Aningaasaqarnermut Siunnersuisoqatigiit: Upernaakkut nalunaarusiap tamanut saqqummiunneqarnera

Coronamik ajornartoornerup kingunerisaanik aningaasaqarnermut ineriartorneq annertuumik allanngoriarpoq. Ukiuni arlalinni ingerlalluartoqareersoq suliffissaqartitsinerlu annertusiartoreersoq 2020-mi sulianut kisitsit 1,5 pct.-imik appassaaq. Nutaamik tuniluuttoqarneratigut kinguariartoqanngippat 2021-mi aaqqikkiartuaartinneqarsinnaavoq, taamaattorli tunisassiorneq 2021-p naajartornerani coronamik ajornartoornerup siornatigut naatsorsuutigineqartumit annikinnerussaaq.

 

Aalisarneq tassaavoq avammut niuernermi inuussutissarsiutit annersaat, matumanilu aarlerinartuni annertunerpaaq tassaavoq nunarsuaq tamakkerlugu aningaasarsiornermi ajornartorsiornerup kingunerisaanik akit apparneri, annertussutsillu pissutsinit allanit aalajangerneqarlutik. Minnerunngitsumik takornariaqarneq eqqarsaatigalugu 2020-mi annertuumik eqqorneqarpoq.

 

Coronamik ajornartoorneq aallartimmat suliffeqarfinnut sulinermillu inuussutissarsiuteqartunut ikiorsiissutit saqqummiunneqarput. Coronamik ajornartoornerup kingunerisaanik pisumi immikkorluinnaq ittumi taakkua pisariaqarluinnarsimapput. Inoqutigiit suliffeqarfiillu aningaasaqarnikkut ajornartorsiutip kingunerisaanik sunniutissat pakkersimaarnissaat pingaaruteqarpoq. Piffissami sivisujaami suliffeqarfinnut aningaasartuutit aalajangersimasut akilernissaannut tapiissuteqartarnerit sulisuminnillu angerlartitsinerinik tapersersuisarnerit ajornartorsiutaasinnaapput. Taamaattumik aaqqissuussinerit sukkanerpaamik atorunnaarsinneqartariaqarput. Akerlianilli suliaqarfimmi tassani immikkut atukkat pissutigalugit takornariaqarnermik ingerlataqarfimmut inuussutissarsiutillu piffissami sivisuumi ajornartorsiornissaanut iluaqutaasussamik piffissami sivisunerusumi suliniuteqarnissaq pisariaqartinneqarpoq.

 

Aningaasarsiornikkut ineriartornerup mumisinneqarnera Nunatta Karsianut sunniuteqassaaq. Coronamik ajornartorsiorneq sioqqullugu 2020-mut annikitsumik sinneqartoornissaq, 2020-2023-milu ataatsimut oqimaaqatigiittoqarnissaa naatsorsuutigineqarsimapput. Maannakkut 2020-mi ukiunilu tulliuttuni amigartooruteqarnissaq naatsorsuutigisariaqarpoq, coronamik ajornartorsiornerup qanoq annertutiginera apeqqutaalluni. Siunissami Nunatta Karsiata aningaasaqarnerata iluarseqqinnissaa pisariaqassaaq - siunissami ajornartooqqeratarsinnaanermut upalungaarsimaniarluni akiitsunik akilersuinissamut piareersimassutissanillu pilersitsinissamut ukiuni arlariinni sinneqartoorutinik qulakkeerinninnissaq matumani pisariaqassaaq.

Coronamik ajornartorsiornerup kingunerigallagaanik paasisaqaannartoqartorlu siunissamut ungasinnerusumut pilersaarusiortoqarnissaanut annertuumik pisariaqartitsisoqarpoq. Ajornartorsiornerup aningaasaqarnermi ajortiasuuneq annertusivaa, taamaattumillu suliniutit pisariaqarlutik. Takornariaqarnikkut aatsitassatigullu arlalinnik sammiveqartumik aningaasaqarnerup ineriartortinnissaanik periusissap coronamik ajornartoorneq pissutigalugu kinguartinneqarneratigut pissutsit ajornerulersinneqarput.

 

Attavigisassaq:

 

Torben M. Andersen

Formand for Økonomisk Råd

Toqq/direkte +45 51 94 09 56

tandersen@econ.au.dk