Inissianik taartissanik Avannaata Kommunianut tunniussineq

Namminersorlutik Oqartussat Nuugaatsiami aamma Illorsuarni innuttaasunut, tassaarsuarmit eqqugaasimasunut inissianik taartissanik katillugit 40-nik, maanna naammassineqarsimasunik atorneqalersunillu sanatitsisuusimapput. Inissiat Illorput 2021 atorlugu sanaajupput, aammalu sumiiffinni innuttaasut siunissami najugaqarfissatut kissaateqarfigisaanni sanaajullutik, taamaattumillu Uummannamut, Saattunut, Ikerasannut aamma Ukkusissanut agguarlugit sananeqarput.

Innuttaasunut inaarutaasumik agguaanerup sapinngisamik eqaatsumik innuttaasullu qanillugit ingerlanneqarnissaa qulakkeerniarlugu, illut tamakkerlutik Avannaata Kommunianut tunniunneqarput.

Illut innuttaasunut tunniunneqarnerinut atatillugu kommuni illunut sanaqataaffiusunut taarsigassarsititsipput, taakkulu inatsit naapertorlugu taarsigassarsiaapput erniaqanngitsut akilersugassaanngitsullu, ukiut 20-t ingerlanerini annikillisikkiartuaarneqartussat. Tassalu kommunip innuttaasut qanillugit kiffartuussineqisumagaa, maleruagassat naapertorlugit uppernarsaatissat eqqortut suliarineqarnissaat ilanngullugit. Aamma kommuni inissianik piginnittuunermik innuttaasunut, inissianik taartissanik tunineqarnissamut pisinnaatitaaffeqartunut tunniussinissamut akisussaatinneqarpoq.

Inissianik taartissanik pingasunik kingullernik, Ukkusissani sananeqartunik tunniussisoqarpoq, taamaalillunilu atuilerneq sapaatit akunnerisa naaneranni naammassineqarluni. Tunniussinissaq 2019-imi novembarimili kinguaattoorpoq, tamatumunngalu nunaqarfimmi sananissamut pisinnaasunik amigaateqartoqarnera peqqutaavoq.

Ineqarnermut Attaveqaqatigiinnermullu Naalakkersuisoq Karl Frederik Danielsen oqarpoq:

”Ukkusissani inissiat kingulliit tunniunneqarnerini maanna inissiat taartissat tamarmik tunniunneqarsimalermata atorneqalermatalu nuannaarutigisorujussuuara. Taamaalilluni innuttaasunit tassaarsuarmit eqqugaasunit inissianik taartissanik tunineqarnissamut pisinnaatitaaffeqartut tamarmik siunissaminni angerlarsimaffissaminnik nutaanik pissarsisimalerput. Neriuppunga sinaakkusiussat nutaat 2017-imi Karrat Kangerluanni tassaarsuup kingunerisaanik inernileeqataasimassasut.
Sanaartukkat tamaasa aammalu sanaartukkanik tamarmiusunik innuttaasunut tunniussinerit iluarisimaartorujussuuakka. Suleqataasut tamarmik; teknikkikkut siunnersuisartut, sanasut sanaqataasut, atorfilittakka minnerunngitsumillu Avannaata Kommunia suleqatigiilluarsimasorujussuusimapput, taamaalillutillu innuttaasut tassaarsuarmit eqqugaasut atorfissaqartitaminnik innuttaasut qanillugit kiffartuunneqarnissaat qulakkeerneqarsimalluni.

Neriuppunga innuttaasut illutik nutaat nuannarilissagaat iluarisimaalissallugillu, aammalu siumut, siunissamut pitsaasumut isigisinnaalernissaminnut iluaqutigissagaat.”

Annertunerusumik paasisaqarusunnermi: Inussiarnersumik Naalakkersuisoqarfimmi Pisortat Allattoqarfiat, box909@nanoq.gl, attaveqarfigeqquneqarpoq.