Avatangiisinut Aningaasaateqarfiup avatangiisini suliniutit 28-it taperserpai

Avatangiisinut suliniutit pitsaanerusumik anartarfilerinermik pilersitsissapput, eqqakkanik immikkoortiterisarneq siuarsarneqassaaq kiisalu meeqqat inuusuttullu akornanni avatangiisit pillugit ilisimasanik siammarsaallutik.

Avatangiisinut Aningaasaateqarfik avatangiisinut suliniutinut nutaanut 28-nut, inunnit, suliffeqarfinnit kommunenillu aallartisarneqartussanut, 4,4 million koruuninik agguaaqqammerpoq. Suliniutit ataatsimut isigalugit makkununnga tunngapput:

 

  • Anartarfilerinermi atukkanik pitsanngorsaasoqassaaq
  • Atoqqiineq annertusarneqarnissaa anguniarlugu eqqakkanik immikkoortiterisarneq siuarsarneqassaaq
  • Meeqqat inuusuttullu avatangiisinut eqqumaffiginninnerulernissaat

 

Assersuutigalugu nunaqarfinni arlalinni anartarfilerinermi usilersorfinnut, aalisarnermi kilisannermut atortunik atoqqiinermut kiisalu meeqqanut inuusuttunullu saqqummersitsinernut paasititsiniaanernullu tapersiisoqarpoq.


Avatangiisinut Aningaasaateqarfiup aningaasaataannit suliniuterpassuarnut soqutiginartunut taamak amerlatigisunut ukioq manna aamma tapersiisinnaasimagatta nuannaarutigaarput. Taamak soqutiginnittoqartiginerata takutippaa avatangiisit pillugit amerlasuut akisussaaffimmik tigusisut iliuuseqarlutillu, kinguaariit massakkut siunissamilu iluaqutissaannik. Avatangiisinut suliniutissarpassuit inernissaasa takunissaat qilanaarivara,” Sulisoqarnermut, Ilisimatusarnermut Avatangiisinullu Naalakkersuisoq Jess Svane oqarpoq.

Suliniutit taaneqartut saniatigut Avatangiisinut Aningaasaateqarfimmit 10 million koruunit immikkoortinneqarsimapput nuna tamakkerlugu nutaaliaasunik Sisimiuni Nuummilu ikuallaaviliornissanut, nuna tamakkerlugu eqqakkanik tigooraasussanut, atugassanik.

Nuna tamakkerlugu avatangiisinik pitsanngorsaanissamik sulinerup ikorfartorneqarnissaa siunertaralugu Avatangiisinut Aningaasaateqarfiliornissaq Inatsisartunit 2018-imi ukiakkut ataatsimiinnermi aalajangerneqarpoq. Suliniutinut avatangiisinut iluaqutaasunut ukiut tamaasa aningaasanik immikkoortitsisoqartassaaq.


Paasisaqarnerunissamut attavissaq:
Ilisimatusarnermut Avatangiisinullu Naalakkersuisoqarfimmi pisortaaneq, Mette Skarregaard Pedersen, oqarasuaat: +299 346476, e-mail:
mesp@nanoq.gl

Suliniutit 2020-mi taperneqarsimasut allattorsimaffiat
uani takuuk.

 

Avatangiisinut Aningasaateqarfik pillugu nassuiaat 2019 uani atuaruk.