2020-mi kapisilinniarnissaq pisassiissutigineqartullu



Kapisilinniarneq septembarip aallaqqaataani aallartissaaq

Naalakkersuisut aalajangerput ukioq manna kapisilittassat 20,7 tonsiussasut, taakku inuussutissarsiutigalugu sunngiffimmilu aalisartunit aalisarneqarsinnaapput. Pisassiissutigineqartut siornatut paggatassiissutaapput.

Kapisilittassiissutigineqartut 20,7 tonsit 2020-mi kapisilinniarsinnaanermut akuersissutilinnut inuussutissarsiutigalugu sunngiffimmilu aalisartunut ataatsimut pisassiissutaapput. Kapisilittassiissutigineqartut 2019-imut sanilliullugit 1,2 tonsinik amerlanerupput.
Kapisilittassiissutigineqartut North Atlantic Salmon Conservation Organisation, NASCO-mik isumaqatigiissut naapertorlugu pisassiissutaapput. Isumaqatigiissut naapertorlugu 2019-imi pisassiissutigineqartut sinnerlugit aalisarneqarnerisa nikingassutaat 9,3 tonsiusoq, ukioq manna pisassiissutigineqartunut nikingassutaasoq ilanngaatigineqarpoq.

Aalisarnermut, Piniarnermut Nunalerinermullu Naalakkersuisoqarfimmit erseqqissaassutigineqassaaq ukioq manna kapisilinniarnissaq septembarip aallaqqaataanit oktobarip 31-annut pissammat, kapisilittassiissutigineqartulluunniit nunguppata aalisarneq unitsinneqassalluni.

Ukioq manna kapisilinniarneq siorna aalisalernermit ullunik 17-inik kingusinnerulluni aallartissaaq. Tamanna avannaani aalisartut kapisilinnik ukioq manna aalisarlutik pisaqarsinnaanissaannut qulakkeerinninneruvoq.

Sunngiffimmi aamma inuussutissarsiutigalugu aalisartut kapisilinnik aalisarsinnaanermut akuersissuteqassapput. Tamarmik pisaminnik pinngitsooratik nalunaaruteqartussaatitaapput.

Aalisartut kapisilinniarsinnaanermut 2019-imi akuersissuteqartut pisaminnilli pinngitsooratik nalunaaruteqarsimanngitsut, 2020-mi kapisilinniarsinnaanermut akuersissummik tunineqarsinnaanngillat.

Attavigineqarsinnaasoq: Aalisarnermut, Piniarnermut Nunalerinermullu Naalakkersuisoqarfimmi siunnersortaaneq, Katrine Kærgaard. E-mail: katk@nanoq.gl