Meeqqat tamarmik pitsaasumik inuuneqassapput

Ullumikkut nunatsinni Meeqqat Ulluannut atatillugu, meeqqat tamarmik pitsaasumik inuuneqarnissaat qitiutinneqassaaq. Meeqqat tamarmik pitsaasumik toqqissisimanartumillu meeraanissaannut, inuiaqatigiinni kivitseqataanissamut
qulakkeerinneqataanissamut ataatsimoorusassamik suliassaqarpugut.

Ulloq 1. juuni nunatsinni Meeqqat Ulluat nalliussivarput.

Meeqqat Ulluata malunnartinneranut atatillugu NAKUUSA børnealliancen suleqatigalugu nittartakkakkut suliniummik aallartitsivoq. Meeqqat namminneerlutik meeqqanut allanut ilassinnillutik videoliussapput. Suliniutip siunertaa tassaavoq, illoqarfinni nunaqarfinnilu tamani meeqqat ataatsimoornermik misigisaqarnissaannik ersersitsinissaq.

”Meeqqat ulluanni NAKUUSAP aammalu Børnealliancenip meeqqat akornanni ataatsimuussusermik qitiutitsinerat nuannaarutigaara. Minnerunngitsumik meeqqat nammineerlutik inuunerminnik oqaluttuartinneqarlutik ilaatinneqarnerat
nuannaarutigaara. Meeqqat oqaloqatigisarnissaat eqqaamasassavarput, oqalliseriinnarnagit,”
taama Isumaginninnermut, Ilaqutariinnut Inatsisinillu Atuutsitsinermut Naalakkersuisoq Martha Abelsen oqaaseqarpoq.

Aammattaaq meeqqat pitsaasumik inuuneqarnissaat Naalakkersuisut tamakkiisumik anguniagaraat. Anguniagarneq meeqqat tamarmik ukioq naallugu pitsaasumik inuuneqarnissaannut sammiveqarpoq. Ullumikkut meerarpassuit toqqissisimasumik inuuneqartuaannanngillat, naak taamamma tamatta kissaatigaluaripput.

Tamanna isummersorfigineqarlunilu piviusunngortinneqassaaq. Naalakkersuisut suliassaqarfiit meeqqanut attuumassuteqartut pillugit akisussaaffimmik annertuumik tigummiaqarnertik pimoorulluinnarpaat. Taamaammat Naalakkersuisut 2019-imi novembarimi Angajoqqaat meeqqanik sumiginnaasarnerat akiorniarlugu, nuna tamakkerlugu iliuusissatut pilersaarut 2020-2030 saqqummiuppaat. 2020-imi aasap ingerlanerani Kalaallit Nunaanni meeqqanut inuusuttunullu atugarliortunut pitsaanerusumik suliniuteqarnissaq pillugu kalaallit-qallunaat suleqatigiinnerannit innersuussutit saqqummiunneqarumaarput.

”Nunatsinni-Qallunaat Nunaannilu Naalakkersuisut suleqatigiinnerannit innersuussutit saqqummiunnissaat qilanaaraara. Suleqatigiinnermit innersuussutit suliniutinullu iliuusissatut pilersaarutit ataqatigiilluarnissaat pingaartissimavara. Taamaaliornikkut ataatsimut isiginnittumik aaqqissutissat, piffissami sivikittumi, akunnattumi ungasinnerusumilu, meeqqanut inuusuttunullu pissutsit pitsanngoriartinnissaannut allannguinissat qulakkeerneqassapput. Taamaattorli aamma meeqqat tamarmik pitsaasumik inuuneqarnissaat qulakkiissagutsigu, taava uagut inuiaqatigiittut ataatsimoorussamik akisussaaffitsinnnik kivitseqataassasugut ersarissassallugu pingaaruteqarpoq. Tamatta akisussaaffipput pimoorutissavarput,”
taama Isumaginninnermut, Ilaqutariinnut Inatsisinillu Atuutsitsinermut Naalakkersuisoq Martha Abelsen oqaaseqarpoq.

Paasisaqarnerorusukkuit naalakkersuisup allattaa Inger Heilmann Larsen e-mailikkut: ihla@nanoq.gl imaluunniit oqa. +299 554160-mut attavigiuk