuka Møller Lund attavigiuk, oqarasuaat 34 53 45, e-mail: numl@nanoq.gl

Ilanngussaq 1: Nunap immikkoortuini piniarnissamut piffissat pisassiissutillu.
Ilanngussaq 2: Kalaallit Nunaata kitaani tuttunut Piniarfik 1-11.
Ilanngussaq 3: Kalaallit Nunaanni umimmaqatigiit.
Ilanngussaq 4: Maniitsup aqutsiveqarfiani umimmannik Piniarfik 1, 2, 3 aamma 4.
Ilanngussaq 5: Tuttunut Piniarfik 11 aamma Ivittuut.
Ilanngussaq 6: Umimmaqarfik Inglefield Land – Prudhoe Land.
Ilanngussaq 7: Umimmaqarfik Naternaq.