Ammaaqqinnissami immikkoortoq 1 ullormi 15. juni aallartissaaq

Kalaallit Nunaata ammaqqinnissaanut immikkoortoq 1 pillugu naalakkersuinikkut ataatsimut isumaqatigiissusiortoqarsimavoq, taannalu ullumikkut partiini siulittaasut tamaasa peqataatillugit saqqummiunneqarpoq. Isumaqatigiissummi pingaarnertut sammineqarsimapput tikissinnaalernissamut ammaanissaq piffissalernera, tikittussat amerlassusissaat aamma mattussaasarnermut misissuiffigitinnissamullu malittarisassat.

Immikkoortoq 1 - Kalaallit Nunaata ammaqqinnera
Immikkoortoq 1-imut isumaqatigiissummi pineqarput:
- Immikkoortoq 1-imut ikaarsaariarnissamut piumasaqaatit: Danmarkimi tunillatsissimasut ataatsimik qaangiisimanngillat, Danmarkimilu innuttaasut misissuiffigineranni tunillatsittut amerlassusaat 5 %-imik qaangiisimanngillat.
- Immikkoortoq 1-imi 15. juni aallartiffiugallassaaq.
- Sapaatip akunneranut timmisartumut ilaallutik tikittut amerlanerpaamik 600-t kisimik akuerineqarput.
- Nalunaarutit innersuussutillu massakkut atuuttut aalajangiusimaneqassapput.
Kisianni pisoq qanimut malinnaaffigissavarput, sapaatip akunnerinilu tullinnguuttuni peqqusinernullu tunngatillugu pisariaqartinneqassappat sukaterisoqartussaassaaq.
- Tikittussanut piumasaqarneq - aallariartortarfimmi makkuninnga takutitsisassapput:
o Coronamut misissortinnermi tunillatsissimannginnermut uppernarsaat sivisunerpaamik ullunik tallimanik pisoqaassusilik
o Sumut-immersuiffimmik immersuisimanermut uppernarsaat
- Mattussaanermut malittarisassat:
o Kalaallit Nunaannut tikinnermi ingerlaannaq mattunneqassaatit.
o Tikereernerup kingorna ullut tallimat qaangiunnerisigut misissorteqqittoqassaaq.
o Misissorteqqinnermi tunillatsittoqarsimanngippat mattussaaneq unissaaq.
- Misissuinissamut periusissaq: kikkut tamarmik ersiutillit misissorneqassapput.
Nunanut allanut aallarneq nammineq akisussaaffigineqassaaq.
Kalaallit Nunaanniit aallarneq nammineq akisussaaffigineqarmat erseqqissassallugu pingaaruteqarpoq, nunanilu allamiinnermi COVID-19-imik tunillatsittoqarsimappat imaluunniit aallalernermi uppernarsaatissat pisariaqartinneqartut tunniunneqarsinnaanngippata angerlarluni angalanermut atasumik aningaasartuutit nammineq akilerneqassapput.

Tunillatsittoqarsimappat:
- Tikittussaq tunillatsissimappat pineqartoq aatsaat tunillatsissimannginnermut uppernarsaammik takutitsippat Kalaallit Nunaannut isersinnaassaaq.
- Najugaqarneq bilitsilu nutaaq nammineq akilerneqassapput.
Uppernarsaat pigineqanngippat:
- Aallariartortarfimmi Sumut-immersuiffissamik immersuisimanermut uppernarsaateqartoqanngippat imaluunniit tunillatsissimannginnermut uppernarsaatissaqartoqanngippat timmisartumut ikisinnaassanngilatit.
- Najugaqarneq nammineq akilerneqassaaq.
- Bilitserisat ullumut allamut nuunneqassaaq.

Innersuussutit atuuttut
- Peqqinnissap tungaatigut innersuussutit tamarmik aalajangiusimaneqassapput
o Imminut qanillinaveersaaritsi - timimut attuinissaq pinaveersaaruk
o Sumiiffiit inuppassuarnit qanimut katersuuffiusartut orninnaveersaakkit
o Akulikitsumik errortortarneq imaluunniit assanut spritimik atuineq
o Qanit talinnik asserlugu quersortarit tangajortarlutillu
o Qisernaveersaarit
o Eqqiaaneq silaannarissarnerlu eqqumaffigikkit
- Inuit amerlanerpaamik 100-t katersuussinnaanerat pillugu innersuut

- Inuit akornanni sapinngisamik ungasinniarnissamut aamma eqqiluissaarluarnissamut pissutsit pillugit peqqinnissakkut siunnersuinernik suliffeqarfiit malinninnissaat innersuussutaavoq.
Nalunaarutit atuuttut
- Covid 19-imut tunngatillugu paasissutissiinermik pisussaaffiit aamma inunnut paasissutissanik suliarinninneq pillugit Namminersorlutik Oqartussat nalunaarutaat nr. 8, 7. april 2020-meersoq
- Tunillaassortumik nappaalasoqalernerani atuarfiit paaqqinnittarfiillu atugaat pillugit Namminersorlutik Oqartussat nalunaarutaat nr. 9, 14. april 2020-meersoq
- Utoqqaat illuini assigisaannilu aamma napparsimmavinni pulaartunut killilersuinerup atuuttunngortikkallarnissaanut periarfissiinissaq pillugu Namminersorlutik Oqartussat nalunaarutaat nr. 11, 14. april 2020-meersoq
- Assartuutinut, inuussutissarsiummik ingerlataqartunut, pisortat suliffeqarfiutaannut, katerisimaartarnernut allanullu tunngatillugu killilersuigallarnerit inerteqquteqartitsinerillu pillugit Namminersorlutik Oqartussat nalunaarutaat nr. 13, 23. april 2020-meersoq
- Piffissami ajornartoorfiusumi atuartitsisarneq, misilitsittarneq aamma soraarummeertarneq, tiguneqartarneq il.il. covid-19-ip kingunerisaanik atugassarititaasut pillugit Namminersorlutik Oqartussat nalunaarutaat nr. 14, 28. april 2020-meersoq