Ujarassiorit 2020 aallartippoq

Ujarassiorit – nuna tamakkerlugu aatsitassartalinnik ujarassiornermut soqutigisalinnut tamanut unammisitsineq nuannarineqarluartoq – ukioq manna 2020-mut aallartippoq. Ujarassiorit ukioq 1989-imi aallartinneqartoq aasat tamaasa ingerlanneqartarsimavoq.

Akissarsiassat akileraarutitaqanngitsut katillutik 120.000 kroniupput, taakkunanngalu ajugaasup 55.000 kr. pissarsiassarai.

Ujarassiorit Aatsitassanut Naalakkersuisoqarfimmiit ingerlanneqarpoq aningaasalersorneqarlunilu. Ajugaasut suliffeqarfinnit aningaasaateqarfinnillu ukunannga akissarsitinneqassapput:

GrønlandsBankip Inuussutissarsiutinut Aningaasaateqarfia A/S aningaasaliisutut pingaarnertut 40.000 koruuninik tapiissuteqarpoq.



Internetikkut nittartakkami www.ujarassiorit.gl-imi ujarassiornermut peqataanermut paasissutissat saniatigut aamma downloaderneqarsinnaapput quppersakkat saqqummersitallu allat ujarassiornermi iluaqutaasinnaasut. Assersuutigiinnarlugu atuagaq ”Mineralinik ilitsersuut – Ujarassiuujunngitsunut aatsitassarsiorneq” juulip qaammataani allakkerivinni tamani akeqanngitsumik pineqarsinnaalerumaarput.

Allakkerivimmissaaq pineqarsinnaapput unamminermi peqataasutut nassiussilernermi atugassat aammalu immersugassaq ateq, najukkap il.il. nalunaarsorneqarfissaat. Aamma nunap assinga pissarsiassaavoq, tassanilu nassaarfik nalunaarneqassaaq. Nassiussineq akeqanngilaq.

Ukiormanna Ujarassiorimmut peqataasut nassaavi tiguneqareersimassapput oktoberip aallaqqaataat 2020 nallertinnagu. Ulloq taanna qaangertoorpat ujaqqat aappaaguani suliarineqassapput.

Inuussutissarsiutiginagu ujarassiortut Kalaallit Nunaanni inuit allattorsimaffianni nalunaarsorsimasut kisimik peqataasinnaapput. Ujaqqat nunatsinneersut kisimik nassiunneqarsinnaapput. Ujaqqat nassaariffii sukumiisumik aatsaat nalunaarutigineqarpata peqataasut akissarsitinneqarsinnaapput. Karseeqqami ataatsimi nassiunneqartumi taamaallaat ujarak ataaseq nassiunneqassaaq, anginerpaamillu assammit eqeruloorsimasumit anginerussanngilaq, qaarsumiillu ujarak sapinngisamik peerneqarsimassalluni. Ujaqqat nassiussat utertinneqarsinnaanngillat.

Ujarassiorluarisi!

Ujarassiorit ujarassiornerlu pillugu sukumiinerusumik paasisaqarfigineqarsinnaavoq:
Ujarassiooq Debora H. Kleist
Ujarassiorit-mut aqutsisoq
Tlf.: +299 34 68 18, e-mail: deha@nanoq.gl aamma mmr@nanoq.gl

Attavissat allat:
Ujarassiooq Jonas Petersen
Ujarassiooq
Tlf.: +299 34 65 49
E-mail: jpet@nanoq.gl aamma mmr@nanoq.gl

Ujarassiooq Arent Heilmann
Ujarassiooq
Tlf.: +299 34 68 12
E-mail: area@nanoq.gl aamma mmr@nanoq.gl