Naalakkersuisup Sisimiunut angalanera

Pingasunngornermi juunip ulluisa pingajuanni Naalakkersuisup Karl Frederik Danielsenip Borgmester Malik Berthelsen ataatsimeeqatigaa, tassanilu Qeqqata Kommuniani kiffartuussinermut isumaqatigiissutissat attaveqaatillu oqaluuserineqarput.

Karl Frederik Danielsenip tikeraarnermini periarfissaq iluatsillugu illu misiligummik sanaaq Illorput 2100 takuniarpaa aammalu Royal Arctic Line-p Sisimiuni immikkoortortaqarfia pulaarlugu.

Illorput 2100-mut pulaarnermini ilaatigut anartarfik, 2000 W-mik sakkortussusilimmik ikuallaavilik, minutsini 45-uinnarni attanik ikuallaasartoq, taamaattumillu eqqiartariaqarnanilu imaartariaqanngitsoq takuaa. Tamatumunnga atatillugu Karl Frederik Danielsen oqarpoq: ”Anartarfiit taamaattut atorlugit avatangiisinut sunniuteqartarneq nalinginnaasoq pinngitsoortussaavoq aammalu pinngortitamut akornusiigatik. Illumi 104 m2-nik angissusilimmi, sisamanik sinittarfilimmi, inilimmi, igaffilimmi, uffarfilimmi igaleqartumilu inissap qanoq atorluarneqarsimatiginera tupaallaatigisorujussuuara.”

Aamma ilisimatitsissutigineqarpoq, illu oqorsarluagaalluni 30 cm-it missaannik issussusilinnik iigaqartoq avatangiisinut mingutsitsinngitsorujussuusoq. Tamanna pillugu Karl Frederik Danielsen oqarpoq; ”Illumut taama angitigisumut kiassarnermut aningaasartuutit ukiumut 8.000 koruunit missaannaanniimmata tupaallannartorujussuuvoq. Sumiiffinni amerlanerusuni nukissamik atuinerup eqqumaffigineqarnerunissaa, aammalu nunatsinni inissiat allat taamatut pitsaassuseqalernissaat kissaatigisinnaavara”.

Sisimiut umiarsualivianni umiarsualivimmi pisortap Solvej Møllerip suliffeqarfimmi takornariartitsilluni umiarsualivimmi suliarpassuit takutippai. Assersuutigalugu reeferit ikkuffiit 88-nik ilaneqarsimapput, taakkulu containerit qerititsiviit nillataartitsiviillu sarfalersorneqarnerinut atorneqartarput.

Karl Frederik Danielsen oqarpoq: ”Umiarsualivimmi suliarpassuit takullugit nuannarisorujussuuara. Pingaartumik inissamik atorluaanerup pikkoriffigineqarnera, aammalu umiarsualiviup aalisagaqarfissuarnut naleqqiulluni inissisimaffia maluginiarluarpara.”

Nangippoq: ”Inuppassuit umiarsuit umiarsualivimmi talinngasut isumagalugit qanoq ulapitsigisut, aammalu inuttat sulilluarlutik ingerlalertortumik containerinik taamatullu nassiussanik ataasiakkaanik sukkaqalutik suliaqarneri takullugit maluginiartorujussuuakka.”


Annertunerusumik paasisaqarusunnermi Naalakkersuisup allattaa Inuk Kielsen Fleischer ikie@nanoq.gl-ikkut attavigineqarsinnaavoq.