Eqqagassalerinermi angusaqarluarnissamut pilersaarut

Eqqakkanut iliuusissanut pilersaarut 2020-2031 aqqutigalugu Naalakkersuisut kommunillu eqqagassalerineq suli pitsaanerulersippaat. Siunertat iliuusissallu nutaat eqqakkanut tunngatillugu mingutsitsinngitsumik piujuaannartitsisumillu ineriartortitsinissamik qulakkeerinnissapput – tamanut iluaqutaasumik.

Eqqagassat eqqagassaannaanngillat. Iginneqartut ilai atoqqinneqarsinnaasarput. Allat atortunik sanaajupput atorneqaqqissinnaasunik. Eqqagassat ikuallanneqartut avataanit kiassanermut aallerfittut atorneqarsinnaapput. Eqqakkat sapinngisamik pissarsissutiginerpaanissaat kiisalu peqqinnissamut avatangiisinullu illersorneqarsinnaasumik passunneqarnissaat eqqakkanut iliuusissanut pilersaarummi nutaami ukkatarineqarpoq.

 

Naalakkersuisut kommunillu ukiuni arlaqalersuni eqqakkanut tunngatillugu pitsanngorsaatinik ingerlataqartarsimapput. Tamanna alloriarneruvoq siulleq. Eqqakkanut iliuusissanut pilersaarut 2020-2031 nutaanik pingaarutilinnik alloriartitsissaaq, Sulisoqarnermut, Ilisimatusarnermut Avatangiisinullu Naalakkersuisoq Jess Svane oqarpoq.

 

Eqqagassanut tunngatillugu ukiuni tulliuttuni iliuuserineqartussanut nuna tamakkerlugu ataatsimut eqqagassanut aaqqiissutissat tunngaviupput. Eqqagassanut ikuallaaviit nutaaliaasut Sisimiuni Nuummilu pilersinneqassapput eqqagassanik peqqinnissamut avatangiisinullu naleqquttumik ikuallaasarnissamik qulakkeerinnittussat. Ikuallaaviit atorneqarnissamut 2022-mi 2023-milu piareersimanissaat naatsorsuutigineqarpoq. Illoqarfinnit nunaqarfinniillu eqqagassat poortorneqartassapput ikuallaavittaassanullu assartorneqarlutik, taamaaliornikkullu eqqagassat sineriammi eqaavissuarni qaleriiaatilernissaraluannik pingitsoortitsissallutik.

 

Nuna tamakkerlugu eqqagassalerinermik aaqqiissutissamik pilersitsinermut Avatangiisinut Aningaasaateqarfik aqqutigalugu katillugit 50 mio. koruuninik tapiisoqarnissaa Naalakkersuisut aalajangiiffigaat. Kommunini, ESANI A/S-imut peqataasuni, nuna tamakkerlugu ikuallaaviit avatangiisinut sunniutilimmik iluaqutaassapput.

 

. Naalakkersuisut kommunillu nuna tamakkerlugu ataatsimut eqqagassat pillugit aaqqiissuteqarnissamik 2018-imi isumaqatigiissuteqarput, kommunillu eqqagassanut suliffeqarfiutaat ESANI A/S pilersaarutinik piviusunngortitsiniarluni sulileruttorpoq. Nuna tamakkerlugu eqqagassanut aaqqiissut assigiimmik pisussaaffeqarfigineqarpoq, kommunillu ESANI A/S aqqutigalugu isertitat aningaasartuutillu avitseqatigiissutigissavaat.

 

Eqqakkanut iliuusissanut pilersaarut 2020-2031 uani takusinnaavat.

 

Paasisaqarnerorusuttunut attavissaq:
Naalakkersuisoqarfimmi pisortaq Mette Skarregaard Pedersen, oqarasuaat 529844 imaluunniit e-mail: mesp@nanoq.gl.