Kulturikkut Nersornaat Pele Møllerimut, Kajumissaasiullu Jens Christian Lyberth Lennertimut

Ukioq manna Kulturikkut Nersornaat nipilersortartumut Pele Møllerimut tunniunneqarpoq, filmiliortartumullu Jens Christian Lyberth Lennertimut Naalakkersuisut kajumissaatitut nersornaasiuttagaat tunniunneqarluni.

Ilinniartitaanermut, Kultureqarnermut Ilageeqarnermullu Naalakkersuisup Ane Lone Baggerip Katuami nersornaatit taakku marluk Inuiattut Ullorsiorfimmi juunip 21-ani tunniuppai.

Pele Mølleri pillugu Ane Lone Bagger ilaatigut oqarpoq:
  • 1990-ikkut aallartinneranni Jazzimik nipilersortartuminik pilersitsisimavoq. Nipilersoriaaseq meeraanerminiit tusarnaartakkani, nipilersoriaasianullu sunniuteqarluinnarsimasoq.
    Saqqummersitanut 17-inut peqataasimavoq. Saqqummersitat amerlanerit nammineq nipilersortartuni peqatigalugit, ilaallu nipilersortartut allat peqatigalugit saqqummersittarsimavai.
    Taakku saniatigut nammineq nipilersuusiaminik guitarernermik ilinniutissamik DVD-mik saqqummersitsisimavoq, sunngiffimmilu ilinniartitsinermi, aamma allanut guitarertalerusuttunut, guitarernermik suli ilinniartitsisarpoq.
  • Erinarsuusiaani tusarnersuni asanninneq, ikinngutigiinneq, qungujunnarsinnaasut, nunagisamullu asanninneq pinngortitarsuarlu kusanartoq taallani sammineqartarput. Erinnat tusaqqoornartut, misigissutsimik attuisut, erinnallu nuannaalernartut.

Jens Christian Lyberth Lennerti pillugu Ane Lone Bagger ilaatigut oqarpoq:
  • Ikinngutiminik sunnerneqarnermigut assiliinermik filmiliornermillu soqutiginninnera inuusuttuaraanerani aallarnerneqarsimavoq. Kingusinnerusukkut nammineq filmiliortalerpoq. Naatsumik filmiliorluni suliaa siulleq taaguuteqarpoq ”You killed your dreams”. Naatsumik filmiliaa misigissutsiminut, isumaliuutiminut aamma sinnattuminut tunngatitaa. Taakku saniatigut tusarnaartitsinernik immiussisarsimavoq, silami piffinni assigiinngitsuni tumerparpaarnernik immiussisarsimavoq, inunnillu kulturikkut pingaarutilinnik filmeeqqanik suliaqartarsimavortaaq. Filminik naatsuliaasa ilaat ”Kukiiarneq”-ermik qulequtalik, Europami filminik saqqummersitsiviit annersaanni Berlinalen-imi ukiormanna takutinneqarpoq.

Naalakkersuisut Kulturikkut Nersornaat 1982-imi pilersippaat. Nersornaat 50.000 kr-nik aningaasartaqartoq inummut ataatsimut arlalinnulluunniit, peqatigiiffinnut kattuffinnulluunniit eqqumiitsuliornikkut kulturilerinikkulluunniit immikkut suliniuteqarsimasunut tunniunneqartarpoq. Nersornaat ukiut tamaasa Inuiattut Ullorsiornitsinni juunip 21-ani tunniunneqartarpoq.

Naalakkersuisut kajumissaatitut nersornaasiuttagaat 10.000 kr-nik aningaasartaqartoq 2016-mi pilersinneqarpoq. Taannalu inuusuttumut piginnaasalimmut Kulturikkut Nersornaasiisoqarnerani aamma tunniunneqartarpoq.

Paasissutissanik annertunerusunik perusukkuit attavigiuk specialkonsulenti Pia Lynge, toqq.: +299 345706, PILY@nanoq.gl

Ilinniartitaanermut, Kultureqarnermut Ilageeqarnermullu Naalakkersuisoq Ane Lone Baggerip nersornaasiinermi juunip 21-ani 2020-mi oqalugiaataa