Coronamut misissortittarnernut aamma aneqqusaajunnaarallarnernut assigiimmik periuseqarnissaq

Tallimanngorneq, ulloq 3. juli

 

Siunissami coronamut misissortinnerni tamani toqqusaakkut, tassa qungasikkut, taamaallaat misissortittoqalissaaq.  Taamaalilluni qinngakkut misissortittoqartarunnaassaaq, soorlu tamanna illoqarfiit ilaanni periuserineqaraluartoq.  Qinngakkut nappaatip suuneranik misissuinermi misissukkap inernera tutsuiginarnerusarpoq, kisiannili innuttaasunut ippingianartuuvoq tamannalu pissutigalugu inuit misissortinnissamut tunuarsimaarsinnaallutik.

 

Taamatuttaaq coronamik misissortinneq qinngakkut misissortittarneq, inunnit amerlasuunit ippingianartinneqartoq pissutigalugu tusaamanerlunneqalersimavoq.

 

”Misissortinnermi inernerit tutsuiginarnerusut imaluunniit misissortissimasut amerlanerusinnaanerat toqqarneqarsinnaasimapput, matumunngalu tunngatillugu peqqissutsikkut ilisimasat tunngavigalugit nalilerneqarpoq misissortittut amerlassusaat pingaarnerpaasoq. Iggissakkut misissortinneq kisiat atorneqarsinnaalluarpoq, nunanilu amerlanerusuni atorneqarluni. Nunamulli tikittut misissorteqqinneq ajortut aneqqusaajunnaarallarnermullu maleruagassanik maleruaanngitsut amerlasuunik tunillaasinnaapput. Taamaattumik qinngakkut misissortittarnerup atorunnaarnissaa pissusissamisoornerpaasoq peqqissutsikkut ilisimasat tunngavigalugit nalilerneqarpoq." Nakorsaaneq Henrik L. Hansen nassuiaavoq.

 

Kalaallit Nunaanni coronamik misissortittarnermut najoqqutassat

Kalaallit Nunaanni innuttaasunut

-          Innuttaasut nappaammik ersiuteqartut tikittunullu attaveqarnikut imaluunniit attaveqartut misissortissinnaapput.

-          Napparsimasut eqimattakkaat aalajangersimasut tunillatsissimasinnaasutut ilimanaateqanngitsut kisiannili COVID-19-imut assingusumik ersiuteqartut ilaatigut aamma misissortinnissamik neqeroorfigineqassapput. Tamanna Kalaallit Nunaanni COVID-19-imik nakkutiginninnermut ilaavoq.

 

Inunnut angalasimallutik tikittunut

-          Kalaallit Nunaannut tikinnermi angerlarsimaffinnut toqqaannartumik mattutissaatit.

-          Kalaallit Nunaannut tikinnermi ullut tallimassaanni misissorteqqissaatit.

Meeqqat 12-it ataallugit ukiullit misissortittussaatitaanermut ilaatinneqanngillat.

-          Ullut tallimat qaangiunneranni misissorteqqissanngikkuit ulluni 14-ini aneqqusaajunnaarallartitaassaatit

-          Peqqissaaveqarfimmut qaninnerpaamut misissortinnissannut piffissamik inniminniinissat nammineq akisussaaffigaat.

-          Angerlarsimaannaqqusaaneq atuukkunnaassaaq misissuinerup inernera ajunngippat.

-          Ersiuteqaleruit angerlarsimaffinni mattusimassaatit oqarasuaatikkullu najukkanni peqqinnissaqarfik attavigalugu