Kangerlussuup aamma Kangerluarsuk Tulliup akornanni aqquserniassamut ASN akuerineqarpoq

Naalakkersuisut 11. juuni 2020-mi Kangerlussuup aamma Kangerluarsuk Tulliup akornanni aqquserniassamut ASN akueraat. Akuersissut sanatitsisumut, Qeqqata Kommunianut tunniunneqarpoq. ASN-imut akuersissut avatangiisinut piumasaqaatinik, Kangerlussuup aamma Kangerluarsuk Tulliup akornanni aqquserniassap sananeqarneranut ingerlanneqarneranullu atatillugu malinneqartussanik imaqarpoq. ASN-imut nassuiaat kiisalu tamanut ammasumik tusarniaaneq, 2020-mi januaarip ulluisa 15-anniit marsip ulluisa 11-annut ingerlanneqartoq tunngavigalugit ASN-imut akuersissut nalunaarutigineqarpoq.

ASN sunaana? ASN tassaavoq Avatangiisinut Sunniutissanik Naliliineq. ASN-imut nassuiaat suliassami avatangiisinut kingunerisassat tulleriiaarlugit saqqummiunneqarnerinik imaqarpoq. Nassuiaat aamma suliniutissanut, avatangiisinut kingunerluutaasussanik pinaveersaartitsissutaasinnaasunut siunnersuutinik imaqartussaavoq.

ASN-imut akuersissut sunaana? ASN-imut nassuiaat tunngavigalugu sanaartugassap avatangiisinut sunniutissai akuersaarneqarsinnaanersut, aammalu ASN-imut akuersissutip suliarineqarnissaanut piumasaqaatit suut saqqummiunneqarsinnaanersut Naalakkersuisunit isummerfigineqartussaavoq.

Inatsisit ASN-imut suliassaqarfik ukunani maleruagassiuunneqarpoq:

  • Atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat nr. 5, 27. marts 2013-meersoq

  • Avatangiisit innarlitsaaliorneqarnissaanik Inatsisartut inatsisaat nr. 9, 22. november 2011-meersoq (kapitali 8).

Maalaaruteqarsinnaatitaaneq ASN-imut akuersissut pillugu maalaarutaasinnaasut kingusinnerpaamik 24. juuli 2020-mi Suliffeqarnermut, Ilisimatusarnermut Avatangiisinullu Naalakkersuisoqarfik, Postboks 1614, 3900 imaluunniit pan@nanoq.gl aqqutigalugu tiguneqarsimassapput.

ASN-imut akuersissut uani atuarneqarsinnaavoq.   

Annertunerusumik paasisaqarusunnermi attaveqarfissaq: Naalakkersuisoqarfimmi pisortaaneq Mette Skarregaard Pedersen, tlf.: 346476 aamma e-mail: mesp@nanoq.gl