Ivalop suliassani naammassivai

All.: Kim Kielsen Naalakkersuisut siulittaasuat

Aliatsaatigisannik kalerrinneqarpunga, Namminersornerullutik Oqartussani paasissutissiisarnermut, Tele Post Greenlandimi paasissutissiisarnermut kiisalu Kalaallit Nunaata Radioani pisortaasimasoq Ivalo Egede akornatsinniikkunnaartoq.

Ivalop erneranut Masaanamut ernutaanut ilaqutaanullu tamanut misiginneqataanerput matumuuna apuuppara.

Ivalo Egede nunatsinni suleqataalluarsimavoq. Attaveqaqatigiinnermut tunngasunik ilinniarsimasuuvoq, ilinniakkanilu atorlugu atorfinni assigiinngitsuni tamatigut piumassuseqarluarluni inuiaqatigiinnut sullisseqataasarsimavoq.

Ivalo Royal Arctic Line-mi ussassaarinermut pisortaasoq ilisarisimalerpara. Ivalo sullissilluarniartuuvoq, eqqaamavaralu Royal Arctic Line-mut ornigukkaangatta Ivalop suliffimminut isertut ajunngitsumik pineqarsimallutik misigisimanissaat pingaartittuartaraa.

Ivalo Namminersornerullutik Oqartussani Tusagassiiviup aallartisarnerani siuttuusimavoq. Paasissutissiisarnermi attaveqatigiinnermilu suliassat qanoq suliarineqarnissaat ilisimasaqarfigilluarpaa, taamaattumillu paasissutissiisarnermi suleriaasissat pillugit annertuumik sunniuteqarsimavoq.

Ivalo Egede aamma Kalaallit Nunaata Radioani suleqataasimavoq, tassani 2008-miit 2013-ip tungaanut pisortaanertut atorfeqarami. Taamaalilluni Ivalo Egedep nunatsinni innuttaasut paasissutissiinikkut tusagassiornikkullu sullissinermi aqqusaagai sunniuteqarfigisimasaalu siammaseqaat. Ivalo Egedep eqqaaneqarnera ataqqinartuugili. 

 

Naalakkersuisut sinnerlugit

Kim Kielsen

Naalakkersuisut Siulittaasuat