Naalakkersuisut apeqqarissaarfigineqarnissamut piareersimagaluarput

Inatsisartunit apeqqutigineqartussat tamanik Naalakkersuisunit akissuteqarnissamut piareersimagaluarput.

Inatsisartunit apeqqarissaarfigineqarnissaq pilersaarutaareersup pinissaa aqaguttoq ualikkut Inatsisartut Siulittaasoqarfiata aalajangerpaa apeqqarissaarfigineqarnissaq pilersaarutaareersoq taamaatinneqassasoq. Inatsisartut Siulittaasoqarfiata periarfissarititaa naapertorlugu apeqqarissaarfigineqarnissamut piffissamik immikkoortitsineq naapertorlugu apeqqutigineqartussat akinissaannut Naalakkersuisut piareersimagaluarput.

”Erseqqissaatigissavara apeqqarissaarfigineqarnissaq Naalakkersuisut taamaatinngimmassuk. Naalakkersuisut piaareersarlutik piffissarujussuaq atorsimagaluarpaat. Inatsisartunik apeqqarissaarfineqarnissamut qilanaarsimagaluarpugut.” Naalakkersuisut Siulittaasuat Kim Kielsen taamak oqarpoq.  

Naalakkersuisut Siulittaasuat partiini siuttut oqallinnissaanni 3 tiimimik sivisussuseqartussami peqataasussaammat Naalakkersuisuni aalajangerpugut Ineqarnermut Attaveqaqatigiinnermullu Naalakkersuisoq Karl Frederik Danielsen Nalaakkersuisut sinnerlugit apeqqarissaarnissamut peqataassasoq.

Inatsisartut Suleriaasianni § 37, imm. 7 naapertorlugu Inatsisartut Siulittaasoqarfiat Naalakkersuisunut apeqqarissaarnissamik aalajangersaasinnaavoq. Apeqqarissaarnissamili Naalakkersuisup sorliup peqataanissaa Naalakkersuisut Siulittaasuata aalajangigassaraa. Inatsisartut Naalakkersuisullu pillugit Inatsisartut inatsisaanni § 23 imm. 1. malinneqarpoq, tassani allassimammat Naalakkersuisut suliassaasa agguataarneri Naalakkersuisut Siulittaasuanit aalajagiiffigineqassasut.

Annertunerusumik paasisaqarusuttut Naalakkersuisup allattaa Steve Sandgreen attavigisinnaavaat: stev@nanoq.gl-imut.