Peqqinnissaq pillugu ataatsimiititaliarsuami ilaasortanik toqqaaneq

Naalakkersuisut Peqqinnissaq pillugu ataatsimiititaliarsuarmi ilaasortanik toqqaaneq akueraat.

Peqqinnissaq pillugu ataatsimiititaliarsuaq 10-nik ilaasortaqarpoq, siulittaasoqarfimmi attuumassuteqanngitsumik pingasunik ilaasortaqarpoq. Ilaasortat 7 soqutigisaqaqatigiinniit innersuunneqarnikkut toqqarneqarput.

Siulittaasoqarfik ukuninnga ilaasortaqarpoq:

Siulittaasoq: Eqqartuussisuserisoq Ulrik Blidorf

Siulittaasup tullia: peqqinnissakkut aningaasaqarnermik peqqinnissamullu politikimik professori Keld Møller Pedersen

Siulittaasup tulliata aappaa: Issittoq pillugu ilisimatusarnermi Ph.d., Cand. Tarnip pissusaanik ilisimatusarnermi Ilinniartitaanerlu pillugu ilinniakkami Mag. Peqqissaasoq Tine Aagaard

Tulliuttut Peqqinnissaq pillugu ataatsimiititaliarsuarmi ilaasortassatut toqqarneqarput:

Kigutit Nakorsaasa Peqatigiiffiat: kigutileriffimmi immikkoortumi qullersaq Brita Broberg, Qeqertarsuaq
Nakorsat Peqatigiiffiat: Nunap immikkoortuani nakorsaq immikkullu ilinniarsimasoq nakorsaaserisoq Nicolai Hardenberg Larsen, Nuuk
Neriuffik: Neriuffimmi siulittaasoq Mette-Sofie Jørgensen, Nuuk
PPK Peqqinnissaq pillugu Kattuffiit: Aaviaasut Kalaallit Nunaani siulittaasuat, Inge-lise Kleist, Nuuk
SIK: SIK-mi siulittaasup tullia, portøri, Ludvig Larsen, Nuuk
Kommunit: Suliamut pisortaq Kommuneqarfik Sermersooq Arnannguaq Heilmann Christensen
KANUNUPE: KANUNUPE-mi siulittaasoq Jens Kristian Therkelsen, Ikerasak/Uummannaq

Peqatigiiffiit sinniisussamik aamma toqqaapput, ilaasortaq ataatsimiinnermut peqataasinnaanngippat peqataasussanik.

Suliffeqarfiit tulliuttut aamma makku peqataasassapput:
  • Peqqissutsimut Naalakkersuisoqarfik
  • Naalakkersuisut Siulittaasuata Naalakkersuisoqarfia
  • Aningaasaqarnermut Naalakkersuisoqarfik
  • Ilaqutariinnermut Inatsisinillu Atuutsitsinermut Naalakkersuisoqarfik
  • Ilinniartitaarnermut, Kultureqarnermut Ilageeqarnermullu Naalakkersuisoqarfik
  • Center for Folkesundhed i Grønland
  • Nunatta Nakorsaaneqarfia siulittaasoqarfimmi peqataassaaq
Allattoqarfik Peqqissutsimut Naalakkersuisoqarfimmi aamma Aningaasaqarnermut Naalakkersuisoqarfimmi isumagineqassaaq.

Ataatsimiititaliarsuup siunertaraa peqqinnissaqarfimmi ataatsimut isigalugu pitsanngorsaatissanik naleqqussaatissanillu inassuteqaasiornissaq, tamatumunnga ilanngunneqarlutik peqqinnissaqarfiup aaqqissuussaanera tamarmiusoq, sulisussarsiortarneq sulisullu sulisoriinnarnissaat kiisalu Danmarkimik nunanillu allanik suleqateqarneq. Inassuteqaatit Inatsisartunit peqqinnissaqarfimmi aaqqissuusseqqittoqarnissamut politikkikkut tunngavigineqassapput, aaqqissuusseqqinnermilu siunissami peqqinnissaqarfiup sullissinera sinaakkuserneqassaaq. Ataatsimiititaliarsuup inassutigaa immikkoortoqarfiit akimorlugit pingaarnersiuineq aningaasallu atugassarititaareersut aallaavigineqassasut.

Ataatsmiititaliarsuaq suliniutit arlallit pissusissamisoornersut misissussallugit nalilersussallugillu naatsorsuutigineqarpoq, immikkoortunut tullinnguuttunut suliarinninnissamik aningaasaliissutini sinaakkutigineqartuni aaqqiissutissatut periarfissanik periusissanillu ujartuissallutik:
  1. Inuiaqatigiit agguarneqarnerisa iluani, nunap aaqqissuussaanera, najugaqariaaseq, ilinniagaqarneq, kulturikkut attuumassutillit il.il. aaqqissuussaanikkut ineriartornermut suliaqarnermi aallaavigineqassapput.
  2. Sulisunik atorluaanerup pitsanngorsarneqarnissaa – tamatumunnga ilanngullugu qarasaasiatigut atortorissaarutinik il. Il. Pisiariaqartunik atuineq.
  3. Nammattunik sulisussaqarumalluni atuartitaanikkut sulisussarsiortarnikkullu suliniutit.
  4. Peqqinnissaqarfiup kommunillu suliassaqarfissaa akornanni suleqatigiinneq.
  5. Danmarkimut nunanullu allanut suleqateqarneq nukittooq
  6. Peqqinnissaqarfiup iluani aningaasaqarnikkut isummersuutit tamakkiisumik ilaatinneqarnissaat.
  7. Ilisimasanik toqqammaveqartumik paasissutissanik pisariaqartunik qulakkeerinninneq, aqutsinermi paasissutissanik pitsanngorsaaneq anguniarlugu pitsaanerusumik aqutsinissamut, aqutsisoqarfinnut naalakkersuisoqarfinnut politikkikkullu sulinermi atorneqarsinnaasunik.
  8. Ataatsimiititaliarsuup sulinera pillugu innuttaasunut ilisimatitsineq.
  9. Oqaloqatigiinneq aallaavigalugu innuttaasut / napparsimasut isumaat ilaatinnissaat taamasilluni imminut isumaginninneq aamma peqqinnissaqarfimmut piginneqataaneq ukkatarineqarluni
  10. Peqqinnissaqarfimmi sunniutit naatsorsornissaanut atuinerup qaffarsarneranik naliliineq
Naatsorsuutigineqarpoq suliaq august 2020 aallartinnerani aallartissasoq.

Uani atuarsinnaavat peqqinnissaq pillugu ataatsimiitsitaliarsuup sulinissaanut tunngavissiaq.

Paasisaqarnerorusukkuit naalakkersuisup allattaa Frederik Siegstad, oqarasuaat +299 23 39 93 imaluunniit email frsg@nanoq.gl attavigiuk