Sermitsiami ilanngutassiat marlunnut oqaaseqaat



Sermitsiaq.ag-mi nittartakkakkut allaaserisani ”Isumaginnittoqarfik sipaarniarnermit eqqugaanerpaasoq” kiisalu ”Aarit: Sipaarutiginiakkat 12 mio. koruuniniit 72 mio. koruuninut amerlineqarsimapput” kontuni pingaarnerni arlalinni teknikikkut aaqqigalliineq isumaginninnikkut eqquinerluttumik eqqarsaatigilluagaanngitsumik sipaarniutinngorlugu saqqummiunneqarpoq.
Tamannali sukumiisumik saqqummiussinerunngilaq. Kontuni pingaarnerni aalajangersimasuni aaqqigalliutissatut siunnersuutit Covid-19-p tunillaassuunnerani atuinikinneruffissatut naatsorsuutigineqartunik aallaaveqarput. Tamatumalu assersuutigalugu angalasinnaannginneq peqqutigalugu Namminersorlutik Oqartussani nalinginnaasumit annikinnerusumik atorfimmut atatillugu angalasoqartarneranik kinguneqarpoq. Tamatumalu saniatigut pisortat ingerlatsiviisa annertuut matoqqatikkallarneqarnerisa suliassat ingerlanneqartussatut pilersaarutigineqartut, pilersaarutigineqartutut ingerlanneqarsinnaannginnerat nassataraa. Taamaalillunilu sullissinerup ajornerulersinneqarnissaa siunertaanngilaq.

Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfiup saniatigut aaqqigalliissutit aamma Naalakkersuisut Siulittaasuata Naalakkersuisoqarfianut, Aningaasaqarnermut Naalakkersuisoqarfimmut, Nunanut allanut Naalakkersuisoqarfimmut, Aatsitassanut Naalakkersuisoqarfimmut, Ineqarnermut Attaveqaqatigiinnermullu Naalakkersuisoqarfimmut kiisalu Avatangiisinut Pinngortitamullu Naalakkersuisoqarfimmut attuumassuteqarput.

Naalakkersuisut Inatsisartut Aningaasaqarnermut Ataatsimiititaliaat aningaasaliissutissat allanngortinneqarnissaannik siunnersuummut isummeqqullugu qinnuigaa, Ataatsimiititaliallu maannakkorpiaq qinnuteqaat suliaraa. Ataatsimiititaliaq suliarinninnerminut atatillugu suliami inaarutaasumik aalajangiinissaq sioqqullugu paasissutissanik erseqqinnerusunik piumavoq.

Aningaasaqarnermut pissutsit maannakkutut inneranni Naalakkersuisut qinnuteqaataat akisussaassusilimmik piffissaagallartillugulu aningaasaqarnikkut aqutsinerannik ersersitsivoq, taamaalilluni aningaasat siunertarineqartunut atussallugit angumerineqarsinnaanngitsut, siunertanut allanut piviusunngortinnissaat suli angumerineqarsinnaasunut atugassanngortinneqarsinnaaqqullugit.

Tamannalu tupinnartuliaanngilaq.

Allaaserinnittoq Vittus Qujaukitsoq, Aningaasaqarnermut Naalakkersuisoq