Ullumikkut 2030-milu Avannaamioqatigiit

COVID-19-ip malitsigisaanik ajornartorsiutinik unammillernartorpassuarnillu nalaatatta iliuuseqarfiginissaannut maannakkut nunani avannarlerni pimoorussisoqarpoq. Danmark, Kalaallit Nunaat Savalimmiullu 2020-mi Nunani Avannarlerni Ministerit Siunnersuisoqatigiit siulittaasuuffigaat, taakkualu suliniutigisimavaat nunat avannarliit suleqatigiinnerat maannakkut pisunut atatillugu atorneqassasoq. Nunani avannarlerni arlalippassuartigut assigiissuteqarpugut aamma maannakkut ajornartorsiutinik nalaataqarnitsinni misilittakkatsinnik annertuumik avitseqatigiissimavugut. Naak nunani avannarlerni assigiinnik aaqqiissuteqarnissarput toqqartanngikkaluaripput, nunat allat misilittagaat pillugit ilisimatinneqarnertigut maannakkullu unammillernartunut akissutaasinnaasut oqaloqatigiissutigineratigut pissarsiaqarluartarpugut. Peqqinnissakkut ajornartorsiornerup saniatigut inuiaqatigiinnitsinni sorpassuartigut COVID-19 sunniisimavoq, sutigullu tamatigut aaqqiissutit nassaarineqartariaqarsimapput; ilinniartitseriaatsinik nutaaniit nutaanik killilersuinernit unammillernartut takkussimasunut aaqqiissuteqarniarnernut, assersuutigalugu angerlarsimaffimmi sulinermut tunngatillugu isumaginninnikkut isumannaallisaaneq. Tamanna suliassaqarfinni ataasiakkaani ministerit oqaloqatigiinnerminni pissarsiaqarfigisimaqaat.

 

Ajornartorsiornitsinni 2030-p tungaanut siunissaq ungasinnerusoq ukkataraarput. Aap, maannakkorpiaq ukioq 2030 eqqarsaatigalugu ungasissutut isikkoqarsinnaavoq, kisianni taama iliornissarput pisariaqarpoq. Tassami COVID-19-imut aamma atatillugu siunissaq ungasinnerusoq pillugu sulissuteqarnissaq pingaaruteqarmat. Tamanna siunissami ajornartorsiutaasinnaasut qanoq isilluta iliuuseqarfigisinnaanerinut atatillugu atuuppoq aammattaaq avannaamioqatigiit nunatta aningaasarsiornerinut aaqqiissuteqarnissamut suliaqarnerinut sapinngisamik pitsaanerpaamik tapersiinissatsinnut.

 

Nunat Avannarliit nunarsuarmi piujuaannartitsinerpaanissaat akuutitsinerpaanissaallu Nunani Avannarlerni Ministerit Siunnersuisoqatigiivisa takorluukkatut nutaatut anguniagassarissagaat siorna avannaamioqatigiit statsministeriisa akuersissutigaat. Maanna suliniutit aalluteqqippavut, nunarsuarlu tamakkerlugu nappaatip tuniluunnera pissutaalluni unammilligassatsinnik tikkuussinissatsinnut aamma ikiuutaasussaasunik Nunani Avannarlerni Ministerit Siunnersuisoqatigiit nutaanik suliniuteqassapput. Tamanna mingutsitsinngitsumik aningaasarsiornikkut inooriaatsinilu piujuartitsisumik aaqqiissuteqarnissamut sulissuteqarnissamut tapersiinissamut atuuppoq.

 

Nunat Avannarliit Siunnersuisoqatigiivi – nunani avannarlerni inatsisartut suleqatigiiffiat – siorna inuiaqatigiit isumannaatsumik ingerlanissaat pillugu periusissiamik akuersipput. Tamanna COVID-19-imik maannakkut nalaataqarnitsinni tunngassuteqarluinnarpoq. COVID-19-ip nalaani nunat avannarliit suleqatigiinneranni misilittakkat ilinniarfigissavagut, taamaasilluta siunissami ajornartorsiorfiusussanut sakkussaqarluarnerulissaagut. Siumut isigisumik suliaqarnermut aamma tamanna ilanngunneqassaaq.

 

Nunat avannarliit nukittuffigisaat tassaajuarsimavoq siammasissumik siumut sammisunik aaqqissuusseqqinnissamut naleqqussarnissamullu piumassuseqarneq piginnaassuseqarnerlu. Inuiaqatigiinni ilusiliisimanigut imminnut eqqaanartorujuupput, tamakkiisumillu nunat avannarliit suleqatigeeriaasiat atorutsigu ukiuni aggersuni avannaamioqatigiit annertuumik naleqqussaanissatsinnut tapertaassaaq. Tamanna silap pissusaanut avatangiisinullu tunngasunut atuuppoq, aammattaarli digitaliusunik allannguinissanut suliassaqarfinnullu allarpassuarnut. Avannaamioqatigiinni innuttaasunut inuussutissarsiornermullu iluaqutaasussamik Nunat Avannarliit mingutsitsinngitsuunissaat, unammillersinnaasuunissaat inooriaatsinilu piujuartitsisuunissaat Nunani Avannarlerni Ministerit Siunnersuisoqatigiinni sulissutigissavarput, nunani avannarlerni inuit nalinginnaasut minnerunngitsumillu inuusuttut tamassumunnga akuliusimatinneqarnissaat pingaartipparput.

 

COVID-19 uatsinnut suli uppernarsaataavoq nunani avannarlerni siunissamut aaqqiissutissanik pilersitsinissamut suleqatigiinnitta nukittorsarneqarnera tamatta iluaqutigigipput. Anguniagaq tassaavoq 2030-mi Nunat Avannarliit nukittunerunissaat.

 

Suli paasisaqarnerusukkuit attavigineqarsinnaavoq: Nunat avannarlernut Ministerip allatsia: Jens- Christian Jacobsen jech@nanoq.gl aamma Immikkut Siunnersorti, Upaluk Poppel, Nunat Allanut Naalakkersuisoqarfik, upap@nanoq.gl

  

Nunanut Avannarlernut Suleqateqarnermut ministerit Mogens Jensen, Danmark; Kaj Leo Holm Johannesen, Savalimmiut aamma Steen Lynge, Kalaallit Nunaat