Sumut-immersuiffissaq

15. juni 2020 arlaatigut piareersimanissat ilanngullugit Kalaallit Nunaannut angalasarneq ammarneqassaaq. Piareersimanissanut ilaavoq illit nammineerlutit angalasutut Sumut-immersuiffimmik immersuisarnissat.

Naalakkersuisut Kalaallit Nunaannut 15. juni 2020 aallartiffigalugu angalasarnerit ammaanneqarnissaat aalajangersimavaat.
Tikinnermut atatillugu piareersimanissat arlallit atorneqartussaapput. Taakkununngalu ilaavoq illit nammineerlutit angalasutut Sumut-immersuiffissamik immersuinissat.
Tikittut pillugit paasissutissat toqqortarnissaat Sumut-immersuiffissami siunertaavoq, taamaaliornikkut tunillaassortut sumiissusersiornerannut atatillugu pisariaqassappat Nunatta Nakorsaaneqarfia paasissutissanik pissarsisinnaassammat.
Immersuiffissaq uani nassaarisinnaavat: www.sumut2020.gl

MALUGIUK
  • Inniminniinermut normup immersuiffissami atorneqartussaammat Sumut-immersuiffissaq immersortinnagu billitsimik pisereersimasariaqarputit.
  • Sumut-immersuiffissami paasissutissat tamarmik sapinngisamik eqqortuunissaat pingaaruteqarpoq; ullut aallarfissat, sumiiffissat oqarasuaatillu normua.
Pisussaaffiit
Angalanermut atasumik arlalinnik pisussaaffeqarpoq.

Kalaallit Nunaanniit aallarneq nammineq akisussaaffigineqarpoq
Kalaallit Nunaanniit aallarnissat toqqarukku nammineq akisussaaffigissavat.
Aallalernermi uppernarsaatissat pisariaqartinneqartut takutissinnaanngikkukkit immikkut aningaasartuutinik nammineerlutit akiligassannik tunineqassaatit.

Kalaallit Nunaannut tikinnermi uppernarsaatissat pisariaqartinneqartut
Kalaallit Nunaanni najugaqarluni tikinneq:
  • Sumut-immersuiffissamik immersuisimanermut maili uppernarsaataasoq takutinneqassaaq
  • Rigshospitali aqqutigalugu Covid-19-imut misissortittoqarsimassaaq - tamanna pillugu ilitsersuut www.nun.gl-imiittoq 'Danmarkimi misissuinermi periutsit' ataani takujuk.
Kalaallit Nunaata avataani najugaqartutut tikinneq:
  • Sumut-immersuiffissamik immersuisimanermut maili uppernarsaataasoq takutinneqassaaq
  • Misissuinermi tunillatsissimannginnermut uppernarsaat ullunik amerlanerpaamik tallimanik pisoqaassusilik takutinneqassaaq
Aallariartortarfimmi uppernarsaatissaqarsimanngikkuit
  • Aallariartortarfimmi Sumut-immersuiffissamik immersuisimanermut uppernarsaateqartoqanngippat aamma/imaluunniit tunillatsissimannginnermut uppernarsaatissaqartoqanngippat timmisartumut ikisinnaassanngilatit.
  • Najugaqarnissannut immikkut aningaasartuutit nammineerlutit akilissavatit
  • Bilitserisat ullormut allamut nuunneqarsinnaassaaq, tassanilu uppernarsaatissaq pisariaqartinneqartoq takutissinnaassavat
Aallangajalerlutit Covid-19-imik tunillatsissimaguit
  • Aallarnissat sioqqullugu Covid-19-imik tunillatsissimassaguit timmisartumut ikisinnaassanngilatit
  • Covid-19-imut tunillatsissimanngikkuit aatsaat Kalaallit Nunaannut angalasinnaalissaatit
  • Najugaqarnissannut immikkut aningaasartuutit nammineerlutit akilissavatit
  • Billitserisat ullormut allamut nuunneqarsinnaassaaq, tassanilu uppernarsaatissaq pisariaqartinneqartoq takutissinnaassavat
Uppernarsaatitut maili
Sumut-immersuiffissamik immersuereeruit uppernarsaatitut mailimik angalaninni atugassannik tunineqassaatit. Uppernarsaatitut maili qarasaasiakkut printikkatulluunniit takutinneqarsinnaavoq.
Uppernarsaatitut mailimi ateq ullorlu aallarfissaq allassimapput, taakkulu mittarfimmi aallariartortarfimmi sulisunit misissorneqassapput. Taamaattumik paasissutissat ilinnut tunngasut angalanissannut pilersaarummut naapertuunnersut marloriarlugit misissussavatit.

Apeqqutit / ikiorneqarnissaq
Sumut-immersuiffissap immersornissaanut apeqqutissaqaruit?
Qarasaasiamut, internetimut, printerimut allanullu isernissat pisariaqartikkukku Imaaliorsinnaavutit:
  • Kalaallit Illuutaannut qaninnerpaamut saaffiginnigit - attaveqarsinnaanermut paasissutissat ukunaniipput: www.groenlandskehuse.dk imaluunniit
  • Kalaallit Nunaata Sinniisoqarfianut oqarasuaat +45 3283 3800 atorlugu saaffiginnigit, ullunillu marlunnik sioqqutsillutit ataatsimiinnissamut isumaqatigiissuteqarlutit.
Danmarkimi pisortat suliffeqarfiutaanni sulisut massakkut angerlarsimaffimminniit suleqqusaapput, tamakkulu pulaarfigeqqusaanngimmata ataatsimiinnissamut isumaqatigiissuteqareersimanissaq pingaaruteqarpoq.