Nuummi meeqqat kigutai narlorsartittarnerat unitsinneqarpoq

Siunissami Nuummi meqqat inuusuttullu kigutai narlorsartittarnerat unitsinneqarpoq. Kisianni suliaritittut tamarmik naammassillutik suliarineqassapput, aamma meeqqat utaqqisuniittut suliaritinnissamut neqeroorfigineqassapput

Martha Abelsen, Peqqissutsimut Isumaginninnermut Inatsisinillu Atuutsitsinermut Naalakkersuisoq, kalaallit meerartai tamarmik kigutiminnik narlorsartinnissaminnik pisariaqartitsisut tamakkiisumik narlorsartinneqarsinnaanngimmata, ajuusaarutigaa:

 

-Soorunami kissaatigerusuppara maannakkoqqissaaq naammattunik aningaasaateqarlutalu Kalaallit Nunaat tamaat kigutilerisunik immikkut ilinniagalinnik kigutinik narlorsaanissamut neqerooruteqarsinnaassalluta. Kisianni peqqinnissaqarfimmi suliassat allat amerlasuut pingaarutillit pissutigalugit politikeriusugut nuna tamakkerlugu kigutit narlorsartinnissaanut aningaasanut inatsimmi 2020-mut aningaasanik nassaarsinnaasimanngilagut.


Nuummi kisimi

Kigutinik narlorsaaneq nuna tamakkerlugu neqeroorutaanikuunngisaannarpoq. Manna tikillugu Nuummi meeqqanut inuusuttuaqqanullu kisimi neqeroorutaanikuuvoq, tassani kigutilerisoq immikkut ilinniagalik bøjlenik ikkussuisarpoq suliaritinnerullu ingerlanera tamaat ataavartumik misissortarlugu.   

Immikkut ilinniagallit tunngavigalugit bøjlet atorlugit kigutinik narlorissaaneq – suliaritinnerup tamaat ataavartumik kigutiminik narlorissartittoq malinnaavigineqarsinnaanngippat, imminut illersorneqarsinnaanngilaq. Immikkut ilisimasalimmik sapaatip akunneri arfinilikkaarlugit pisariaqartumik misissortinngikkaanni ajornerpaamik kigutip sorlaa nungusinnaavoq tamuasinnaassuserlu innarlerneqarsinnaalluni. Misissortinnissamut periarfissaq taanna sinerissami tunumilu Nunatsinni Kigutilerisoqarfimmiit periarfissaasimanngisaannarpoq.

Immikkoortitsineq

- Isumaga malillugu manna tikillugu innuttaasut akornanni naleqqutinngitsumik immikkoortitsisoqarsimavoq. Taamaattumik – neriuppunga piffissami qanittumi – kigutit narlorsarnissaanut akissaqaqqilerutta, taava neqeroorut kalaallit meerartaasa inuusuttortaasalu kigutiminnik narlorissartinnissaminnut pisariaqartitsisunut tamanut atuutissaaq, Martha Abelsen taama oqarpoq. 

Nuummi unitsitsinerup tunuliaqutaa

Amerlasuut eqqaamasaattut, Peqqinnissaqarfimmi aqutsisut juli 2019-mi nalunaaruteqarput, Nunatsinni Kigutilerisoqarfik meeqqat kigutaannik narlorissaaneq unitsittariaqarsimagaat. Kigutilerisumik immikkut ilinniagalimmik atorfinitsitsisinnaannginneq tunngaviuvoq, aamma kigutit narlorsarnissaat illersorneqarsinnaajunnaarnerat tunngavigineqarpoq. Taamanili peqqinnissaqarfik kigutit narlorsarneqarnissaat assigiiaartumik nunalu tamakkerlugu pilersitsinissaq misissorsimavaat, iluatsinngitsumilli.

Suliaritinnerit aallartinneqareersut naammassineqassapput.

Nuummi meeqqat aamma inuusuttut kigutiminnik narlorsartinnermik aallartereersut naammassillugit suliarineqassapput, aamma katsorsaariaaserisaq malillugu malinnaavigineqassapput. Taamatuttaaq narlorsartinnissaminnut innersuunneqareersut aamma maanna utaqqusiniittut suliaritinnissaminnut aggersarneqassapput. Oqarasuaatikkut siarngunneq pinaveersaarniarlugu kigutileriffimmiit angajoqqaat namminneq kigutilerivimmut saaffiginninnatik aggersarneqarnissaq utaqqissagaat qinnuigissavagut. Narlorsartitsinissamik unitsitsiaartuaarneq minnerpaamik ukiuni pingasuni sivisussuseqassaaq.

Paasisaqarnerorusukkuit naalakkersuisup allattaa Inger Heilmann Larsen, oqarasuaat:+299 554 160, e-maili: ihla@nanoq.gl attavigineqassaaq