Ataatsimoornerup paasisaqarnissamut aqqutaanera pillugu Facebookikkut qupperneq nutaaq

Aningaasaqarnermut Naalakkersuisoqarfimmi Tunngaviusumik Inatsimmut Immikkoortup Facebookimi qupperneranut nutaamut  pituttorsimaffigisatsinnik katersuuffigisatsinnillu tamanik aallussisumut tikilluarit. Maannakkumuugallartoq qupperneq Kalaallit Nunaata Siunissaa/Grønlands fremtid taagussallugu qinerparput.

 

”Assigiinngitsorujussuugaluarluta taamaattoq sorpassuit ataatsimoorutigaavut. Avannaamiuugaluarutta, kujataamiuugaluarutta, inuusuttuugaluarutta utoqqaagaluaruttaluunniit, nunaqarfimmi illoqarfimmiluunniit peroriartorsimagaluartutta nunatsinniluunniit peroriartorsimagaluarutta nunani allaneersuuguttaluunniit, taamaattoq ataatsimoorfigisatsinnik misigisaqarlutalu pingaartorsiorfeqarpugut. Taakku tassaasinnaapput nerisassioriaatsivut, juunip 21-anni inuiattut ullorsiortarnerput, meeqqat atualeqqaarfii, ullukinnersiornerit, kaffillernerit, aalisariarnerit piniariarnerillu”, Vittus Qujaukitsoq, Aningaasaqarnermut Naalakkersuisoq nassuiaavoq, imalu nangippoq:

 

”Ataatsimoorluta tamatta Tunngaviusumik Inatsisissatsinnik sulinitsinni, Kalaallillu Nunaata namminersorluni aqutsisoqartup tungaanut suliniarnitta nalaani inuiattut sunik katersuuffeqarnitta paasinissaa pingaaruteqarluinnartuuvoq”.

 

Aningaasaqarnermut Naalakkersuisoq naapertorlugu kikkuugaluaruttaluunniit, suminngaanneeraluaruttaluunniit kiisalu inuunermi sunik kissaateqaraluaruttaluunniit sunik katersuuffeqarnitsinnik – sunillu ataatsimoorfeqarnitsinnik qarasaasiakkut eqqaamasalersaarutinik katersuiffimmik pilersitsinissaq kissaateqarneq anguniagaavoq.

 

Taamaammat sammisanik sunilluunniit katersuuffigisatsinnik misigisanik oqaluttuanik ilapittuuteqarnissarsi tamassinnut kaammattuutigerusuppara”, Vittus Qujaukitsoq qiimmassimaaqaluni naasuiaavoq.

 

Sammisat siuliani nassuiarneqartutullu issapput, sammisallu allat, soorlu nunasiaasimanerput kiisalu taassuma nassatai pitsaasut pitsaanngitsullu, inuppassuarnik atuuffimminni nunatta kulturikkut, oqaatsitigut politikikkullu ineriartornerani sunniuteqarsimasunik oqaluttuat – kiisalu Tunngaviusumik Inatsit namminerlu naalakkersuisoqarneq pillugu inuinnaat apeqqutaat aallaavigalugit isummat assigiinngitsut qulaajaaviginissaat aamma ilaassapput.

 

Quppernermi allaaserisat, videut, titartakkat paasissutissiisut assilissallu atorneqassapput. Naalakkersuisoqarfiup akuttunngitsunik oqaluttuanik ikkussisarnissaa anguniagaavoq.

 

Facebookimi qupperneq Kalaallit Nunaata siunissaa/ Grønlands fremtid, sapaammi juunip 21-ani atulissaaq.

 

Vittus Qujaukitsoq, Aningaasaqarnermut Naalakkersuisoq

 

Attavigisassaq:

Martin Christiansen (Aningaasaqarnermut Naalakkersuisoqarfik)

Toqq/direkte 345231

MCHR@nanoq.gl